Bansa Israel ti Kesatu 13:1-14
13 David berandau enggau bala tuai atas 1,000 iku orang, tuai atas 100 iku orang, sereta bala tuai ke bukai.
2 Udah nya, David madah ngagai semua orang Israel: “Enti semua kita setuju, lalu enti Jehovah, Petara kitai mega setuju, kitai deka nganjung pesan ngagai bala kitai ke agi diau ba serata Israel, sereta ngagai bala imam enggau orang Lewi ke diau ba kuta-kuta ke bisi ladang rumput, ngambika sida mega ulih sama enggau kitai.
3 Kitai deka mai pulai baru peti lampang batu Adat Petara kitai.” Nya ketegal nadai orang ke nyaga peti nya maya jeman Saul.
4 Lebuh sida ninga cadangan David nya manah ba sida, sida pan setuju enggau iya.
5 Nya alai, David ngempuruka semua orang Israel ari sungai* ba Ejip nyentuk ngagai Lebo-hamat,* laban deka mai peti lampang batu Adat Petara ti bendar ari Kiriat-jearim.
6 David enggau semua orang Israel mupuk ngagai Baalah, iya nya Kiriat-jearim ke ba kawasan Judah. Sida ngambi peti lampang batu Adat Petara ti bendar, lalu ba dia meh sida ngangauka nama Jehovah ke duduk ba kerusi diraja ba atas* dua iku cherub.
7 Sida ngambi peti lampang batu Adat Petara ti bendar ari rumah Abinadap, lalu ngengkahka peti nya ba kerita sapi ti baru. Udah nya, Usah enggau Ahio ngiring kerita sapi nya.
8 David enggau semua orang Israel berami ba depan Petara ti bendar enggau pengabis ati sida. Sida belagu, nyepu terumpit, nebah belikan,* perengka musik ti betali, tamborin, enggau simbal.
9 Tang, lebuh sida datai ba endur alai ngindik gandum* ba Chidon, Usah ngunjurka jari iya lalu ngetanka peti lampang batu Adat, laban peti nya nyauka labuh ketegal sapi nya.
10 Jehovah balat amat ringat ngagai Usah lalu munuh iya, laban iya ngunjurka jari iya negu peti lampang batu Adat nya. Iya mati ba depan Petara.
11 Tang, David ringat laban Jehovah udah mantaika pengeringat Iya ngagai Usah. Nya meh kebuah endur nya dikumbai Peres-usah* sampai ke seharitu.
12 Ba hari nya, David lalu takutka Petara ti bendar. Ku iya: “Baka ni meh aku deka mai peti lampang batu Adat Petara ti bendar ngagai kuta aku?”
13 David enda mai peti lampang batu Adat nya ngagai endur alai iya diau ba Kuta David. Tang, iya mai peti nya ngagai rumah siku orang Gat ke benama Obet-edom.
14 Pengelama tiga bulan, peti lampang batu Adat Petara ti bendar diengkahka ba rumah Obet-edom. Jehovah enda ngetu merekatka semua sida ke serumah enggau Obet-edom sereta semua utai ke dikemisi Obed-edom.
Nota Kaki
^ Tauka “ari Shihor.”
^ Tauka “jalai tama ngagai Hamat.”
^ Tauka engka, “ba entara.”
^ Tauka “harp.” Sebengkah perengka musik ke betali baka gitar, tang gamal iya enda sebaka enggau gitar.
^ Tauka “utai ke diketau.”
^ Reti nya “Mantaika Pengeringat ngagai Usah.”
