Bup Kudus nadai mayuh penerang ti nyemetak pasal topik tu. Taja pia, Bup Kudus nadai nagang orang nganta, ngena perengka emas tauka utai bukai. Tang, Bup Kudus bisi madah, “awakka pemajik kita datai ari ati kita ti bendar, ti enda nemu luya”.—1 Peter 3:3, 4.

•   Bala indu kelia ke tetap ati pan nganta. Ngambika chunto, Rebekah jadi enggau anak lelaki Abraham, iya nya Isak. Iya ngena tinchin emas ba idung, gelang emas, enggau mayuh agi perengka emas bukai ke mar ti diberi mentua lelaki iya. (Pemungkal 24:22, 30, 53) Ester mega nerima “pengawa ngemajikka” diri, laban iya seiku ari chalun kuin menua Persia. (Ester 2:7, 9, 12) Kesuah iya, pengawa ke baka tu tentu begunaka perengka “kosmetik”, tauka “mayuh macham perengka nganta.”—New International Version; Easy-to-Read Version.

•   Bup Kudus ngena perengka emas dalam sekeda sempama. Chunto iya, seseiku orang ke meri lalau ti manah sempama baka “tinchin emas tauka ari utai ti berega ti digaga ari emas”. (Jaku Dalam 25:12) Lebuh ngibun orang Israel, Petara ngambarka diri baka seiku laki ti ngintu bini iya enggau gelang jari, marik, sereta antin. Perengka tu disempamaka baka ‘pemajik ti nyau perenching’.—Esekiel 16:11-13.

 Runding ti salah: Kuin Jesebel ngena celak mata tauka eye shadow. Tu nunjukka ngena perengka nganta nya salah.—2 Raja 9:30.

 Fakta: Kuin Jesebel bisi kaul enggau pengawa bemanang, lalu munuh orang. Iya diukum ketegal pengawa iya ke jai, ukai ketegal chara iya nganta tauka perengka ke dikena iya.—2 Raja 9:7, 22, 36, 37.