Au. Petara amat ibuhka nembiak Iya ti sakit. Bekaul enggau nembiak Petara ke tetap ati, dalam Bup Kudus bisi semaya, ‘Jehovah deka nulung sida lebuh sida sakit lalu deka ngeraika sida.’ (Masmur 41:3) Enti nuan bisi penyakit ti raya, bisi tiga chara ke ulih nulung nuan:

1.   Besampi minta pengering ngambi betan. Enggau chara nya, nuan ulih nerima ‘pemaik Petara, ti ngelui peragam mensia’. (Masmur 41:3) Tu ngurangka pengirau nuan sereta meri nuan pengering.—Pilipi 4:6, 7

2.   Anang kelalu tusah ati. Bup Kudus madah: “Ati ti selalu lantang ngasuh nuan bepengerai. Ati ti selalu tusah deka ngasuh nuan mupuk mati.” (Jaku Dalam 17:22) Uji meh utai ti ngasuh nuan ketawa. Tu ulih ngurangka penusah ati, lalu ngemanahka pengerai nuan.

3.   Andal pasal semaya Petara ke jemah ila. Pengadang pasal semaya Petara jemah ila, nulung nuan gaga ati taja pan benung napi penyakit ti raya. (Rome 12:12) Bisi semaya ti manah dalam Bup Kudus ke madahka, jemah ila nadai agi orang madahka “diri sakit”. (Isaiah 33:24) Petara deka ngeraika penyakit raya ke enda ulih digeraika teknologi kemayaharitu. Chunto iya, Bup Kudus madah, “Tubuh sida deka mansang biak sereta kering baru.”—Jop 33:25.

 Jaku gerah: Taja pan Saksi-Saksi Jehovah pechayaka tulung ari Petara, sida mega ngena chara berubat ba sepital kena betan napi penyakit ti raya. (Mark 2:17) Tang, Saksi-Saksi Jehovah nadai madahka ni bagi chara berubat ke patut dikena. Tiap iku orang patut ngaga pemutus kediri empu.