Bansa Israel ti Kesatu 23:1-32
23 Lebuh David nyau udah tuai, lalu nyau semak enggau pengujung pengidup iya, iya ngelantik anak iya, Solomon, nyadi raja Israel.
2 Udah nya, David ngempuruka semua bala tuai orang Israel, bala imam, enggau orang Lewi.
3 Orang Lewi ke beumur 30 taun ke atas udah diitung magang. Penyampau semua sida 38,000 iku.
4 Ari entara sida, bisi 24,000 iku diasuh ngemataka pengawa ba Rumah Jehovah, 6,000 iku nyadi pegawai enggau hakim,
5 4,000 iku nyaga pintu penama, lalu 4,000 iku da agi diasuh muji Jehovah ngena perengka musik. David udah nyediaka perengka musik nya kena muji Petara.
6 Udah nya, David magi bala anak lelaki Lewi ngagai beberapa iti raban nitihka nama sida, iya nya Gerson, Kohat, enggau Merari.
7 Anak lelaki Gerson nya Ladan enggau Shimei.
8 Ladan bisi tiga iku anak lelaki, iya nya Jehiel, Setam, enggau Joel. Jehiel nya tuai sida.
9 Shimei* bisi tiga iku anak lelaki, iya nya Selomot, Hasiel, enggau Haran. Semua sida nya tuai suku raban bansa dalam ruang bilik Ladan.
10 Shimei* bisi empat iku anak lelaki, iya nya Jahat, Sina,* Jeus, enggau Beriah.
11 Jahat nya tuai sida, lalu Sisah nya anak kedua. Tang ketegal Jeus enggau Beriah nadai mayuh anak lelaki, nya alai sida diitung segulai nyadi siti ruang bilik lalu diberi tanggung pengawa ti sama.
12 Kohat bisi empat iku anak lelaki, iya nya Amram, Izhar, Hebron, enggau Uziel.
13 Anak lelaki Amram nya Aron enggau Moses. Aron enggau bala anak lelaki iya, diasuh gawa enggau tetap ba Endur ti Pemadu Kudus. Sida nyerahka pemeri ba depan Jehovah, gawa ke Iya, sereta merekatka orang dalam nama Iya.
14 Moses nya nembiak Petara ti bendar. Iya enggau bala anak lelaki iya disengkaumka dalam raban bansa Lewi.
15 Bala anak lelaki Moses nya Gersom enggau Elieser.
16 Gersom bisi beberapa iku anak lelaki, lalu Sebuel nya tuai sida.
17 Elieser nadai anak lelaki ke bukai. Iya semina bisi Rehabiah ke nyadi tuai. Tang, Rehabiah bisi mayuh anak lelaki.
18 Izhar bisi beberapa iku anak lelaki, lalu Selomit nya tuai sida.
19 Hebron bisi beberapa iku anak lelaki, iya nya Jeriah, Amariah, Jahasiel, enggau Jekamim. Jeriah nyadi tuai sida.
20 Bala anak lelaki Uziel nya Mikah enggau Issiah. Mikah nya tuai sida.
21 Anak lelaki Merari nya Mahli enggau Musi. Anak lelaki Mahli nya Eleasar enggau Kish.
22 Eleasar mati nadai anak lelaki, tang iya bisi bala anak indu. Nya alai, bala anak lelaki Kish, iya nya petunggal sida, ngambi sida nyadika bini.
23 Musi bisi tiga iku anak lelaki, iya nya Mahli, Eder, enggau Jerimot.
24 Nya meh nama sereta penyampau peturun Lewi ke direjista nitihka suku raban bansa enggau tuai ruang bilik sida. Sida ke beumur 20 taun ke atas, gawa ba Rumah Jehovah.
25 David kala madah: “Jehovah, Petara orang Israel, udah nyaga bala nembiak Iya ari munsuh, lalu Iya deka diau ba Jerusalem belama iya.
26 Bala orang Lewi enda ibuh agi ngesan Langkau Sembiang tauka semua pekekas ke dikena nyembah Petara.”
27 Nitihka atur ti penudi ke diberi David, orang Lewi ke beumur 20 taun ke atas patut diitung.
28 Sida diasuh nulung bala peturun Aron bejalaika pengawa ba Rumah Jehovah. Pengawa sida nya nyengkaum ngemataka semua laman, bilik endur makai, nguduska tiap iti utai ti kudus, sereta pengawa bukai ke patut digaga ba Rumah Petara ti bendar.
29 Sida betanggungjawap nyediaka roti ti belapis,* tepung ti alus ke diserahka nyadi pemeri bijirin, roti nipis ti enda beragi, roti ke dipanggang ba kali ti rata, sereta adunan ke dichampur enggau minyak. Kelimpah ari nya, sida mega nguruska semua pengawa ke bekaul enggau sukatan.
30 Ninting pagi enggau lemai, sida mega patut meri terima kasih sereta muji Jehovah.
31 Kelimpah ari nya, sida mega nulung lebuh pemeri tunu diserahka ngagai Jehovah maya Hari Sabat, maya bulan baru, sereta maya musin pengerami, nitihka utai ke ditulis dalam adat. Sida ngereja nya enggau tetap ba depan Jehovah.
32 Sida mega gawa ba langkau gempuru sereta ba endur ti kudus. Kelimpah ari nya, sida mega nulung bala menyadi sida, iya nya bala peturun Aron, ba Rumah Jehovah.
Nota Kaki
^ Tu merujuk ngagai Shimei ke bukai.
^ Tu merujuk ngagai Shimei ba ayat 7.
^ Tauka “Sisah” ba ayat 11.
^ Iya nya, roti ti diberi ngagai Petara.
