Bansa Israel ti Kesatu 15:1-29
15 David neruska pengawa begagaka rumah ke iya empu ba Kuta David. Iya mega nyediaka endur ke peti lampang batu Adat Petara ti bendar, lalu nirika langkau kain ke peti nya.
2 Maya nya meh David madah: “Nadai orang tau ngesan peti lampang batu Adat Petara ti bendar. Semina orang Lewi aja ke tau laban Jehovah udah milih sida ngesan peti lampang batu Adat Jehovah sereta seruran gawa ke Iya.”
3 Nya alai, David ngempuruka semua orang Israel ba Jerusalem. Sida deka mai peti lampang batu Adat Jehovah ngagai endur ke udah disediaka iya.
4 David ngempuruka bala peturun Aron enggau bala orang Lewi:
5 Ari peturun Kohat, Uriel enggau 120 iku bala iya. Uriel nyadi tuai sida;
6 ari peturun Merari, Asayah enggau 220 iku bala iya. Asayah nyadi tuai sida;
7 ari peturun Gersom, Joel enggau 130 iku bala iya. Joel nyadi tuai sida;
8 ari peturun Elisapan, Semayah enggau 200 iku bala iya. Semayah nyadi tuai sida;
9 ari peturun Hebron, Eliel enggau 80 iku bala iya. Eliel nyadi tuai sida;
10 ari peturun Uziel, Aminadap enggau 112 iku bala iya. Aminadap nyadi tuai sida.
11 Udah nya, David ngangauka Imam Sadok, Imam Abiatar, enggau orang Lewi nya, iya nya Uriel, Asayah, Joel, Semayah, Eliel, enggau Aminadap.
12 Ku iya bejaku enggau sida: “Kita tuai suku ari raban bansa Lewi. Kita enggau bala kita patut nguduska diri empu, lalu bai peti lampang batu Adat Jehovah, Petara orang Israel, ngagai endur ke udah disediaka aku.
13 Lebuh keterubah iya peti nya dipindahka, kita enda ngesan peti nya. Nya alai Jehovah, Petara kitai, ringat ketegal kitai enda nitihka atur ke udah ditetapka.”
14 Nya alai, bala imam enggau bala orang Lewi nguduska diri empu ngambika sida ulih mai peti lampang batu Adat Jehovah, Petara orang Israel.
15 Udah nya, orang Lewi ngesan peti lampang batu Adat Petara ti bendar ngena kayu, baka ke udah diasuh Jehovah nengah Moses.
16 David ngasuh bala tuai orang Lewi milih beberapa iku penyanyi ari bala sida ngambika belagu enggau gaga ati, sambil nebah belikan,* simbal, enggau perengka musik ti betali.
17 Nya alai, orang Lewi ngelantik Heman anak Joel enggau Asaf anak Berekiah ari bala sida empu. Orang Lewi mega ngelantik Etan anak Kusayah ari bala sida empu, iya nya orang Merari.
18 Bala sida ari raban ti kedua bisi enggau sida. Sida nya Sekariah, Ben, Jasiel, Semiramot, Jehiel, Uni, Eliap, Benayah, Maseyah, Matitiah, Elipelehu, Mikniah, enggau dua iku orang ke nyaga pintu kuta, iya nya Obet-edom enggau Jiel.
19 Tiga iku penyanyi, iya nya Heman, Asaf, enggau Etan diasuh nebah simbal temaga.
20 Sekariah, Aziel, Semiramot, Jehiel, Uni, Eliap, Maseyah, enggau Benayah diasuh nebah perengka musik ti betali ke udah diijas ngagai tiun ti tinggi.*
21 Matitiah, Elipelehu, Mikniah, Obet-edom, Jiel, enggau Asasiah diasuh nebah belikan ke udah diijas ngagai tiun ti baruh.* Sida mega ngiring bala orang ke nebah musik.
22 Chenaniah, iya nya tuai raban bansa Lewi, diasuh ngemataka pengawa ngesan peti lampang batu Adat laban iya landik ba pengawa nya.
23 Berekiah enggau Elkanah diasuh nyaga peti lampang batu Adat.
24 Obet-edom enggau Jehiah mega diasuh nyaga peti lampang batu Adat. Bala imam, iya nya Sebaniah, Josapat, Netanel, Amasai, Sekariah, Benayah, enggau Elieser, diasuh nyepu terumpit enggau inggar ba depan peti lampang batu Adat Petara ti bendar.
25 David, bala tuai orang Israel, enggau bala tuai atas 1,000 iku orang, mupuk enggau gaga ati mai peti Jehovah nya ari rumah Obet-edom.
26 Ketegal Petara ti bendar udah nulung orang Lewi ke ngesan peti lampang batu Adat Jehovah, sida nyerahka tujuh iku anak sapi lelaki enggau tujuh iku bedus lelaki nyadika pemeri.
27 David ngena baju jubah ke enda belengan ti digaga ari kain ti alus. Pia mega enggau semua orang Lewi ke ngesan peti nya, bala penyanyi, enggau Chenaniah ke ngiring bala penyanyi ke ngesan peti nya. David mega ngena epod ke digaga ari kain linin.
28 Semua orang Israel ke mai peti lampang batu Adat Jehovah manjung gaga ati lalu nyepu tanduk enggau terumpit, sereta nebah simbal. Sida mega nebah belikan sereta perengka musik ke betali enggau inggar.
29 Lebuh peti lampang batu Adat Jehovah tama ngagai Kuta David, anak indu Saul ke benama Mikal malik ke baruh ari jenila. Iya meda Raja David jengkak-jengkak enggau orang berami. Iya pan berengkah begedika* David dalam ati.
Nota Kaki
^ Tauka “harp.” Sebengkah perengka musik ke betali baka gitar, tang gamal iya enda sebaka enggau gitar.
^ Jaku Asal, “ngagai Alamot.” Peda Penerang Leka Jaku, “Alamot.”
^ Jaku Asal, “ngagai Sheminit.” Peda Penerang Leka Jaku, “Sheminit.”
^ Tauka “ngemaruhka.”
