Ukai Petara ke ngasuh pengerusak alam nyadi. Tang, Iya amat ibuhka orang ke dituntung penusah tu. Perintah Petara deka ngujungka pemerinsa, nyengkaum pengerusak alam. Indah ke diatu, Petara pan ngelantangka sida ke napi penusah tu.—2 Korint 1:3.

•  Baka ni kitai ulih nemu pengerusak alam ukai ukum ari Petara?

•  Kati pengerusak alam nunjukka kitai idup ba pengujung dunya?

•  Baka ni Petara nulung mansa pengerusak alam?

•  Kati ulih prinsip Bup Kudus nulung kitai nyediaka diri kena napi pengerusak alam?

•  Ayat Bup Kudus ke ulih ngelantangka mansa pengerusak alam

 Ari Bup Kudus kitai nemu Petara udah kala ngena kuasa alam kena ngukum mensia. Tang, chara Iya ngena tu bebida ari pengerusak alam. Nama kebuah?

•   Pengerusak alam, ngerusak enda ngira orang manah tauka jai. Tang, lebuh Petara ngena kuasa alam ngukum mensia, Iya nentuka semina sida ke jai diukum. Chunto, lebuh Petara ngerusak menua Sodom enggau Gomorah, Iya nyelamatka seiku lelaki ke manah enggau dua iku anak indu iya. (Pemungkal 19:29, 30) Petara ulih macha ati mensia, lalu Iya mega ulih ngerusak orang ke jai.—Pemungkal 18:23-32; 1 Samuel 16:7.

•   Pengerusak alam ulih nyadi enggau ngenyit. Tang, Petara deka meri tangkan ngagai orang ke jai sebedau ngena kuasa alam ngukum sida. Orang ke ngasika jaku tangkan Petara deka diberi peluang nyelamatka diri.—Pemungkal 7:1-5; Matthew 24:38, 39.

•   Mensia mega siti ari kebuah pengerusak alam nyadi. Baka ni? Sida ngerusak rampa menua, tauka nirika bengunan ba endur ke suah nyadi tanah berenyang, ampuh bah, enggau gaya hari ti jai. (Pemandang 11:18) Kitai enda patut nyalahka Petara ketegal pemutus ke salah ti digaga mensia.—Jaku Dalam 19:3.

 Au, Bup Kudus endang udah madah pengerusak alam deka nyadi ba “pengujung dunya” tauka “ba hari ti penudi.” (Matthew 24:3; 2 Timoti 3:1) Ngambika chunto, kemayaharitu Jesus madah, “lapar pungkang enggau tanah berenyang deka nyadi ba mayuh bengkah endur.” (Matthew 24:7) Enda lama agi, Petara deka ngelenyauka semua pun pemerinsa nyengkaum pengerusak alam, ari dunya tu.—Pemandang 21:3, 4.

•   Petara ngelantangka ati mansa pengerusak alam ngena Jaku Iya, Bup Kudus. Bup Kudus meri jamin ngagai kitai, Petara endang ibuh sereta ulih ngasaika pemerinsa ke ditapi kitai. (Isaiah 63:9; 1 Peter 5:6, 7) Bup Kudus mega madahka Petara besemaya, jemah ila kitai deka bibas ari pengerusak alam.—Peda “ Ayat Bup Kudus ke ulih ngelantangka mansa pengerusak alam.”.”

•   Petara nulung mansa pengerusak alam nengah penyembah Iya. Petara ngena penyembah Iya ba dunya neladan chunto Jesus. Bup Kudus madah, Jesus deka nulung “orang ke seranta” enggau “orang ke tusah.” (Isaiah 61:1, 2) Penyembah Iya enggau naka ulih ngereja utai ti sama.—John 13:15.

   Petara mega meri tulung ti ngena ngagai mansa pengerusak alam nengah penyembah Iya.—Kereja Rasul 11:28-30; Galatia 6:10.

 Au. Taja pan Bup Kudus ukai ditulis kena nyediaka kitai napi pengerusak alam, tang iya ngembuan prinsip ke ulih nulung kitai. Chunto:

•   Gaga pelan enti bisi pengerusak alam. “Orang ke nemu berunding deka meda penusah datai, lalu belalai.” (Jaku Dalam 22:3) Endang manah enti ngaga pelan sebedau penusah nyadi. Pelan ke ulih digaga nyengkaum nyediaka bik kecemasan sereta nentuka endur betemu enggau diri sebilik lebuh penusah tu nyadi.

•   Nyawa beguna agi ari reta tengkira. Bup Kudus madah: “Kitai nadai mai utai ngagai dunya tu, lalu kitai pen enda mega ulih mai utai ari dunya tu.” (1 Timoti 6:7, 8) Lebuh pengerusak alam nyadi, kitai patut sanggup ngelengkaka rumah enggau reta tengkira kena nyelamatka diri empu. Kitai patut ingat, nyawa kitai lebih berega ari reta tengkira.—Matthew 6:25.