Enda lama agi, penyabar Jehovah ngagai dunya tu deka abis. Pengarap ti pelesu deka dirusakka, siti raban menua ti begempung deka nyerang nembiak Petara, lalu Jehovah deka ngerusakka orang ti jai ba Amargedon. Orang Kristian enda sabar nganti penatai maya ti penting sereta ngalitka ati tu.

Endang amat, kitai enda nemu semua utai pasal Penusah ti Besai. Ambika chunto, kitai enda nemu enggau nyemetak ni maya iya deka berengkah. Kitai enda nemu nama tegal ke deka dikena gerempung politik ngambika nyerang pengarap. Kitai enda nemu ni pengelama raban menua ti begempung deka nyerang nembiak Petara, tauka nama deka nyadi lebuh kitai diserang. Kitai mega enda nemu enggau nyemetak pasal nama utai ke deka dikena Jehovah ngerusakka orang ti jai ba Armagedon.

Taja pia, Bup Kudus meri kitai semua penerang ke diguna ngambika kitai ulih ngayanka pengandal sereta pemerani ngagai utai ti deka nyadi jemah ila. Ambika chunto, kitai nemu diri benung idup ba pengujung “hari ti penudi.” (2Ti 3:1) Kitai nemu serang ngagai pengarap “deka dikurangka” ngambika pengarap ti bendar enda dirusakka. (Mat 24:22) Kitai nemu Jehovah deka nyelamatka nembiak Iya. (2Pe 2:9) Lalu, kitai mega nemu Orang Siku ke udah dipilih Jehovah kena ngerusakka orang ti jai sereta nyelamatka “seraban orang ti mayuh” ba Armagedon nya lurus sereta bekuasa.—Pem 19:11, 15, 16.

Utai ti deka nyadi jemah ila tentu deka ngasuh orang “luput laban takut.” Taja pia, lebuh kitai macha sereta belematika chara Jehovah nyelamatka nembiak Iya suba enggau utai ti udah dipadah Iya pasal jemah ila, kitai ulih ‘bediri rurus lalu ngangkatka pala kitai,’ sereta andal pengelepas kitai nyau semak.—Luk 21:26, 28.