Bansa Israel ti Kesatu 17:1-27
17 Lebuh David udah diau ba istana iya, iya lalu madah ngagai Nabi Natan: “Aku diau ba istana ke digaga ari kayu sidar. Tang, peti lampang batu Adat Jehovah ba langkau kain.”
2 Ku Natan madah ngagai David: “Gaga meh nama-nama utai ke dikedekaka ati nuan, laban Petara ti bendar bisi enggau nuan.”
3 Tang malam nya, Petara madah ngagai Natan:
4 “Padahka tu ngagai nembiak Aku David: ‘Tu utai ke dipadahka Jehovah: “Ukai nuan ke deka ngaga Rumah alai Aku diau.
5 Kenyau ari maya Aku mai orang Israel pansut ari Ejip sampai ke seharitu, Aku nadai kala diau ba rumah. Aku selalu diau dalam langkau kain lalu mindah ari endur siti ngagai endur siti.*
6 Sekumbang Aku bisi enggau orang Israel, kala Aku nanya bala tuai orang Israel, ke dilantik Aku ngiring orang Israel, munyi tu: ‘Nama kebuah kita enda ngagaka Aku Rumah ari kayu sidar?’”’
7 “Padah ngagai nembiak Aku, David: ‘Tu meh utai ke dipadahka Jehovah, ketuai soldadu serega: “Nuan nyaga jelu tupi ba padang rumput, tang Aku udah ngambi nuan lalu ngasuh nuan ngiring nembiak Aku, Israel.
8 Enda ngira kini ke penunga nuan, Aku deka enggau nuan. Ba depan nuan, Aku deka ngemunaska semua munsuh nuan. Aku deka ngasuh nama nuan, baka nama orang ke tebilang ba dunya tu.
9 Aku deka milih endur ke nembiak Aku, Israel, lalu ngasuh sida diau ba dia. Sida deka diau ba dia, lalu nadai utai deka ngachau sida. Orang jai nadai agi merinsaka sida baka suba.
10 Kenyau ari maya Aku ngelantik bala hakim ke nembiak Aku, Israel, sida udah balat merinsa. Tang, Aku deka ngalahka semua munsuh nuan. Aku mega madah ngagai nuan: ‘Jehovah deka ngaga ruang bilik nuan nyadi peturun raja.’*
11 “‘“Lebuh nuan udah nadai,* Aku deka ngelantik peturun nuan nyadi raja, iya nya siku ari anak nuan, lalu Aku deka negapka perintah iya.
12 Iya meh ke deka ngaga Rumah ke Aku, lalu Aku deka negapka kerusi diraja iya belama iya.
13 Aku deka nyadi apai iya, lalu iya deka nyadi anak Aku. Aku deka mengkang ngayanka pengerindu ti setia ngagai iya, taja pan Aku kala ngetu ngayanka pengerindu ti setia ngagai orang ke sebedau nuan.
14 Aku deka ngelantik iya nyadi raja ba rumah Aku belama iya. Kerusi diraja iya deka meruan belama iya.”’”
15 Natan madah ngagai David semua utai nya enggau utai ke dipandangka Petara dalam runding Natan.
16 Udah nya, Raja David tama lalu duduk ba depan Jehovah. Ku iya madah: “O Jehovah ti Petara, sapa meh aku tu? Lalu sapa meh ruang bilik aku nyentukka Nuan manah amat enggau kami?
17 O Petara, Nuan indah deka ngereja mayuh agi ari semua utai nya, laban Nuan madah peturun aku deka bisi nyentukka jemah ila. O Jehovah ti Petara, ba mata Nuan aku tu baka orang ke tinggi pangkat.
18 Nama agi utai ke ulih dipadahka aku ngagai Nuan pasal basa ke udah diberi Nuan ngagai aku? Semua utai pasal aku ditemu Nuan magang.
19 O Jehovah, Nuan udah ngereja semua utai ti manah tu ketegal aku sereta ketegal utai ti sejalai enggau peneka* Nuan. Nuan udah mandangka pengawa Nuan ti luar biasa.
20 O Jehovah, semua utai ke udah didinga kami nunjukka semina Nuan aja meh Petara ti bendar. Nadai Petara bukai kelimpah ari Nuan. Nadai ke baka Nuan.
21 Ba serata dunya tu, nadai bansa bukai ke baka nembiak Nuan, Israel. Nuan, Petara ti bendar, nebus sida ngambika sida nyadi nembiak Nuan. Nuan ngasuh nama Nuan ditemu orang lebuh Nuan ngereja pengawa ti besai sereta pengawa ti ngalitka ati. Nuan muru bansa bukai ari nembiak Nuan, ke ditebus Nuan ari Ejip.
22 Nuan udah ngaga orang Israel nyadika nembiak Nuan belama iya. O Jehovah, Nuan udah nyadi Petara sida.
23 O Jehovah, keamatka meh utai ke udah disemayaka Nuan ngagai aku enggau bala peturun aku belama iya. Awakka Nuan ngamatka utai ke udah disemayaka Nuan.
24 Awakka nama Nuan meruan bisi sereta dimuliaka belama iya, ngambika orang bejaku munyi tu: ‘Jehovah, ketuai soldadu serega, Petara Israel nya, Petara ke merintah orang Israel.’ Awakka peturun nembiak Nuan tu mengkang tegap ba depan Nuan.
25 O Petara aku, Nuan udah mandangka ngagai nembiak Nuan tu kebuah Nuan deka ngaga ruang bilik aku nyadi peturun raja. Nya meh kebuah aku andal besampika utai tu ngagai Nuan.
26 O Jehovah, Nuan meh Petara ti bendar, lalu Nuan udah besemayaka utai ti manah tu ngagai aku.
27 Nya alai, berekatka meh peturun aku ngambika sida ulih merintah ba depan Nuan belama iya. O Jehovah, Nuan udah merekatka peturun aku belama iya.
Nota Kaki
^ Jaku Asal, “ari langkau kain ngagai langkau kain.”
^ Jaku Asal, “Jehovah deka ngaga rumah ke nuan.”
^ Jaku Asal, “digalika begulai enggau aki ini nuan.”
^ Tauka “niat ati.”
