Bansa Israel ti Kesatu 10:1-14
-
Pemati Saul enggau anak lelaki iya (1-14)
10 Orang Pilistin beperang ngelaban orang Israel, lalu orang Israel ngerarika diri ari orang Pilistin. Mayuh amat orang Israel mati ba Gunung Gilboa.
2 Orang Pilistin majak begagaika Saul enggau anak iya, lalu sida munuh anak Saul, iya nya Jonatan, Abinadap, enggau Malki-sua.
3 Perang nya majak tusah ba Saul. Pengujung iya, orang ke nimbakka anak panah tetemuka Saul, lalu iya bakal laban kena anak panah sida.
4 Nya alai, Saul bejaku ngagai soldadu ke mai senyata iya: “Sintak pedang nuan lalu rejang aku ngena pedang nya, ngambika aku enda diperinsa orang ke enda besunat nya.” Tang, soldadu nya enggai ngereja nya laban iya balat takut. Nya alai, Saul ngambi pedang nya lalu ngerejang diri empu.*
5 Lebuh soldadu nya meda Saul udah mati, iya mega ngerejang diri ngena* pedang iya empu, lalu mati sama enggau Saul.
6 Saul enggau tiga iku anak lelaki iya bela mati. Semua orang ke ba ruang bilik iya mega mati magang.
7 Lebuh semua orang Israel ba kawasan lebak meda semua orang udah ngerarika diri, lalu Saul enggau anak lelaki iya udah mati, sida pan ninggalka kuta sida lalu ngerarika diri. Udah nya, orang Pilistin datai lalu diau ba dia.
8 Hari siti, lebuh orang Pilistin datai ngambi utai ari bangkai orang ke udah mati, sida tetemuka bangkai Saul enggau anak lelaki iya ba Gunung Gilboa.
9 Nya alai, sida ngambi utai ke bisi ba bangkai Saul. Sida mumpung pala Saul lalu ngambi pala iya enggau baju perang* iya. Udah nya, sida nganjung orang ke mai pesan ngagai serata menua Pilistin kena madahka berita nya ngagai patung sida. Sida mega madahka berita nya ngagai semua rayat.
10 Udah nya, sida ngengkahka baju perang Saul ba kuil petara sida, lalu ngantung tengkorak iya ba kuil Dagon.
11 Lebuh semua orang Jabes ba Gilead ninga semua utai ke udah digaga orang Pilistin ngagai Saul,
12 bala pahlawan sida mupuk ngambi bangkai Saul enggau bangkai bala anak lelaki iya. Sida mai bangkai nya ngagai Jabes lalu nguburka tulang sida ba baruh pun kayu ti besai ba Jabes, lalu sida bepuasa pengelama tujuh hari.
13 Baka nya meh Saul mati laban iya enda setia ngagai Jehovah. Iya enda nitihka jaku Jehovah lalu iya udah minta iring ari manang,
14 ukai ari Jehovah. Nya alai, Petara munuh iya lalu nyerahka kuasa iya ke nyadi raja ngagai David anak Jesi.
Nota Kaki
^ Tauka “ngerebahka diri ba atas pedang nya.”
^ Tauka “ngerebahka diri ba atas.”
^ Tauka “senyata.”
