Brosur Sapa Orang Ti Ngereja Peneka Jehovah Kemaya Hari Tu? digaga kena berandau enggau pelajar Bup Kudus ba pun tauka pengudah tiap iti sesi belajar. * Pelajar 1 ngagai 4 ngasuh pelajar ngelala kitai, Pelajar 5 ngagai 14 nulung sida nemu pasal pengawa kitai, lalu Pelajar 15 ngagai 28 ngayanka sida pengawa ke digaga gerempung kitai. Kesuah agi, manah enti berandau nitihka tusun pelajar. Tang enti siti-siti pelajar beguna ba pelajar Bup Kudus maya nya, ulih berandauka pelajar nya. Tiap iti pelajar semina siti lambar lalu ulih dikerandauka enggau pelajar Bup Kudus pengelama lima ngagai sepuluh minit.

• Peratika tanya, iya nya tajuk pelajar

• Bacha utai ke dipelajar nya sama-sama, sekalika bacha semua sekali tauka nitihka begian

• Berandauka utai ke baru dibacha. Kena tanya ba begian baruh lambar sereta gambar. Bacha lalu berandauka ayat Bup Kudus nitihka utai ke diguna pelajar. Padahka tajuk mit ke ulih meri saut ngagai tajuk pelajar nya

• Enti bisi kutak “Deka Nemu Mayuh”, bacha sama-sama lalu peransang pelajar nuan nitihka chara ti dipandangka