Pengerami Paska ti penudi ke diintu Jesus amat besai reti. Enda lama agi, iya deka mati. Ketegal nya iya deka makai ba Pengerami Paska enggau bala rasul iya. Lalu iya deka ngepunka pengawa Makai Malam Tuan ke deka diintu ninting taun. Nya alai, iya nganjung Peter seduai John ngambika ulih nyediaka bilik nya. (Luk. 22:7-13; peda gambar ba mua.) Tu ngingatka kitai pasal pengawa nyediaka diri ke pengawa Ngingatka Pemati Jesus kena 27 Mac. Eklisia engka udah ngaga atur pasal pencheramah, roti enggau wain, sereta utai bukai. Taja pia, nama ulih digaga tiap iku kitai kena nyediaka diri ke pengawa tu?

[Gambar ba lambar 5]

Sediaka ati nuan. Bacha lalu belematika ayat Bup Kudus ke ditetapka ba minggu kena Ngingatka Pemati Jesus. Jadual nya bisi ba Meresa Ayat Bup Kudus Ninting Hari. Lampiran B12 ba Bup Kudus Salin Dunya Baru dalam jaku Melayu bisi jadual ti silik agi. (Peda mega Bup Kereja Kena Gempuru Pengidup enggau Pengawa Kristian Kitai kena April 2020.) Siti-siti ruang bilik ulih meda Indeks Publikasi dalam jaku Indonesia tauka Bup Dikena Saksi-Saksi Jehovah Ngiga Pansik, kena ngiga penerang pasal pemesai reti tebus. Utai tu ulih dikena sida ba pengawa belajarka Bup Kudus ba diri sebilik.

Bai orang bukai sama enggau. Bebendar meh enggau kimpin nyadung surat mai datai. Perundingka orang ke ulih dibai nuan baka datai ngabas, pemelajar Bup Kudus suba, orang ke dikelala sereta kaban belayan. Bala tuai gempuru patut nentuka sida ke enda aktif mega dibai. Kingatka meh, enti bisi orang ke enda diau ba kandang endur nuan, nuan ulih ngiga jam sereta endur pengawa nya ke diatur semak endur iya diau. Nuan ulih ngagai laman web jw.org lalu klik PASAL KAMI ba begian atas laman web nya lalu pilih “Ngingatka Pemati Jesus.”