Bansa Israel ti Kesatu 20:1-8
20 Ba pun taun,* iya nya maya bala raja biasa iya mansang beperang, Joap nguluka raban soldadu Israel nganchurka menua orang Amon. Sida ngepung kuta Rabah. Tang maya nya, David ba Jerusalem. Joap nyerang Rabah lalu nganchurka kuta nya.
2 Udah nya, David ngambi makota Malkam lalu ngena makota nya. Pemerat makota nya kira-kira 34 kilogram* emas, lalu diias ngena batu ti berega. Kelimpah ari nya, David ngerampas mayuh utai ari kuta nya.
3 Iya mega mai semua orang ba kuta nya pansut lalu ngasuh sida gawa. Bisi ke diasuh mutung batu, lalu bisi ke gawa ngena perengka besi ti tajam enggau kapak. Nya meh utai ke digaga David ngagai orang ke diau ba semua kuta orang Amon. Udah nya, David enggau semua soldadu iya pulai ngagai Jerusalem.
4 Udah nya, orang Israel beperang ngelaban orang Pilistin ba Geser. Maya nya, siku orang Husah ke benama Sibikai munuh Sipai, ke datai ari peturun Repaim. Baka nya meh sida ngalahka orang Pilistin.
5 Perang lalu nyadi baru enggau orang Pilistin. Elhanan anak Jair munuh Lahmi, iya nya menyadi Goliat ari Gat. Goliat bisi sangkuh ke ngemesai kayu ba perengka ke dikena betenun.
6 Udah nya, perang nyadi baru ba Gat. Ba dia, bisi siku lelaki ti amat besai ari peturun Repaim. Iya bisi enam iti tunjuk jari ba kedua piak jari iya, lalu enam iti tunjuk kaki ba kedua piak kaki iya. Semua iya bisi 24 iti.
7 Iya majak mencabar* orang Israel. Nya alai, Jonatan, iya nya anak abang David ke benama Shimea, lalu munuh iya.
8 Sida nya peturun Repaim ba Gat, lalu sida alah laban David enggau bala iya.
Nota Kaki
^ Iya nya, maya musin bungai.
^ Jaku Asal, “1 talenta.” Peda Rujukan B14.
^ Tauka “ngeleseka.”
