Bansa Israel ti Kesatu 21:1-30
21 Sitan* deka ngelaban orang Israel, lalu ngasut David ngambika ngitung penyampau orang Israel.
2 Nyadi, David madah ngagai Joap enggau bala tuai orang Israel: “Alai, itung penyampau orang Israel ari Beer-sheba ngagai Dan. Udah nya, padah ngagai aku ngambika aku nemu penyampau sida.”
3 Tang Joap madah: “Awakka Jehovah ngasuh rayat nuan nambah 100 kali lipat! Tuan raja, endaka semua sida nya endang rayat nuan? Nama kebuah nuan deka ngereja tu? Anang meh ngasuh orang Israel bedosa ketegal pengawa nuan.”
4 Taja pia, raja tetap enggai ngubah pemutus iya. Nyadi, Joap mupuk ngagai serata Israel lalu ngaga banci kena ngitung orang Israel. Udah nya, iya pulai ngagai Jerusalem.
5 Joap lalu madah ngagai David pasal penyampau orang ke direjista ba dalam banci. Bisi 1,100,000 iku lelaki Israel ke mai pedang sereta bisi 470,000 iku lelaki Judah ke mai pedang.
6 Tang, raban bansa Lewi enggau raban bansa Benjamin enda diitung, laban Joap amat enda setuju enggau utai ke diasuh raja.
7 Utai ke dikereja David nya ngasuh Petara ti bendar balat ringat. Nya alai, Iya ngukum orang Israel.
8 Udah nya, David madah ngagai Petara ti bendar: “Aku udah ngereja dosa ti besai, laban ngereja utai tu. Ampunka meh penyalah nembiak Nuan tu, laban aku udah ngereja utai ti amat beli.”
9 Jehovah bejaku ngagai Gat, iya nya orang ke ulih meda utai ke dipandangka Petara dalam runding iya. Ku Petara bejaku:
10 “Mupuk nuan, lalu padahka tu ngagai David: ‘Tu meh utai ke dipadahka Jehovah: “Aku meri nuan tiga iti pilihan. Pilih siti, ni ke patut digaga Aku ke nuan.”’”
11 Gat pan betemu enggau David lalu madah ngagai iya: “Tu utai ke dipadah Jehovah: ‘Pilih siti.
12 Kati nuan ka lapar pungkang nyadi ba menua nuan pengelama tiga taun? Tauka kati nuan ka diserang bala munsuh nuan lalu dialahka dalam tiga bulan? Tauka kati nuan ka menua nuan diukum ngena pedang Jehovah pengelama tiga hari? Pengelama tiga hari tu, melikat Jehovah deka mai penusah ngagai serata menua Israel ngena penyakit berampit.’ Nya alai, perundingka enggau manah saut nuan, lalu aku deka madahka saut nuan ngagai Iya ke udah nganjung aku.”
13 David lalu nyaut Gat: “Tu tusah amat ba aku. Aku minta, awakka aku labuh ba jari Jehovah laban pengasih Iya amat besai. Anang nejuka aku labuh ba jari mensia.”
14 Udah nya, Jehovah ngasuh penyakit berampit ninggang Israel. Bisi 70,000 iku orang Israel mati.
15 Petara ti bendar nganjung siku melikat ngagai Jerusalem laban deka nganchurka kuta nya. Lebuh Jehovah meda melikat nya baru deka ngereja nya, Iya nesal* laban udah ngenataika penyakit berampit nya. Ku Iya madah ngagai melikat nya: “Umbas nya! Turunka jari nuan.” Maya nya, melikat Jehovah benung bediri enda jauh ari endur alai ngindik utai ke diketau, ke enggi siku orang Jebus ke benama Ornan.
16 Lebuh David malik ke atas, iya meda melikat Jehovah benung bediri ba entara dunya enggau langit. Melikat nya megai pedang lalu pedang nya ditunjukka iya ngagai Jerusalem. Maya nya, David enggau bala tuai orang Israel, bekenaka kain guni, lalu besugang.
17 David madah ngagai Petara ti bendar: “Aku empu ke ngasuh orang ngaga banci. Aku meh ke bedosa. Aku meh ke salah. Tang sida* tu, nama penyalah ke udah digaga sida? O Jehovah Petara aku, awakka jari Nuan ngukum aku enggau ruang bilik apai aku. Tang anang ngasuh penyakit nya ninggang bala nembiak Nuan.”
18 Melikat Jehovah ngasuh Gat madah ngagai David ngambika David mansang ngagai endur alai ngindik utai ke diketau enggi siku orang Jebus, ke benama Ornan, lalu ngaga siti alta ke Jehovah.
19 David pan mansang ngagai endur nya, nitihka utai ke dipadahka Jehovah nengah Gat.
20 Maya nya, Ornan benung ngindik gandum. Iya malik ke belakang lalu tepedaka melikat nya. Empat iku anak lelaki iya ke bisi enggau iya maya nya lalu belalai.
21 Ornan malik lalu meda David datai ngagai iya. Iya pan jampat-jampat pansut ari endur alai ngindik utai ke diketau lalu besugang ngagai David.
22 Ku David madah ngagai Ornan: “Jual endur alai ngindik utai ke diketau tu ngagai aku, laban aku deka ngaga siti alta ke Jehovah ba ditu. Jual endur tu ngagai aku enggau rega ti penuh, ngambika penulah ke ninggang rayat ulih ngetu.”
23 Tang, Ornan madah ngagai David: “Ambi aja meh endur tu tuan raja, lalu kereja meh nama-nama utai ti manah ba mata nuan. Tu sapi ke pemeri tunu enggau papan ke dikena ngindik utai ke diketau nyadika kayu api. Aku mega meri gandum nyadika pemeri bijirin. Aku meri semua tu ngagai nuan magang.”
24 Tang, Raja David madah ngagai Ornan: “Enda, aku mesti meli nya enggau rega ti penuh laban aku enda nyerahka pemeri tunu ngagai Jehovah enti pemeri nya pechuma.”
25 Nya alai, David mayar 600 shekel* emas kena meli endur nya.
26 David pan ngaga siti alta ke Jehovah. Iya nyerahka pemeri tunu enggau pemeri bebaik ba dia. Udah nya, David besampi ngagai Jehovah lalu Petara nyaut sampi iya. Petara nurunka api ari langit lalu api nya nganguska pemeri tunu ba alta.
27 Jehovah lalu ngasuh melikat nya nyelitka pedang iya.
28 Ketegal David udah meda Jehovah nyaut sampi iya ba endur alai ngindik utai ke diketau, enggi Ornan, orang Jebus nya, David neruska pengawa nyerahka pemeri ba dia.
29 Maya nya, Langkau Sembiang Jehovah ke udah didirika Moses ba menua puang enggau alta, alai nyerahka pemeri tunu bisi ba bukit* ba Gibeon.
30 Tang, David enda kin minta iring ari Petara, laban iya takutka pedang melikat Jehovah.
Nota Kaki
^ Tauka engka, “Orang ke ngelaban.”
^ Tauka “tusah ati.”
^ Jaku Asal, “bedus.”
^ Peda Rujukan B14.
^ Jaku Asal, “endur ti tinggi.”
