Bansa Israel ti Kesatu 11:1-47
11 Pengudah sesiti timpuh, semua orang Israel datai ngagai David ba Hebron lalu madahka: “Kami tu darah getah nuan.*
2 Suba, lebuh Saul agi nyadi raja, nuan meh ke ngulu orang Israel beperang. Jehovah, Petara nuan, bisi madah ngagai nuan: ‘Baka siku pengibun bedus, nuan deka ngibun bala nembiak Aku, Israel, lalu nuan deka nyadi tuai atas nembiak Aku, orang Israel.’”
3 Nya alai, semua tuai orang Israel datai ngagai raja ba Hebron, lalu David ngaga siti sempekat enggau sida ba depan Jehovah. Udah nya, sida nata David nyadi raja Israel nitihka utai ke udah dipadah Jehovah nengah Samuel.
4 Udah nya, David enggau semua orang Israel mupuk ngagai Jerusalem, iya nya Jebus, endur alai orang Jebus diau.
5 Orang Jebus ngeleseka David: “Nadai nuan ulih datai kitu!” Tang David nguasa kubu Sion, lalu diatu, nya dikumbai Kuta David.
6 Nya alai, David madah: “Orang keterubah ke nyerang orang Jebus deka nyadi ketuai soldadu aku.” Joap anak Seruyah meh orang keterubah nyerang orang Jebus. Nya alai, iya dilantik nyadi ketuai soldadu David.
7 Udah nya, David diau ba kubu nya. Nya kebuah kubu nya diberi nama Kuta David.
8 Iya berengkah ngaga bengunan enggau dinding ba Bukit* sereta ba endur ke ngelingi kuta nya. Lalu Joap nulung nirika baru begian ke bukai ba kuta nya.
9 David pan nyadi majak bekuasa, lalu Jehovah, ketuai soldadu serega, bisi enggau iya.
10 Bala tuai pahlawan David ti pemadu kering sereta orang Israel ke bukai nyukung perintah David. Sida mega nulung iya nyadi raja, baka ke disemayaka Jehovah ngagai orang Israel.
11 Tu nama bala pahlawan David ti pemadu kering: Jasobim anak Hakmoni. Iya siku ari tiga iku pahlawan David ti pemadu kering, lalu iya ketuai sida. Bisi sekali, iya munuh 300 iku orang ngena sangkuh iya.
12 Siku da agi pahlawan ti pemadu kering benama Eleasar anak Dodo. Iya orang Ahohi.
13 Iya bisi enggau David ba Pas-damim, iya nya endur alai orang Pilistin begempuru deka beperang. Ba dia, bisi ladang ke penuh enggau barli. Maya nya, soldadu Israel rari ari orang Pilistin,
14 tang Eleaser bediri ba tengah ladang laban deka ngetanka ladang nya. Iya majak belaban enggau orang Pilistin. Nya alai, Jehovah ngasuh orang Israel menang besai.*
15 Bisi 3 iku ari 30 iku bala tuai mansang ngagai gunung batu, iya nya ngagai David ba gua ba Adulam. Maya nya, bala soldadu orang Pilistin nirika kem ba Lebak Repaim,
16 lalu seraban soldadu sida bejaga ba Betlehem. David benung belalai ba siti endur.
17 Udah nya, David madahka asai ati diri: “Naka meh pemanah enti aku ulih ngirup ai ari telaga ke semak pintu penama Betlehem!”
18 Pengudah ninga nya, tiga iku pahlawan David pan ngenyit tama lalu nyerang kem orang Pilistin. Sida ngauk ai ari telaga ke semak pintu penama Betlehem, lalu mai ai nya ngagai David. Tang David enggai ngirup ai nya, lalu iya nuangka ai nya ke tanah ke Jehovah.
19 Ku David madahka: “Enda patut aku ka ngirup ai tu, laban aku nangika Petara. Sida udah berambunka nyawa sida kena ngulihka ai tu. Enti aku ngirup ai tu, tu baka ke ngirup darah sida.” Nya meh kebuah David enggai ngirup ai nya. Nya meh utai ke udah dikereja tiga iku pahlawan David ti pemadu kering.
20 Bisi siti da agi raban ke bisi tiga iku pahlawan David ti kering. Siku ari sida nya Abisai, iya nya abang Joap. Iya ketuai dalam raban nya. Iya kala munuh 300 iku orang ngena sangkuh iya, lalu iya tebilang baka tiga iku pahlawan ti pemadu kering nya.
21 Iya ke pemadu landik dalam raban iya sereta nyadi ketuai dalam raban nya, tang iya enda bulih penuduk ti sama baka tiga iku pahlawan ti pemadu kering nya.
22 Bisi siku lelaki ti berani ke benama Benayah anak Jehoyada. Iya berani ngereja mayuh utai ba Kabsel. Iya munuh dua iku anak lelaki Ariel ari Moap. Bisi sekali, maya bisi seleju, iya nurun ngagai lubang ai lalu munuh siku singa.
23 Iya mega munuh siku lelaki Ejip ke besai tubuh ari tubuh orang biasa. Peninggi orang nya lebih ari dua meter.* Taja pan orang Ejip nya bisi megai sangkuh ke ngemesai kayu ba perengka ke dikena betenun, Benayah nyerang orang Ejip nya ngena batang kayu, ngerampas sangkuh iya lalu munuh iya ngena sangkuh nya.
24 Nya meh utai ke digaga Benayah anak Jehoyada, lalu iya tebilang baka tiga iku pahlawan ti pemadu kering nya.
25 Taja pan iya landik agi ari 30 iku pahlawan ke bukai, tang iya enda bulih penuduk ti sama baka 3 iku pahlawan ti pemadu kering nya. Taja pia, David ngelantik Benayah nyadi jejaga iya.
26 Tu bala pahlawan ti pemadu kering nya: Asahel, iya nya adik Joap; Elhanan anak Dodo ari Betlehem;
27 Samot, orang Harot; Heles, orang Pelon;
28 Ira anak Ikes, orang Tekoa; Abi-eser, orang Anatot;
29 Sibikai, orang Husah; Ilai, orang Ahohi;
30 Maharai, orang Netopah; Helep anak Banah, orang Netopah;
31 Itai anak Ribai ari Gibeah, ke ba kawasan orang Benjamin; Benayah, orang Piraton;
32 Hurai ari wadi* Gaas; Abiel, orang Arabah;
33 Asmabet, orang Bahurim; Eliaba, orang Saalboni;
34 bala anak Hasem, orang Gison; Jonatan anak Sagi, orang Harari;
35 Ahiam anak Sakar, orang Harari; Elipal anak Ur;
36 Heper, orang Mekerah; Ahijah, orang Pelon;
37 Hesro, orang Karmel; Narai anak Esbai;
38 Joel, menyadi Natan; Mibar anak Hagri;
39 Selek, orang Amon; Naharai, orang Berot, orang ke mai senyata Joap anak Seruyah;
40 Ira, orang Itri; Garep, orang Itri;
41 Uriah, orang Het; Zabat anak Ahlai;
42 Adina anak Sisa, orang Reuben, tuai ke ngiring 30 iku orang;
43 Hanan anak Maakah; Josapat, orang Mitni;
44 Usia, orang Astarot; Shama enggau Jiel, bala anak Hotam, orang Aroer;
45 Jediael anak Simri, enggau menyadi lelaki iya Joha, orang Tizi;
46 Eliel, orang Mahabah; Jeribai enggau Josabiah, bala anak Elnam; Itmah, orang Moap;
47 Eliel, Obet, enggau Jaasiel, orang Mezobaya.
Nota Kaki
^ Tauka “Kami bisi pertalian darah enggau nuan.”
^ Jaku Hebrew, mil·lohʼ′ ke mai reti “tugung tanah.”
^ Tauka “Jehovah nyelamatka orang Israel.”
^ Jaku Asal, “5 kiubit.” Peda Rujukan B14.
^ Peda Penerang Leka Jaku.
