Kitai amat gaga ati deka ngena brosur enggau bup ti baru kena ngajar pemelajar kitai! Kitai besampi minta Jehovah merekatka pengawa kitai, ngambika ulih ngaga mayuh agi orang nyadi murid. (Mat. 28:18-20; 1 Kor. 3:6-9) Baka ni kitai ngena perengka baru tu?

Ketegal Idup enggau Lantang Belama Iya! ngena chara ngajar ti baru, titihka iring tu lebuh nuan nyediaka diri sereta ngiring pengawa belajarka Bup Kudus. *

• Bacha dulu utai ke deka dipelajar, lalu kerandauka tanya

• Bacha ayat Bup Kudus ke bisi tanda “Bacha”, lalu tulung pemelajar Bup Kudus meretika chara ngena utai ke dipelajar

• Mainka sereta kerandauka video ke ditepu ngena tanya ti udah disediaka

• Uji tembuka tiap iti pelajar tiap kali belajar

Maya nginjil, beri brosur dulu ngambika kitai ulih nemu sekalika iya minat tauka enda. (Peda kutak “ Chara Nyadung Brosur Idup enggau Lantang Belama Iya! maya Keterubah Datai.”) Enti pemelajar Bup Kudus nuan agi ka belajar pengudah nuan abis belajarka brosur tu enggau iya, beri bup Idup enggau Lantang Belama Iya! lalu berengkah ari Pelajar 04. Enti nuan benung ngajar pemelajar nuan ngena bup Ajar Kitai tauka bup Meruan dalam Pengerindu Petara, nuan ulih mindah ngagai bup Idup enggau Lantang Belama Iya! lalu tentuka dini endur seduai patut berengkah.

PEDA VIDEO SELAMAT DATAI NGAGAI PENGAWA BELAJARKA BUP KUDUS NUAN, LALU SAUT TANYA TU:

• Nama utai ti deka dipelajarka pemelajar ari bup baru tu?

• Nama kebuah nuan patut ngayanka video tu ngagai pemelajar ke agi baru?

• Nama juluk ati ke patut ditetapka sereta dijapai pemelajar?—Peda carta “ Tuju sereta Uji Tu ke Tiap Iti Begian”