Bansa Israel ti Kesatu 18:1-17
18 Pengudah sesiti timpuh, David ngalahka orang Pilistin lalu nguasa sida. Iya ngerampas Gat ari sida, pia mega kuta-kuta mit ke ngelingi Gat.
2 David mega ngalahka Moap. Udah nya, orang Moap nyadi ulun David lalu mayar chukai* ngagai iya.
3 David ngalahka Hadadeser ari Sobah, ke semak enggau Hamat, lebuh Hadadeser dalam pejalai iya deka negapka kuasa iya ba Sungai Eupratis.
4 David ngerampas 1,000 iti kerita kuda, lalu nangkap 7,000 iku soldadu Hadadeser ke nepan kuda, enggau 20,000 iku soldadu iya ke bejalai kaki. Udah nya, David netak urat kaki bala kuda nya. Semina 100 iku aja kuda ke dikena narit kerita kuda enda ditetak iya urat kaki.
5 Lebuh orang Siria ari Damaskus datai deka nulung Raja Hadadeser, David munuh 22,000 iku orang Siria.
6 Udah nya, David nganjung raban soldadu iya ngambika bejaga ba Damaskus, ba Siria. Orang Siria nyadi ulun David, lalu sida mayar chukai ngagai iya. Enda ngira kini ke penunga David, Jehovah ngasuh iya menang.*
7 David mega ngambi terabai bulat, ke digaga ari emas, ari orang ke gawa ke Hadadeser, lalu mai semua utai nya ngagai Jerusalem.
8 Raja David ngambi mayuh amat temaga ari kuta Tibhat enggau Kun, iya nya kuta enggi Hadadeser. Solomon ngena temaga nya kena ngaga Tasik Temaga, tiang-tiang, enggau pekekas temaga.
9 Raja Tou ari Hamat bisi ninga pasal David ke udah ngalahka semua soldadu Hadadeser, raja Sobah.
10 Iya pan lalu nganjung anak iya, Hadoram, betemu enggau David lalu nanyaka rita iya. Hadoram mega meri jaku puji* ngagai David ke udah nyerang lalu ngalahka Hadadeser. (Hadadeser selalu beperang enggau Tou.) Hadoram mega mai mayuh macham utai ke digaga ari emas, pirak, enggau temaga ke David.
11 Raja David nguduska semua utai nya lalu nyerahka nya ngagai Jehovah. Iya mega ngereja utai ti sama ngagai pirak enggau emas ke udah dibai iya ari semua bansa bukai, iya nya ari Edom enggau Moap, ari orang Amon, ari orang Pilistin, enggau ari orang Amalek.
12 Abisai anak Seruyah udah munuh 18,000 orang Edom ba Lebak Garam.
13 Iya nganjung raban soldadu ngambika bejaga ba Edom, lalu semua orang Edom nyadi ulun iya. Enda ngira kini ke penunga David, Jehovah ngasuh iya menang.*
14 David merintah serata Israel. Iya ngereja utai ti lurus sereta adil ke semua rayat iya.
15 Joap anak Seruyah nyadi ketuai soldadu. Jehosapat anak Ahilut nyadi orang ke nulis rekod.
16 Sadok anak Ahitup enggau Ahimelek anak Abiatar gawa nyadi imam. Savsa gawa nyadi sekretari.
17 Benayah anak Jehoyada merintah orang Kereti enggau orang Peleti. Bala anak lelaki David megai pangkat lumur dua bekuasa pengudah raja.
Nota Kaki
^ Tauka “mai pemeri.”
^ Jaku Asal, “nyelamatka David.”
^ Tauka “madah tahniah.”
^ Jaku Asal, “nyelamatka David.”
