Jakop nemu semina Jehovah aja ke patut disembah taja pan maya nya Jehovah bedau meri atur pasal nangkan orang Israel bekaul enggau engkeramba. (P-sut. 20:3-5) Nya alai, pengudah Jehovah ngasuh Jakop pulai baru ngagai Betel, Jakop lalu ngasuh semua orang ke enggau iya muai engkeramba sida. Jakop mega muai semua engkeramba nyengkaum antin ke engka dikena sida nyadika engkerabun. (P-kal. 35:1-4) Jehovah tentu gaga ati enggau pengawa ke digaga Jakop.

Kemayaharitu, baka ni kitai nunjukka semina Jehovah aja ke disembah kitai? Kitai nyeliah ari sebarang utai ke bekaul enggau engkeramba tauka pengawa bemanang. Tu nyengkaum muai semua utai ti bisi kaul enggau pengawa bemanang sereta beratika pemerindang kitai enggau bejimat. Ambika chunto, tanya diri empu: ‘Kati aku rindu macha bup tauka meda cherita antu kulir, zombi tauka utai ke bekaul enggau bala antu? Kati aku ngumbai pemerindang ke bisi kaul enggau magik, puchau, tauka sumpah nya enda ngachau?’ Kitai patut nyeliah ari sebarang utai ke dipegedika Jehovah.—Mas 97:10.

PEDA VIDEO “LABAN MEH SITAN,” LALU SAUT TANYA TU:

• Nama penusah ke ditapi seiku pemelajar Bup Kudus ke benama Palesa?

• Nama kebuah kitai patut ngiga tulung ari bala tuai gempuru enti kitai napi penanggul ke bekaul enggau pengawa bemanang?

• Enti kitai deka Jehovah nyaga kitai, nama utai ke enda tau enda dibuai kitai?

• Nama pemutus ti besai sereta lengkas ke digaga Palesa?

• Ba kandang kitai diau, nama sekeda chara kitai ulih nyeliahka diri ari dikachau bala melikat ti jai?