Bansa Israel ti Kesatu 22:1-19
22 Udah nya, David madah: “Tu meh endur alai Rumah Jehovah, Petara ti bendar, deka digaga. Lalu tu alta ke deka dikena orang Israel nyerahka pemeri tunu.”
2 David lalu meri pesan ngasuh semua orang asing ke diau ba Israel digempuruka. Iya ngasuh semua sida mutung lalu ngikis batu sampai bisi bentuk, kena nirika Rumah Petara ti bendar.
3 David nyediaka mayuh amat besi kena ngaga paku lawang ke pintu penama enggau perengka kena ngepit. Iya mega nyediaka mayuh amat temaga nyentukka enda ulih ditimbang.
4 Kelimpah ari nya, David nyediaka mayuh kayu sidar nyentukka enda ulih diitung, laban orang Sidon enggau orang Tirus mai mayuh amat kayu sidar ke David.
5 David madah: “Rumah ti deka digaga anak aku, Solomon, ke Jehovah enda tau enda chukup manah sereta ngalitka ati, ngambika berita pasal pemanah gamal Rumah nya ngerembai ngagai serata dunya. Tang, Solomon agi biak lalu nadai pengalaman.* Nya kebuah aku deka nyediaka mayuh utai ke iya.” Nya alai, David nyediaka mayuh amat perengka kena nirika Rumah nya sebedau iya mati.
6 David ngangauka anak iya, Solomon, lalu ngasuh iya ngaga siti Rumah ke Jehovah, Petara orang Israel.
7 Ku David madah ngagai Solomon: “Aku amat ingin deka ngaga siti Rumah kena ngemuliaka nama Jehovah, Petara aku.
8 Tang, Jehovah madah ngagai aku: ‘Nuan udah munuh kelalu mayuh orang, sereta udah kelalu suah beperang. Ketegal nya, ukai nuan ke deka ngaga Rumah kena ngemuliaka nama Aku, laban nuan udah munuh mayuh amat orang ba depan Aku.
9 Nuan deka bisi siku anak lelaki ke rinduka pengelantang.* Aku deka ngelindung iya ngambika iya enda dikachau semua munsuh ke ngelingi iya. Nama iya Solomon, lalu Aku deka ngasuh orang Israel lantang sereta likun ba baruh perintah iya.
10 Iya meh ke deka ngaga Rumah kena ngemuliaka nama Aku. Iya deka nyadi anak Aku, lalu Aku deka nyadi apai iya. Aku deka negapka kerusi diraja iya ba Israel belama iya.’
11 “Anak aku, awakka Jehovah enggau nuan, lalu awakka nuan mujur ngaga Rumah Jehovah, Petara nuan, baka ke udah dipadahka Iya pasal nuan.
12 Lebuh Jehovah meri nuan kuasa merintah Israel, awakka Iya mega meri nuan pemandai sereta penau ulih meretika utai, ngambika nuan nitihka adat Jehovah, Petara nuan.
13 Nuan tentu deka mujur enti nuan bebendar nitihka atur sereta pemutus ke diberi Jehovah nengah Moses ngagai orang Israel. Awakka nuan berani sereta kuat, lalu anang takut tauka rawan.
14 Aku udah enggau naka ulih nyediaka semua utai ke dikena nuan ngaga Rumah Jehovah. Aku udah nyediaka 100,000 talenta* emas enggau sejuta talenta pirak. Aku mega udah nyediaka mayuh amat temaga enggau besi nyentukka enda ulih ditimbang. Kelimpah ari nya, aku mega nyediaka kayu enggau batu. Taja pia, nuan empu agi patut nambahka semua perengka nya.
15 Nuan mega deka bisi mayuh pekereja. Bisi ke mutung batu, bisi tukang batu, bisi tukang kayu, sereta bisi mayuh tukang ke bukai.
16 Bisi mayuh amat emas, pirak, temaga, enggau besi nyentukka enda alah ditimbang. Alai mupuk! Gaga meh Rumah nya. Awakka Jehovah enggau nuan.”
17 Udah nya, David ngasuh semua bala pegawai ba Israel nulung anak iya, Solomon. Ku iya madah ngagai sida:
18 “Endaka Jehovah, Petara kita bisi enggau kita? Endaka Iya udah ngelepaska kita ari semua munsuh ke ngelingi kita? Iya udah nulung aku ngalahka orang ke diau ba menua tu, lalu menua tu udah di baruh kuasa Jehovah enggau nembiak Iya.
19 Nya alai, sembah meh Jehovah, Petara kita enggau pengabis ati kita sereta enggau pengabis pengidup kita. Nyadi, berengkah meh ngaga endur ti kudus ke Jehovah, Petara ti bendar, ngambika peti lampang batu Adat Jehovah enggau semua pekekas ti kudus enggi Petara ti bendar, ulih dibai ngagai Rumah ke deka digaga kena ngemuliaka nama Jehovah.”
Nota Kaki
^ Tauka “bedau besedia.”
^ Ari leka jaku Hebrew ke mai reti “Pengelantang.”
^ Peda Rujukan B14.
