Bansa Israel ti Kesatu 16:1-43
16 Sida mai peti lampang batu Adat Petara ti bendar tama, lalu ngengkahka nya ba dalam langkau kain ke udah didirika David ke peti nya. Udah nya, sida nyerahka pemeri tunu enggau pemeri bebaik ngagai Petara ti bendar.
2 Pengudah David nyerahka semua pemeri nya, iya merekatka semua rayat dalam nama Jehovah.
3 Iya mega nyadung pemakai ngagai semua orang Israel. Iya meri tiap iku sida siti tuku roti ti segala baka gelang, kuih kurma, enggau kuih kismis.
4 Udah nya, iya ngelantik beberapa iku orang Lewi gawa ba depan peti lampang batu Adat Jehovah. Sida meri mulia, meri terima kasih, sereta meri puji ngagai Jehovah, Petara orang Israel.
5 Tuai sida nya Asaf, lalu lumur dua pengudah Asaf nya, Sekariah. Jiel, Semiramot, Jehiel, Matitiah, Eliap, Benayah, Obet-edom, enggau Jiel nebah belikan* enggau perengka musik ti betali, lalu Asaf nebah simbal.
6 Imam Benayah enggau Imam Jahasiel nyepu terumpit enggau tetap ba depan peti lampang batu Adat Petara ti bendar.
7 Ba hari nya meh David keterubah iya ngaga lagu terima kasih ke Jehovah. Iya ngasuh Asaf, enggau bala Asaf empu belaguka lagu nya. Tu meh lagu iya:
8 “Beri terima kasih ngagai Jehovah lalu kangauka nama Iya.
Padahka pengawa Iya ngagai semua orang!
9 Belagu meh ke Iya, puji meh Iya nengah lagu.*
Belemati lebuh meda* semua pengawa Iya ti luar biasa.
10 Padahka nama Iya ti kudus enggau ati ti temegah.
Awakka orang ke ngiga Jehovah gaga ati.
11 Giga meh Jehovah lalu pinta meh pengering ari Iya.
Terus meh ngiga tulung ari Iya.
12 Kingatka pengawa Iya ti ngalitka ati.
Kingatka meh pengawa Iya ti luar biasa sereta pemutus ti adil ke udah digaga Iya,
13 O peturun Israel, nembiak Iya,O peturun Jakop, nembiak ke dipilih Iya.
14 Iya meh Jehovah, Petara kitai.
Iya ngakim serata dunya.
15 Kingatka sempekat ke udah digaga Iya belama iya;Kingatka semaya ke udah digaga* Iya sampai ngagai beribu generasi.*
16 Kingatka sempekat Iya enggau AbrahamSereta sumpah ke udah digaga Iya enggau Isak.
17 Iya udah ngasuh sumpah nya nyadika jamin ngagai JakopSereta nyadika sempekat ti meruan ke orang Israel.
18 Ku Iya: ‘Aku deka meri nuan tanah KanaanKe endang udah nyadi ungkup nuan nyadika pesaka.’
19 Maya nya, penyampau sida mimit aja.
Au, penyampau sida enda mayuh, lalu sida diau ba din nyadi orang asing.
20 Sida bejalai ari bansa siti ngagai bansa siti,Ari perintah siti ngagai perintah siti.
21 Iya enda ngelakka sapa-sapa nekan sida,Lalu ketegal sida, Iya ngerara bala raja.
22 Ku Iya: ‘Anang negu bala nembiak ke ditata Aku,Lalu anang jai ngagai bala nabi Aku.’
23 Belagu meh ke Jehovah, O serata dunya!
Ninting hari, padahka pasal Iya ke nyelamatka orang!
24 Padahka mulia Iya ngagai semua bansa;Tusui meh pengawa Iya ti ngalitka ati ngagai semua orang.
25 Jehovah nya bemulia lalu patut nerima semua puji.
Iya patut dikenangika lebih ari petara bukai.
26 Semua petara ke disembah bansa bukai nadai guna,Tang Jehovah meh Petara ke ngaga langit.
27 Iya dikelingi mulia enggau basa;Kuasa enggau pengaga ngemenuhka endur alai Iya diau.
28 O semua bansa, muliaka meh Jehovah.
Au, muliaka meh Jehovah laban Iya bemulia sereta bekuasa.
29 Muliaka meh Jehovah ketegal nama Iya.
Bai meh pemeri lalu datai semak ngagai Iya.
Besugang meh ngagai* Jehovah ngena gari kita ti kudus.*
30 O serata dunya, nangi meh ke Iya.
Iya negapka dunya lalu dunya enda bekinsit.
31 Awakka langit gaga ati, lalu awakka dunya mega gaga ati!
Padahka ngagai semua bansa: ‘Jehovah udah nyadi Raja!’
32 Awakka tasik enggau semua utai ba dalam tasik rami magang!
Awakka tanah enggau semua utai ba dalam tanah gaga ati!
33 Awakka pun kayu ba utan sama rami gaga ati ba depan Jehovah,Laban Iya deka* datai ngakim dunya.
34 Beri terima kasih ngagai Jehovah laban Iya manah.
Pengerindu Iya ti setia meruan belama iya.
35 Padah ngagai Iya: ‘Selamatka meh kami, O Petara, ti penyelamat kami.
Gempuruka meh kami lalu lepaska meh kami ari bansa bukai,Ngambika kami ulih ngemuliaka nama Nuan ti kudus,Lalu ulih meri puji ngagai Nuan enggau ati ti gaga.
36 Awakka Jehovah, Petara orang Israel,Dipuji belama iya.’”
Semua orang Israel pan nyebut: “Amin!”* lalu sida muji Jehovah.
37 Udah nya, David ninggalka Asaf enggau bala Asaf ba depan peti lampang batu Adat Jehovah. Sida deka tetap gawa ba dia ninting hari.
38 David mega ninggalka Obet-edom enggau 68 iku bala iya ba dia. Iya ngasuh Obet-edom anak Jedutun enggau Hosah nyaga pintu kuta.
39 Iya mega ngasuh Imam Sadok enggau bala imam ke bukai gawa ba depan peti lampang batu Adat Jehovah ba bukit* ba Gibeon.
40 Sida nyerahka pemeri tunu ngagai Jehovah ba alta ninting pagi enggau lemai. Sida mega ngereja semua utai ke ditulis ba adat ke udah diberi Jehovah ngagai orang Israel.
41 Heman, Jedutun, enggau orang bukai ke udah dipilih mega bisi enggau sida. Pengawa sida nya madahka terima kasih ngagai Jehovah laban “pengerindu Iya ti setia meruan belama iya.”
42 Heman enggau Jedutun diasuh nyepu terumpit, nebah simbal, enggau perengka musik ke bukai kena muji Petara ti bendar. Bala anak lelaki Jedutun diasuh nyaga pintu penama.
43 Udah nya, semua orang pulai ngagai rumah diri empu, lalu David mega pulai merekatka semua orang ba rumah iya.
Nota Kaki
^ Tauka “harp.” Sebengkah perengka musik ke betali baka gitar, tang gamal iya enda sebaka enggau gitar.
^ Tauka “tebah meh musik ke Iya.”
^ Tauka engka, “Padahka meh.”
^ Jaku Asal, “Pesan ke udah dipadah.”
^ Tauka “serak.”
^ Tauka “Sembah meh.”
^ Tauka engka, “ketegal pengudus Iya ti luar biasa.”
^ Tauka “udah.”
^ Tauka “Awakka nya nyadi!”
^ Jaku Asal, “endur ti tinggi.”
