Pengudah nempa lelaki keterubah enggau indu, Petara mai sida begulai ngena tikah. Iya ngepunka tikah nyadika kaul ti spesial entara siku lelaki enggau siku indu ngambika sida sebilik ulih lantang.—Pemungkal 1:27, 28; 2:18.

 Petara dekaka laki bini gaga ati. (Jaku-Dalam 5:18) Dalam Bup Kudus, Iya nyediaka standard sereta prinsip ke ulih nulung tikah mujur.

Dalam artikel tu

•  Nama standard Petara pasal tikah?

•  Baka ni pengawa beserara enggau sarak?

•  Kati tikah patut diregister nitihka undang-undang ngambika diterima Petara?

•  Nama tanggung pengawa laki bini baka ke dipadahka dalam Bup Kudus?

•  Kati Petara deka laki bini ngembuan anak kemayaharitu?

•  Baka ni Bup Kudus nulung tikah aku?

•  Ayat Bup Kudus pasal tikah

 Ari pun, Petara ngepunka tikah ngambika siku lelaki enggau siku indu ulih nyadi siku. (Pemungkal 2:24) Petara enda ngemendarka bebini tauka belaki lebih ari siku, ulah homoseksual, tauka diau begulai sebedau kawin. (1 Tesalonika 4:3) Jesus ngajar bala murid iya nitihka standard asal Petara pasal tikah.—Mark 10:6-8.

 Ba mata Petara, tikah nya siti kaul ti belama iya. Maya siku lelaki enggau siku indu kawin, sida besemaya deka tetap ati ngagai pangan diri sereta diau begulai seagi-agi seduai iya idup.Petara dekaka sida ngamatka semaya sida.—Mark 10:9.

 Kekadang laki bini engka patut beserara. Ngambika contoh, siku ari kaling pengidup engka patut mindah ketegal patut ngintu diri sebilik maya bisi kecemasan. Tang Bup Kudus enda meransang laki bini beserara ketegal penanggul ba tikah. Enti tu nyadi, Iya dekaka sida bebaik baru.—1 Korint 7:10

 Semina siti aja kebuah ulih sarak, iya nya butang. (Matthew 19:9) Nya alai, enti laki enggau bini mutuska deka beserara tauka sarak ketegal kebuah ti bukai kelimpah ari butang, seduai iya bela enda tau dating enggau orang bukai tauka kawin baru.—Matthew 5:32; 1 Korint 7:11.

 Petara dekaka orang Kristian nitihka undang-undang perintah ba pengawa tikah. (Titus 3:1) Lebuh maya seduai iya ulih ngeregister tikah enggau sah, pengawa tu mandangka basa ngagai piak bekuasa sereta standard Petara ke madahka tikah nya meruan belama iya. a

•   Tanggung pengawa laki bini. Laki enggau bini patut rinduka sereta bebasaka pangan diri. (Epesus 5:33) Sida patut ibuhka pangan diri ba pengawa seks enggau nyeliahka diri ari pengawa ke enda tetap ati. (1 Korint 7:3; Hebrew 13:4) Enti sida bisi anak, laki enggau bini bekerejsama ngemesaika anak sida.—Jaku-Dalam 6:20.

   Bup Kudus nadai madah enggau silik baka ni chara laki bini patut megai tanggung pengawa ba kereja sereta pengawa ba rumah. Sida ulih mutuska nama chara ke pemadu manah ke sida sebilik.

•   Tanggung pengawa laki. Bup Kudus madahka, “laki nyadi kepala bini.” (Epesus 5:23) Ketegal iya kepala diri sebilik, nyadi iya patut ngiring diri sebilik iya lalu ngaga pemutus ti mai penguntung ngagai bini enggau anak iya.

   Iya bebendar nentuka sida sebilik diintu enggau chara fizikal, emosi sereta rohani. (1 Timoti 5:8) Iya mandangka kualiti enggau pengelandik bini iya nya berega enggau chara iya sama gawa enggau bini sereta bebendar ngayanka pengibuh, runding sereta pengasai ati iya lebuh ngaga pemutus. (Jaku-Dalam 31:11, 28) Bup Kudus madahka laki enda tau enda bejalaika tanggung pengawa iya enggau pengerindu.—Kolosi 3:19.

•   Tanggung pengawa bini. Bup kudus madah “bini patut masa laki” (Epesus 5:33) Petara gaga ati maya bini bebasaka tanggung pengawa ke diberi Petara ngagai laki.

   Pengawa bini iya nya nulung laki iya, mantu laki ngambika iya ulih ngaga pemutus ti manah sereta nyukung pemutus iya. (Pemungkal 2:18) Bup kudus muji bini ke mujur ba tanggung pengawa sida—Jaku-Dalam 31:10.

 Enda. Suba, Petara kala ngasuh sekeda ke nyembah iya ngembuan anak. (Pemungkal 1:28; 9:1) Tang orang Kristian enda ibuh ngasika pesan tu. Jesus enda kala ngasuh orang Kristian ngembuan anak. Murid Jesus ba abad keterubah mega nadai kala madahka, orang ti udah kawin patut ngembuan anak. Laki bini ulih ngaga pemutus kediri empu sekalika sida deka ngembuan anak.

 Bup kudus ngembuan prinsip ke ulih nulung laki bini ngepunka pengawa tikah ke mujur. Prinsip ari bup kudus mega ulih nulung laki bini nyeliahka tauka ulih mutarka penanggul.

 Prinsip Bup Kudus ulih nulung laki bini . . .

•   ngayanka pengerindu ti bendar.—1 Korint 13:4-7; Kolosi 3:14.

•   mutarka runding ke bebida.—1 Korint 10:24.

•   nyadi peninga ti manah.—James 1:19.

•   ngayanka basa.—Rome 12:10.

•   sedia deka ngampun.—1 Peter 4:8.

•   ngayanka penetap ati.—Mark 10:9.

•   sabar.—Epesus 4:2, 3.

•   gawa siti tim.—Pengajar 4:9.

•   ngeringka kaul sida.—Pelandai Solomon 8:7.