Bansa Israel ti Kesatu 19:1-19
19 Udah nya, Nahas, raja orang Amon mati, lalu anak iya nganti iya nyadi raja.
2 David madahka: “Aku deka ngayanka pengerindu ti setia ngagai Hanun anak Nahas, laban apai iya udah ngayanka pengerindu ti setia ngagai aku.” Nya alai, David ngasuh bala orang ke mai pesan iya ngenataika penyinu ati iya ngagai Hanun. Tang, lebuh bala pegawai David datai ba menua orang Amon deka ngelantangka ati Hanun,
3 bala tuai orang Amon lalu madah ngagai Hanun: “Nuan ngumbai David amat deka bebasaka apai nuan, lebuh iya nganjung bala pegawai iya ngenataika penyinu ati iya? Ni bisi. Iya nganjung sida laban deka ngintip sereta beratika menua kitai enggau silik ngambika iya ulih nguasa menua kitai.”
4 Nyadi, Hanun pan nangkap bala pegawai David, lalu nyukur ragum sida sereta mutung gari sida setengah naka punggung. Udah nya, iya ngasuh sida mupuk.
5 Pengudah ninga pasal utai ke nyadi, David lalu terus nganjung orang betemu enggau sida, laban sida balat amat malu ketegal utai ke nyadi nya. Tu pesan raja ngagai sida: “Diau ba Jeriko dulu meh kita sampai ragum kita tumbuh. Nya baru kita pulai.”
6 Udah nya, orang Amon nyau sedar David begedika sida. Nya alai, Hanun enggau orang Amon nganjung 1,000 talenta* pirak kena ngaji orang ke nepan kuda enggau kerita kuda ari Mesopotamia,* Aram-maakah, enggau Sobah.
7 Sida ngupah raja Maakah enggau bala soldadu iya, sereta nyewa 32,000 iti kerita kuda. Udah nya, sida mupuk ngagai Medeba lalu nirika kem ba dia. Orang Amon datai ari kuta-kuta sida. Sida begempuru lalu besedia deka beperang.
8 Lebuh David ninga nya, David pan lalu ngasuh Joap enggau semua raban soldadu iya, nyengkaum bala soldadu iya ke pemadu kering, mansang ngelaban sida.
9 Orang Amon pan ngatur barisan bala soldadu sida ba pintu penama kuta, lalu bala raja ke udah datai mega bisi ba padang nya.
10 Lebuh Joap meda sida diserang ari depan enggau ari belakang, iya lalu milih soldadu Israel ke pemadu manah, lalu ngatur barisan bala soldadu sida kena ngelaban soldadu Siria.
11 Joap ngasuh bala soldadu iya ke bukai nitihka menyadi iya, Abisai, ngambika Abisai ulih ngatur barisan bala soldadu sida kena ngelaban orang Amon.
12 Udah nya, Joap madahka: “Enti orang Siria kuat agi ari aku, nuan mesti datai nyelamatka aku. Tang, enti orang Amon kuat agi ari nuan, aku deka nyelamatka nuan.
13 Kita mesti kuat sereta berani, kena nyaga orang Israel sereta kuta-kuta ke diberi Petara ngagai kitai. Jehovah deka ngereja utai ti manah ba mata Iya.”
14 Joap enggau raban soldadu iya pan mansang belaban enggau orang Siria. Tang, orang Siria ngerarika diri.
15 Lebuh orang Amon meda orang Siria rari, sida pan ngerarika diri ari Abisai lalu tama ngagai kuta. Pengudah nya, Joap pan pulai ngagai Jerusalem.
16 Lebuh orang Siria meda sida udah dialahka orang Israel, sida pan nganjung orang ke mai pesan ngangauka orang Siria ke ba kawasan sungai.* Sida pan datai nitihka Sopak, iya nya ketuai soldadu Hadadeser.
17 Lebuh David ninga pasal nya, iya terus ngempuruka semua orang Israel lalu meraka Sungai Jordan sampai ngagai kawasan orang Siria. Sida ngatur barisan bala soldadu sida. David mansang ngelaban orang Siria, lalu orang Siria mansang belaban enggau David.
18 Tang, soldadu Siria ngerarika diri ari soldadu Israel. David munuh 7,000 iku soldadu Siria ke mai kerita kuda sereta 40,000 iku soldadu ke bejalai kaki. Iya mega munuh Sopak, iya nya ketuai soldadu sida.
19 Lebuh semua raja ke diperintah Hadadeser meda sida dialahka orang Israel, sida lalu jampat-jampat bebaik enggau David, lalu sanggup diperintah iya. Orang Siria pan nyau enggai agi nulung orang Amon.
