Orang Kristian kemayaharitu enda agi nitihka Adat Moses. Taja pia, Jehovah deka kitai nitihka dua iti pesan ti pemadu besai ari Adat nya—rinduka Petara enggau orang bukai. (Mat. 22:37-39) Pengerindu nya ukai kualiti ti dikembuan ari ada. Iya patut dikemansangka. Baka ni chara iya? Siti chara ti pemadu beguna iya nya, macha Bup Kudus ninting hari. Lebuh kitai belematika bemacham kualiti Petara ari Bup Kudus, kitai meda ‘pemadas Jehovah.’ (Mas. 27:4) Asil iya, pengerindu kitai ke Iya deka majak nambah lalu kitai deka ngembuan runding baka Iya. Tu meransang kitai ngasika pesan Petara, ke nyengkaum pesan nunjukka pengerindu ti enda berundingka diri empu ngagai orang bukai. (Jhn. 13:34, 35; 1 Jhn. 5:3) Bisi tiga iti chara kena nulung kitai rindu agi macha Bup Kudus:

• Gambarka utai ke dibacha lalu kena deria nuan. Uji ngambarka nuan ba dia. Nama ulih dipeda, didinga enggau disium nuan? Baka ni asai ati orang ba dia?

• Kena bemacham chara. Chunto iya: Bacha enggau inggar, tauka titih lebuh ninga audio ke dirikut. Ari ke macha nitihka tusun, bacha pasal orang ke ditusui ba Bup Kudus tauka bacha nitihka topik. Ambika chunto, kena Bahagian 4 tauka 16 ari bup mit Panduan Pembelajaran Firman Tuhan lebuh macha pasal Jesus. Bacha semua ayat ba bagi ke diambi ari ayat ninting hari. Bacha Bup Kudus nitihka ripih iya ditulis.

• Bacha ngambika ulih mereti. Macha siti bagi ninting hari manah agi ari macha mayuh bagi enti kitai ulih mereti utai ke dibacha lalu belematika nya. Perundingka dini enggau kemaya utai nya nyadi. Peratika penerang enggau silik. Kena kar enggau penerang leka jaku ba lambar belakang Bup Kudus. Pansik utai ti enda ditemu nuan. Enti ulih, kena awak ti sama bela lebuh belemati sereta macha Bup Kudus.