Bansa Israel ti Kesatu 12:1-40
-
Bala ke nyukung perintah David (1-40)
12 Lebuh David ngerarika diri ari Saul anak Kish, mayuh orang betemu enggau iya ba Siklak. Sida nya bala pahlawan iya ti kering ke deka nulung iya maya beperang.
2 Sida besenyataka panah, lalu sida amat landik ngena jari kiba enggau jari kanan nikauka batu ngena pangwang* tauka nimbakka anak panah. Sida nya kaban belayan Saul ari raban bansa Benjamin.
3 Tuai sida nya Ahieser enggau Joas (seduai iya anak lelaki Semah, orang Gibeah); Jesil enggau Pelet, anak lelaki Asmabet; Berakah; Jehu, orang Anatot;
4 Ismayah orang Gibeon, siku ari 30 iku pahlawan ti kering, lalu iya mega tuai sida; Jeremiah; Jahasiel; Johanan; Josabat, orang Gederah;
5 Elusai; Jerimot; Bealiah; Semariah; Sepatiah, orang Harip;
6 Elkanah, Issiah, Azarel, Joeser, enggau Jasobim, orang Korah;
7 sereta Joelah enggau Sebadiah, iya nya anak lelaki Jeroham ari Gedor.
8 Sekeda orang Gat nitihka David ngagai menua puang, iya nya endur alai iya belalai. Sida nya bala pahlawan ti kering, soldadu ti landik beperang, sereta landik ngena sangkuh enggau terabai ti besai. Gamal sida baka singa, lalu sida laju baka kijang ba gunung.
9 Eser nya tuai sida, kedua Obadiah, ketiga Eliap,
10 keempat Mismanah, kelima Jeremiah,
11 keenam Atai, ketujuh Eliel,
12 kelapan Johanan, kesemilan Elsabat,
13 ke-10 Jeremiah, lalu ke-11 Makbanai.
14 Semua sida nya tuai soldadu ari raban bansa Gat. Ari bala sida, ke pemadu lemi ulih ngalahka 100 iku orang lalu ke pemadu kering ulih ngalahka 1,000 iku orang.
15 Sida meh ke meraka Sungai Jordan ba bulan ti keterubah maya ai ngampuhka tebing sungai nya. Sida muru semua orang ke diau ba tanah ti rata tunga ke timur enggau barat.
16 Sekeda ari raban bansa Benjamin enggau raban bansa Judah mega datai ngiga David ba endur alai iya belalai.
17 David betemu enggau sida lalu madah: “Enti kita datai betemu enggau aku bisi tuju ati ti manah lalu deka nulung aku, kitai ulih begempung. Tang, enti kita bisi ati deka nikam aku ari belakang, lalu nyerahka aku ngagai munsuh taja pan aku nadai ngereja utai ti jai, awakka Petara aki ini kita meda pengawa kita lalu ngakim kita.”
18 Udah nya, kuasa kudus* Petara nurun ngagai Amasai, iya nya ketuai atas 30 iku pahlawan. Ku iya nyaut:
“Kami tu enggi nuan, David, lalu kami nitihka nuan, anak Jesi.
Awakka nuan idup lantang, lalu awakka orang ke nulung nuan mega idup lantang,Laban Petara nuan nulung nuan.”
Nya alai, David ngelaluka sida lalu ngelantik sida nyadi tuai bala soldadu iya.
19 Sekeda ari raban bansa Manasi mega nitihka David lebuh iya enggau orang Pilistin ngelaban Saul. Tang udah nya, David enda nyadi nulung sida laban pengudah bala pemerintah orang Pilistin berandau, sida ngasuh David pulai. Sida madah: “Iya deka nitihka tuan iya Saul, lalu munuh kitai.”
20 Lebuh David ngagai Siklak, tu meh sida ke ari raban bansa Manasi ke nitihka David: Adnah, Josabat, Jediael, Mikael, Josabat, Elihu, enggau Siletai. Semua sida tuai ari raban Manasi, lalu tiap iku sida nyadi tuai atas 1,000 iku orang.
21 Sida nulung David ngelaban bala perumpak laban sida kering sereta berani. Sida mega nyadi tuai bala soldadu.
22 Ninting hari, sigi bisi orang deka datai nitihka David, lalu nulung iya nyentukka pemayuh bala soldadu David nyau mayuh baka bala soldadu Petara.
23 Baka ke udah dipadahka Jehovah, sekeda bala soldadu ke besenyata datai ngagai Hebron, deka nyukung David nyadi raja nganti Saul. Tu penyampau sida:
24 Ari raban bansa Judah bisi 6,800 iku orang ke mai terabai ti besai enggau sangkuh. Sida sedia deka beperang.
25 Ari raban bansa Simion bisi 7,100 iku soldadu ti kering sereta berani.
26 Ari raban bansa Lewi bisi 4,600 iku.
27 Jehoyada nyadi tuai atas 3,700 iku orang ari peturun Aron,
28 nyengkaum Sadok, siku lelaki ti biak ke kering sereta berani, enggau 22 iku bala tuai ari suku iya.
29 Ari raban bansa Benjamin, iya nya kaban belayan Saul bisi 3,000 iku. Suba mayuh ari sida setia ngagai Saul enggau ruang bilik iya.
30 Ari raban bansa Efraim bisi 20,800 iku orang ti kering, berani, sereta tebilang dalam suku sida.
31 Ari setengah ari raban bansa Manasi bisi 18,000 iku ke udah dipilih, lalu sida datai dekaka David nyadi raja.
32 Ari raban bansa Isakar bisi 200 iku bala tuai. Sida landik nentuka utai ke patut digaga orang Israel ba maya ti ngena. Semua bala sida nitihka semua utai ke dipadah sida.
33 Ari raban bansa Sebulun bisi 50,000 iku orang ke ulih nyadi soldadu. Sida sedia deka beperang lalu bisi mayuh macham senyata. Sida amat setia nitihka David.
34 Ari raban bansa Naptali bisi 1,000 iku tuai sereta 37,000 iku orang ke enggau sida. Orang ke enggau sida nya bisi terabai ti besai enggau sangkuh.
35 Ari raban bansa Dan bisi 28,600 iku orang ke sedia enggau beperang.
36 Ari raban bansa Aser bisi 40,000 iku orang ke ulih nyadi soldadu, lalu sida sedia deka beperang.
37 Ari raban bansa ke diau ba seberai sungai Jordan, iya nya raban bansa Reuben, raban bansa Gat enggau setengah ari raban bansa Manasi, bisi 120,000 iku soldadu ke bisi mayuh macham senyata.
38 Semua sida nya soldadu ke sedia deka beperang. Enggau pengabis ati sida mupuk ngagai Hebron dekaka David nyadi raja Israel. Semua orang Israel ke bukai mega seati dekaka David nyadi raja.
39 Pengelama tiga hari, sida diau ba din begulai enggau David. Sida makai enggau ngirup utai ke udah disediaka bala sida.
40 Enda ngira orang ke diau semak enggau sida, tauka sida ke diau jauh baka ba kawasan Isakar, Sebulun enggau Naptali, semua sida mai pemakai ngena keldai, unta, baghal,* enggau sapi. Sida nyediaka mayuh tepung, kuih buah ara enggau kuih kismis, wain, minyak, sapi, enggau bedus. Baka nya meh serata menua Israel rami gaga ati.
Nota Kaki
^ Senyata ke betali ti dikena nikauka batu.
^ Peda Penerang Leka Jaku.
^ Merujuk ngagai anak ke ada ari keledai lelaki enggau kuda indu.
