Nama Reti Nyadi Kudus?
Saut ari Bup Kudus
Nyadi kudus mai reti nyeliahka diri ari semua utai ke jai tauka kamah. Jaku Hebrew ke disalin ngagai “kudus” datai ari rambai jaku ke mai reti “enda dipegulaika enggau utai bukai.” Utai ke kudus nya beresi sereta tuchi.
Semina Petara aja ti pemadu kudus. Bup Kudus nulis, ‘Nadai orang ke kudus baka Jehovah.’ a (1 Samuel 2:2) Nya kebuah, Petara bisi hak nentuka sesiti standard pasal utai ti kudus.
Leka jaku “kudus” ulih dikena ba mayuh utai ke bisi kaul enggau Petara. Kelebih agi enti utai nya enda dipegulaika enggau utai bukai ketegal dikena ba pengarap. Ngambika chunto, ba Bup Kudus bisi nyebut pasal:
Endur ti kudus: Maya Moses semak ngagai babas ke berapi, Petara madahka iya benung bediri ba “tanah ti kudus.”—Pemansut 3:2-5.
Pengawa ti kudus: Orang Israel kelia begumpul nyembah Jehovah ‘ba hari ti kudus.’—Adat Lewi 23:37, Alkitab Versi Borneo.
Perengka ti kudus: Perengka ke dikena ba Rumah Sembiang di Jerusalem ke dikena ba sembah dikumbai utai ti kudus. (Isaiah 52:11) Semua perengka ke kudus tu patut dijaga enggau manah, tang enda ibuh disembah. b
Kati ulih orang ke enda sempurna nyadi kudus?
Ulih. Petara bisi pesan ngagai orang Kristian, “Diau kudus, laban Aku kudus.” (1 Peter 1:16) Endang amat, mensia ke enda sempurna enda ulih setipak enggau pengudus Petara ti sempurna. Tang orang ke ngasika ukum Petara ulih dikumbai “kudus”, laban sida ngelantangka ati Petara. (Rome 12:1) Orang ke bebendar deka nyadi kudus, ngayanka ulah tu ari jaku sereta ulah iya. Ngambika chunto, iya deka nitihka lalau ari Bup Kudus ke madah, “intu diri kudus dalam semua utai, laban Iya ke ngangauka kita, kudus.”—1 Tesalonika 4:3; 1 Peter 1:15.
Kati ulih orang ke udah dikumbai kudus ba mata Petara nyadi enda kudus?
Ulih. Enti seseiku orang enda nitihka standard Petara agi, ba mata Petara iya enda kudus agi. Ambika chunto, bup Hebrew ke ditulis dalam Bup Kudus ditulis “menyadi ti kudus”, tang enti sida enda bejimat, sida engka ‘enda arap, lalu ninggalka Petara ti idup.’—Hebrew 3:1, 12.
Runding ti salah pasal nyadi kudus
Runding ti salah: Orang ke deka nyadi kudus patut ngemediska diri, lalu nagang diri ari ngasaika ati ti puas ba pengidup.
Fakta: Bup Kudus ngajar, pengawa ke “merinsaka tubuh diri”, tauka nagang diri ari ngasaika ati ti puas, iya ke bendar “nadai guna” sereta enda ulih nulung kitai nyadi kudus. (Kolosi 2:23) Tang, Petara dekaka kitai ngasaika utai ti manah. ‘Semua kitai patut makai, ngirup lalu ngelantangka diri ngena utai ti udah ulih kitai, laban semua utai nya endang pemeri ari Petara magang.’—Pengajar 3:13.
Runding ti salah: Orang ke enda bebini tauka belaki ulih kudus.
Fakta: Taja pan seseiku Kristian milih pengidup bujang tauka dara, nya ukai reti iya sida kudus ba mata Petara. Tang, orang ke enda bebini tauka belaki ulih ngereja mayuh agi pengawa ke Petara. (1 Korint 7:32-34) Dalam Bup Kudus mega bisi madahka, orang ke udah kawin mega ulih nyadi kudus. Iya ke bendar, Peter nya seiku ari murid Jesus ke udah kawin.—Matthew 8:14; 1 Korint 9:5.
a Jehovah nya nama Petara ti bendar. Bisi beratus iti ayat Bup Kudus ke nyengkaum nama tu enggau rambai jaku “kudus” sereta “pengudus.”
b Ajar Bup Kudus amat begedika pengawa nyembah engkeramba.—1 Korint 10:14.
Nuan Engka Rindu Meda Tu
AJAR TI BEGUNA
Kati Petara Ngasuh Kitai Ngena Engkeramba Maya Nyembah Iya?
Kati tanda, patung, utai tauka engkeramba nulung kitai semak Petara?
SAUT NGAGAI TANYA PASAL BUP KUDUS
Kati Bup Kudus Bisi Ngajar, “Sekali Selamat, Selamat Belama Iya”?
Jesus ngena sempama kena nyaut tanya.
PASAL KAMI
Pinta Datai
Kerandauka tanya pasal Bup Kudus, tauka belajar mayuh agi pasal Saksi-Saksi Jehovah.