Bansa Israel ti Kesatu 14:1-17
14 Raja Hiram ari Tirus ngasuh orang ngirumka pesan ngagai David. Iya mega nganjung kayu sidar, tukang batu,* enggau tukang kayu kena ngaga istana ke David.
2 David pan sedar Jehovah udah ngentapka penuduk iya nyadi raja Israel, lalu ngasuh iya nyadi raja ti dipebasa ke penguntung bala nembiak Iya, Israel.
3 Ba Jerusalem, David bisi mayuh agi bini. Iya mega bisi mayuh agi anak lelaki enggau anak indu.
4 Tu meh nama anak iya ke ada ba Jerusalem: Shamua, Sobap, Natan, Solomon,
5 Ibar, Elisua, Elpelet,
6 Nogah, Nefek, Japia,
7 Elisama, Biliada, enggau Elipelet.
8 Lebuh orang Pilistin ninga pasal David ke udah ditata nyadi raja serata Israel, semua sida pan datai ngiga David. Lebuh David ninga pasal nya, iya pan mansang ngelaban sida.
9 Udah nya, orang Pilistin datai, lalu nyerang orang ke diau ba Lebak Repaim.
10 David pan nanya Petara: “Patut aku nyerang orang Pilistin? Kati Nuan deka nyerahka sida ngagai aku?” Ku Jehovah nyaut iya: “Alai meh. Aku tentu deka nyerahka sida ngagai nuan.”
11 Nyadi, David pan mansang ngagai Baal-perasim lalu ngalahka sida ba dia. Udah nya, David madah: “Petara ti bendar udah ngasuh munsuh aku punas nengah aku, baka dinding ke runtuh laban ai.” Nya meh kebuah sida meri endur nya nama Baal-perasim.*
12 Orang Pilistin ninggalka petara sida ba dia. Udah nya, David ngasuh semua petara nya ditunu.
13 Udah nya, orang Pilistin datai baru lalu nyerang orang ke diau ba lebak nya.
14 David sekali agi nanya Petara, tang Petara ti bendar nyaut: “Anang nyerang sida ari depan, tang serang sida ari belakang semak enggau babas.*
15 Ba atas babas nya, enti nuan bisi ninga bunyi orang bejalai, nuan tau belabuh nyerang, laban Petara ti bendar udah mansang dulu ari nuan deka nyerang soldadu Pilistin nya.”
16 David pan ngereja semua utai ke diasuh Petara ti bendar, lalu sida ngalahka soldadu Pilistin ari Gibeon sampai ngagai Geser.
17 David pan belabuh dikelala semua orang ba serata endur, lalu Jehovah ngasuh semua bansa takut magang ke David.
Nota Kaki
^ Tauka “orang ke ngaga dinding.”
^ Reti nya “Pakar Tembus.”
^ Jaku Asal, “ari belakang ba depan pun bakha.”
