Dalam Bup Kudus, leka jaku sha·maʹyim dalam jaku Hebrew suah disalin ngagai “serega” tang iya bisi mayuh reti ti bebida. Leka jaku tu ulih dikena madahka pasal: (1) langit tauka angkasa lepas; (2) endur ti enda dipeda alai Petara enggau bala melikat diau; sereta (3) kena madahka pasal penuduk ti tinggi sereta bemulia. Nya alai, dalam jaku Iban leka jaku tu disalin ngagai “serega” tauka “langit” nitihka konteks. a

1.   Langit tauka angkasa lepas. Dalam konteks tu, “langit” madahka pasal atmosfera bumi, iya nya endur alai ribut beputut, burung terebai, mua hari ngasilka ujan enggau seleju, sereta kilat nyadi. (Jop 37:21; Jaku-Dalam 30:19; Isaiah 55:10; Luke 17:24) Iya mega ulih madahka pasal angkasa lepas tauka langit luar, endur alai “mata panas, bulan, [enggau] bintang.”—Ulang Adat 4:19; Pemungkal 1:1.

2.   Endur ti enda dipeda alai Petara enggau bala melikat diau. Leka jaku “serega” mega madahka pasal endur ti enda ulih dipeda ke ukai sebagi ari alam semesta fizikal, lalu jauh lebih besai sereta tinggi agi. (1 Raja 8:27; John 6:38) Petara Jehovah, ke “enda ulih dipeda” diau ba serega tu, pia mega enggau bala melikat ke udah ditempa Iya. (John 4:24; Matthew 24:36) Dalam Bup Kudus, bala melikat empu mega dikumbai “serega” laban sida empu diau dia.—Masmur 89:5-7.

    Bup Kudus mega ngena leka jaku “serega” kena madahka enggau silik agi “endur Petara diau” ba serega. (1 Raja 8:43, 49; Hebrew 9:24; Pemandang 13:6) Ambika chunto, Bup Kudus udah dulu madahka Sitan enggau bala melikat ti jai deka dibuai ari serega, lalu nadai agi dikemendarka bediri ba mua Jehovah. Taja pia, sida agi enda ulih dipeda, nyadi sida agi diau ba endur ti enda ulih dipeda.—Pemandang 12:7-9, 12.

3.   Kena madahka pasal penuduk ti tinggi sereta bemulia. Bup Kudus ngena leka jaku “serega” kena madahka penuduk ti tinggi, lalu ke suah iya madahka pasal kuasa merintah. Penuduk ke baka tu ulih dipegai:

   •   Petara Jehovah Empu ti raja ke pemadu bekuasa.—Luke 15:21 (Bup Kudus Baru)

   •   Perintah Petara, siti perintah ti deka nganti perintah mensia. Bup Kudus ngumbai Perintah nya “langit ti baru.”—Isaiah 65:17; 66:22; 2 Peter 3:13. b

   •   Orang Kristian ke diau ba dunya tang bisi harapan niki ke serega.—Epesus 2:6.

   •   Perintah mensia ti udah ngeninggika diri ba atas bala rayat sida.—Isaiah 14:12-14; Daniel 4:20-22; 2 Peter 3:7.

   •   Bala melikat ti jai ke merintah atas dunya tu.—Epesus 6:12; 1 John 5:19.

Baka ni gaya serega?

 Bisi beratus juta iku bala melikat ba serega ke kisuk “ngasika pesan [Jehovah].”—Masmur 103:20, 21; Daniel 7:10.

 Bup Kudus ngambarka serega nya penuh laban penampak. (1 Timoti 6:15, 16) Nabi Esekiel kala meda genera pasal serega lalu ba dia bisi mayuh penampak sereta beperenching. Nabi Daniel mega meda genera pasal serega alai kerusi diraja nya baka ke beapi-api. (Esekiel 1:26-28; Daniel 7:9, 10) Serega nya amat kudus, beresi sereta lawa.—Masmur 96:6; Isaiah 63:15; Pemandang 4:2, 3.

 Bup Kudus nerangka pasal serega ke balat ngalitka ati kitai. (Esekiel 43:2, 3) Taja pia, mensia enda ulih amat-amat faham pasal serega laban nya enda ulih dipeda, didinga tauka diasaika kitai.