Gambarka nuan diau ba Galili maya jeman Jesus. Nuan datai ba Jerusalem ngambika ulih ngintu Pengerami Belangkau. Kuta nya penuh enggau menyadi bukai ke sama bela datai ari serata menua. Nuan deka meri pemeri ngagai Jehovah. Nya alai, enggau bebaika kambin, nuan berengkah bejalai nuju ngagai rumah sembiang nengah jalai mit ti penuh enggau orang. Lebuh nuan datai, rumah sembiang udah penuh enggau orang bukai ke deka meri pemeri tunu. Nyau kelama, nuan ba mua lalu sedia deka meri kambin nuan ngagai bala imam. Tang maya nya, nuan berunding pasal seiku menyadi ke enda nyamai ati enggau nuan lalu engka bisi ba dini-dini endur alai orang mayuh tauka ba kuta. Jesus nerangka nama patut digaga nuan. (Bacha Matthew 5:24.) Baka ni nuan enggau menyadi ke enda nyamai ati nya ngiga pemaik baka ke diasuh Jesus? Ba tiap iti kutak tu, tandaka saut ti betul.

NUAN PATUT . . .

• bejaku enggau menyadi nuan enti nuan ngasaika iya bisi kebuah ti manah enda nyamai ati

• nguji ngemetulka runding menyadi nuan enti nuan ngasaika iya udu ngambi ati tauka bisi mega ngaga salah

• ninga enggau sabar lebuh menyadi nuan madahka asai ati iya lalu taja pan nuan enda entu mereti, minta ampun laban iya enda nyamai ati tauka napi penusah ketegal ulah nuan

MENYADI NUAN PATUT . . .

• ngiga sukung ari orang bukai ba eklisia lalu madahka sida baka ni nuan udah ngemediska ati iya

• nganu nuan, madahka enggau silik penyalah nuan lalu minta nuan ngaku penyalah

• nemu nuan begunaka pemaruh ati tauka pemerani betemu enggau iya lalu deka ngampun nuan ari ati

Taja pan sembah kitai kemayaharitu enda agi begunaka pemeri ngena jelu, nama deka diajar Jesus pasal kaul entara bebaik enggau menyadi Kristian kitai sereta sembah ke diterima Petara?