Jehovah ngumbai semaya tikah nya amat berat. Iya madahka, laki bini patut begulai enggau pangan diri. (Mat. 19:5, 6) Bisi mayuh chunto tikah ti manah ba nembiak Petara. Taja pia, nadai tikah ti sempurna. Penanggul endang bisi. Kitai patut nulak runding ke ngumbai beserara enggau sarak nya chara mutarka penanggul entara laki bini. Baka ni orang Kristian ulih nyaga tikah sida?

Perundingka lima iti utai ti beguna tu.

1. Jaga ati nuan, nulak sebarang utai baka betundi enggau chara ti enda patut ngagai orang ke ukai kaling pengidup nuan sereta pemerindang ke bisi kaul enggau ulah seks ti kamah. Tu deka ngasuh kaul entara laki bini nyadi lemi.—Mat. 5:28; 2 Pet. 2:14.

2. Negapka kaul nuan enggau Petara. Kemansangka pengeran nuan ti deka ngelantangka ati Iya ba tikah nuan.—Mas. 97:10.

3. Terus neladan Jehovah ba runding sereta ulah nuan. Gaga pengawa ti ngayanka pengerindu sereta ngasuh pengidup kaling nuan berasai nyamai agi taja pan pengawa nya mit.—Kol. 3:8-10, 12-14.

4. Seruran berandau enggau chara ti bebasa.—Kol. 4:6.

5. Kereja tanggung pengawa nuan ngagai kaling pengidup enggau penuh penyayau sereta pengerindu.—1 Kor. 7:3, 4; 10:24.

Lebuh orang Kristian bebasaka tikah, sida bebasaka Jehovah ke ngepunka pengawa tikah.

PEDA VIDEO KITAI ENDA TAU ENDA “BELANDA ENGGAU ATI TI LIAT”—NITIHKA ATUR LUMBA, LALU SAUT TANYA TU:

• Taja pan pengawa tikah engka berengkah enggau chara ti manah, nama penanggul ke engka ulih nyadi?

• Baka ni prinsip Bup Kudus ulih nulung sida ke ngasaika tikah sida nadai pengerindu?

• Nama sekeda atur ti ditetapka Jehovah pasal tikah?

• Nama utai ti patut digaga laki bini ngambika tikah seduai iya ulih mujur?