Bencana alam majak nyadi kemayaharitu. Lebuh bencana alam ninggang, pengawa meri bantu patut diatur enggau manah sereta patut dikereja enggau chara ti teratur. Ketegal nya, Raban ti Ngiring udah ngatur ngambika Opis Tulung Bencana Alam ditumbuhka ba tiap iti pampang opis.

Lebuh bala menyadi Kristian ba begian nya nemu bisi bencana alam nyadi, sida enggau jampat ngiga bala tuai gempuru ba endur nya ngambika ulih nemu utai ke diguna bala penginjil. Enti pengerusak ke nyadi nya amat balat nyentukka bala penginjil ba dia enda ulih ngatur kediri empu, pampang opis deka nganjung beberapa iku bala menyadi ti tau dikearap kena ngulu pengawa meri bantu. Bala menyadi tu engka deka minta bala menyadi ke bukai nyadi sukarela tauka meri utai ke dipinta, tauka sida engka deka meli tauka nyadung utai ke diguna ngagai bala menyadi ba endur nya.

Bisi mayuh penguntung lebuh pekara tu dikemataka enggau chara ti baka tu. Ambika chunto, nya ulih nyeliahka pengawa ti enda penting, saruk penemu, tauka masau duit sereta utai ke diguna enti bala menyadi enda ngereja pengawa nitihka atur diri empu.

Bala menyadi ke dipilih pampang opis tu ulih nentuka penyampau duit sereta pemayuh sukarela ke diguna kena ngereja pengawa meri bantu. Sida mega ulih bekelala enggau bala pegawai ba endur nya, laban kesuah iya bala pegawai tu ulih nulung kitai ngereja pengawa meri bantu enggau jampat agi. Nya alai, sesiku orang enda patut ngumpul duit pemeri, nganjung utai ke diguna, tauka ngabas endur ke ditinggang bencana alam enti sida enda diasuh ngereja nya.

Tang lebuh bencana alam nyadi, kitai deka nulung. (Heb 13:16) Kitai rinduka bala menyadi Kristian kitai! Nama ulih dikereja kitai? Utai ti pemadu penting nya, kitai ulih besampika mansa bencana alam sereta sida ke ngereja pengawa meri bantu. Kitai mega ulih meri duit pemeri ngagai pengawa sedunya. Ba baruh iring Raban ti Ngiring, pampang opis deka nemu enggau manah agi dini alai ti amat begunaka duit pemeri nya. Lalu enti kitai deka enggau pengawa meri bantu nya, kitai ulih ngisi pom Local Design/Construction Volunteer Application (DC-50).

PEDA VIDEO BAH TI AMAT BALAT BA BRAZIL, LALU SAUT TANYA TU:

Nama utai ti ngalitka ati nuan pasal pengawa meri bantu ke dikereja Saksi-Saksi Jehovah pengudah bah nyadi ba Brazil kena taun 2020?