Nama kebuah kitai amat rinduka konvensyen ninting taun? Baka orang Israel kelia, konvensyen kitai kemayaharitu meri kitai peluang begulai nyembah Jehovah enggau beratus, indah beribu iku bala menyadi Kristian kitai. Kitai rinduka semua penerang ti nulung kitai mengkang semak enggau Jehovah. Kitai mega beterima kasihka peluang ti spesial alai kitai ulih begulai enggau kaban sereta diri sebilik. Nya alai, kitai deka datai ngagai semua tiga hari konvensyen tu.

Lebuh kitai bisi peluang begulai enggau bala menyadi, kitai ukai semina berundingka utai ti tau diulih kitai, tang mega chara kitai ulih ngayanka pengerindu ngagai orang bukai. (Gal. 6:10; Heb. 10:24, 25) Lebuh kitai muka pintu ke bala menyadi kitai tauka ngambi alai duduk ke semina diguna kitai aja, kitai nunjukka diri ngenuluka orang bukai. (Plp. 2:3, 4) Konvensyen mega meri kitai peluang ngiga kaban ti baru. Sebedau enggau pengudah program konvensyen sereta lebuh ngetu makai tengah hari, kitai ulih ngena peluang nya alai bekelala enggau orang ke enda dikelala kitai. (2 Kor. 6:13) Kitai engka ulih tetemuka kaban ti meruan belama iya! Keberat agi, lebuh orang bukai meda kitai ngayanka pengerindu ti bendar, sida engka deka sama enggau kitai nyembah Jehovah.—Jhn. 13:35.

PEDA VIDEO “PENGERINDU ENDA NEMU ABIS”! KONVENSYEN ENTARABANSA, LALU SAUT TANYA TU:

• Baka ni pengerindu diayanka ngagai bala menyadi ke datai ari menua bukai ba konvensyen entarabansa taun 2019?

• Nama kebuah penyerakup enggau pengerindu entara nembiak Jehovah amat ngalitka ati?

• Nama sekeda poin ke bekaul enggau pengerindu orang Kristian ti disebut bala menyadi ba Raban ti Ngiring?

• Baka ni pengerindu Kristian nyerakupka bala menyadi kitai ba Jerman enggau ba Korea Selatan?

• Nama patut digaga kitai?