Kena ngelantangka ati Jehovah, pemelajar Bup Kudus patut ngemansangka pengarap sida ke Iya. (Heb 11:6) Kitai ulih nyapai ati sida ngena bup Idup enggau Lantang Belama Iya! Bup tu bisi ayat kunci, penerang ti nyemetak, tanya ti manah, gambar ti lawa, sereta video ke bisi kaul enggau utai ke dipelajar. Enti kitai nulung pemelajar Bup Kudus ngemansangka sifat Kristian sereta ngembuan kaul enggau Jehovah, sida ulih tan napi sebarang penguji.—1Ko 3:12-15.

Sekeda orang tusah ngambarka diri ulih nyadi kaban Petara ketegal sida enda ulih meda Iya. Nya alai kitai mesti nulung sida ngemansangka pengarap ba sifat Jehovah ti bepengerindu.

PEDA VIDEO NGERINGKA PENGARAP BA JEHOVAH NGENA “IDUP ENGGAU LANTANG BELAMA IYA!” LALU SAUT TANYA TU:

• Baka ni kitai nemu menyadi indu nya besedia sebedau ngajar?

• Baka ni iya nulung pemelajar Bup Kudus madahka asai ati pasal Isaiah 41:10, 13 ngena tanya ke bukai?

• Nama asil ke diulih pemelajar ari video enggau ayat Bup Kudus dalam bup nya?

Mayuh orang enda meretika pasal tebus, tauka sida ngumbai nya ukai pemeri ari Petara ngagai sida. (Gal 2:20) Nya alai, kitai patut nulung sida ngemansangka pengarap ba tebus Jesus.

PEDA VIDEO NGERINGKA PENGARAP BA JESUS NGENA “IDUP ENGGAU LANTANG BELAMA IYA!” LALU SAUT TANYA TU:

• Baka ni kitai nemu menyadi lelaki nya besedia sebedau ngajar?

• Baka ni iya ngena begian “Aram Belajar” kena nulung pemelajar Bup Kudus?

• Nama kebuah sampi amat penting ba pemelajar Bup Kudus kitai?