Nitihka prinsip Bup Kudus, enti kitai enda ulih nagang pengeringat, kitai tauka orang ke ngelingi kitai sama nadai penguntung. (Jaku Dalam 29:22) Amat, kekadang kitai bisi kebuah ringat. Tang, Bup Kudus ngajar, orang ke udu ringat enda ulih diselamatka. (Galatia 5:19-21) Dalam Bup Kudus bisi ngembuan mayuh lalau ke ulih nulung kitai nagang pengeringat.

•  Kati nya salah ringat?

•  Ni maya ringat nya salah?

•  Baka ni nuan ulih nagang pengeringat?

•  Ayat Bup Kudus pasal pengeringat

 Enda. Kekadang, kitai patut ringat. Ngambika chunto, seiku nabi Petara ti tetap ati ya nya Nehemia, ringat maya iya ninga jaku putap.—Nehemia 5:6.

 Kekadang Petara mega ringat. Chunto iya, Petara kala balat ringat ngagai nembiak Iya jeman kelia. Nama kebuah? Sida bulaka semaya semina deka nyembah Iya aja. Sida nyau nyembah petara pelesu. (Pengulu 2:13, 14) Tang, Jehovah enda dikelala enggau pengeringat. Pengeringat Iya bisi kebuah sereta ulih ditagang.—Pemansut 34:6; Isaiah 48:9.

 Pengeringat ti salah lebuh iya nadai kebuah sereta enda ulih ditagang. Nya meh pengeringat ti selalu ditunjukka mensia ti enda sempurna. Chunto iya:

•   Kain ‘balat ringat’ lebuh Petara enda nerima pemeri iya. Kain nejuka pengeringat iya nya majak nyadi senyadi lalu ngujungka iya sanggup munuh menyadi iya empu.—Pemungkal 4:3-8.

•   Nabi Jonah “balat amat enda lantang ati” meda Jehovah kasihka orang Niniwe. Jehovah ngelalau Jonah lalu madahka, iya “enda patut ringat.” Petara mega madahka Jonah patut kasihka orang ti udah nesal ati.—Jonah 3:10–4:1, 4, 11. a

 Ari chunto tu kitai nemu, enti pengeringat enda ditagang enggau chara ti manah, ‘pengeringat kitai enda ulih mansutka pengelurus ti dikedekaka Petara.’—James 1:20.

•   Pengeringat ti enda ulih ditagang ulih mai penusah. Bisi orang ngumbai, enti sida ngayanka pengeringat, nya nunjukka sida berani sereta kering. Tang iya ke amat, enti kitai enda ulih nagang pengeringat diri, nya ulih mai penusah. “Enti nuan enda ulih nagang diri ringat, nuan nadai daya, baka nengeri ti nadai kuta, ti mudah diserang munsuh.” (Jaku Dalam 25:28; 29:11) Tang, enti kitai bebendar nagang pengeringat diri, nya nunjukka kitai orang ti kering sereta bepenemu-dalam. (Jaku Dalam 14:29) Bup Kudus madahka, “Manah agi ngembuan ati ti liat, ari ke ngembuan kuasa.”—Jaku Dalam 16:32.

•   Tagang pengeringat diri ngambika kitai enda ngereja utai ti ngasuh kitai nesal. Masmur 37:8 madahka, “Anang ringat, lalu badu agi pedis ati!” Ayat tu nunjukka kitai ulih milih jejampat ngetuka pengeringat ngambika kitai enda nesal. Epesus 4:26 madahka, “Anang bedosa lebuh kita ringat.”

•   Enti ulih, rari meh sebedau pengeringat nya enda ulih ditagang. Bup Kudus ngelalau “Pun kelikuh nya baka tekat ai ti baru deka runtuh. Padamka kelikuh nya enggau jampat.” (Jaku dalam 17:14) Enti nuan bekelikuh enggau seseiku orang, mutarka meh penanggul nya enggau jampat. Tang, seduai patut nemu nagang pengeringat diri, ngambika ulih bebaik enggau chara ti manah.

•    Pansik dulu fakta. “Enti nuan orang ke mereti, nuan deka nagang diri lengkar,” ku jaku lalau ba Jaku Dalam 19:11. Sebedau nyimpulka sesiti utai, pansik dulu fakta iya. Lebuh kitai udah tetemuka pun penanggul nya nyadi, tu engka nulung kitai nagang diri ari kelalu ringat enggau nadai kebuah.—James 1:19.

•    Besampi ngambika ulih nagang diri. Nengah sampi, nuan ulih minta ‘pemaik ari Petara ti ngelui peragam mensia.’ (Pilipi 4:7) Sampi nya siti ari chara kitai ngulihka roh kudus Petara. Kuasa roh kudus ulih nulung kitai ngayanka kualiti baka pemaik, sabar, enggau ulih nagang diri.—Luke 11:13; Galatia 5:22, 23.

•   Bejimat milih bakih. Orang ke bebakih enggau kitai ulih nentuka baka ni ulah kitai. (Jaku Dalam 13:20; 1 Korint 15:33) Nya kebuah Bup Kudus ngingatka kitai, “Anang bepangan enggau orang ke lengkar sereta mangah.” Nama kebuah? “Enggai ke nuan dirampit ulah sida, lalu disintak panjuk.”—Jaku Dalam 22:24, 25.