Kitai ulih ngena pengering enggau manah enti kitai bisi juluk ati gawa ke Jehovah. (1Ko 9:26) Juluk ati nulung kitai ngena awak enggau manah sebedau pengujung datai. (Eps 5:15, 16) Lebuh belajarka Bup Kudus enggau diri sebilik, ulih kita berandauka juluk ati ba taun nginjil ti baru? Kena nulung nuan, bup kereja tu bisi sekeda artikel pasal juluk ati ke ulih dijapai nuan. Nuan ulih berunding sereta besampika juluk ati nya.—Jas 1:5.

Ambika chunto, kati kita sebilik ulih bekerejasama nulung seiku ari kita nyadi pengerintis biasa? Enti nuan irau enda ulih nyapai jam ti ditetapka, berandau meh enggau pengerintis bukai ke napi utai ti sama baka nuan. (Jlam 15:22) Nuan ulih interbiu seiku pengerintis maya kita belajarka Bup Kudus ba diri sebilik. Gaga meh jadual. Enti nuan kala ngerintis sebedau tu, kati situasi nuan diatu ngemendarka nuan ngerintis baru?

Kati seiku ari kita sebilik ulih nyadi pengerintis sukung pengelama sebulan tauka lebih? Enti nuan enda entu bepengering, nuan agi ulih nyadi pengerintis sukung. Engka nuan ulih nginjil enda lama ninting hari. Enti nuan tusah deka nginjil ba tengan minggu ketegal nuan gawa penuh jam tauka besekula, nuan ulih nyadi pengerintis ba bulan ke bisi chuti tauka bisi lima kali ujung minggu. Tulis meh kemaya nuan deka nyadi pengerintis sukung ba kalendar, sereta gaga jadual.—Jlam 21:5.

PEDA VIDEO MENGKANG BERANI—PENGERINTIS, LALU SAUT TANYA TU:

• Nama ulih dipelajarka kitai ari pengalaman Menyadi Aamand pasal chara Jehovah nyaga sida ke sanggup ngelengkaka utai ngambika ulih ngerintis?