Bansa Israel ti Kesatu 26:1-32
26 Tu raban ke nyaga pintu penama: Ari peturun Korah, bisi Meselemiah anak Kore, siku ari peturun Asaf.
2 Meselemiah bisi beberapa iku anak lelaki. Iya ke tuai benama Sekariah. Udah nya Jediael, ketiga Sebadiah, keempat Jatniel,
3 kelima Elam, keenam Jehohanan, lalu ketujuh Elieho-enai.
4 Obet-edom bisi beberapa iku anak lelaki. Iya ke tuai benama Semayah. Udah nya Jehosabat, ketiga Joah, keempat Sakar, kelima Netanel,
5 keenam Amil, ketujuh Isakar, lalu kelapan Peuletai. Baka nya meh Petara merekatka Obet-edom.
6 Anak Obet-edom, iya nya Semayah, bisi beberapa iku anak lelaki ke nyadi tuai ruang bilik laban sida kering sereta ulih dikearapka.
7 Bala anak Semayah nya Othni, Repael, Obet, enggau Elsabat. Kaban belayan Elsabat nya, Elihu enggau Semakiah. Seduai iya mega orang ke ulih dikearapka.
8 Semua sida nya peturun Obet-edom. Sida menyanak enggau bala kaban belayan sida orang ke ulih dikearapka sereta layak bejalaika pengawa nya. Semua penyampau bala Obet-edom nya 62 iku.
9 Meselemiah bisi 18 iku anak lelaki enggau bala iya ke ulih dikearapka.
10 Hosah ari peturun Merari bisi beberapa iku anak lelaki. Hosah ngelantik Simri nyadi tuai, taja pan Simri ukai anak tuai iya.
11 Anak Hosah ti kedua nya Hilkiah. Udah nya Tebaliah enggau Sekariah. Semua penyampau anak lelaki enggau bala Hosah nya 13 iku.
12 Bala tuai raban ke nyaga pintu penama nya mega bisi pengawa ti sama baka bala sida, iya nya gawa ba Rumah Jehovah.
13 Enda ngira ruang bilik sida besai tauka mit, semua sida bechabutka undi kena nentuka pintu ke patut dijaga sida.
14 Pengudah bechabutka undi, Selemiah bulih pengawa nyaga pintu tunga ke timur. Anak iya Sekariah nyadi penasihat* ti bepenemu. Sekariah bulih pengawa nyaga pintu tunga ke utara.
15 Obet-edom bulih pengawa nyaga pintu tunga ke selatan, lalu bala anak iya diberi pengawa nyaga setor.
16 Supim enggau Hosah bulih pengawa nyaga pintu tunga ke barat, semak pintu Saleket ke ngimbai jalai ke niki bukit. Ba dia, siti raban jejaga gawa berimbai enggau siti da agi raban jejaga.
17 Bisi enam iku orang Lewi ke gawa ba pintu tunga ke timur. Tiap hari, bisi empat iku orang gawa ba pintu tunga ke utara, enggau empat iku da agi orang gawa ba pintu tunga ke selatan. Lalu ba tiap iti setor, bisi dua iku jejaga ke bejaga enda jauh ari dua iku jejaga ke bukai.
18 Ba endur ke bisi atap sereta mayuh tiang, bisi dua iku jejaga ke bejaga ba dia, lalu bisi empat iku jejaga ke bejaga ba jalai besai.
19 Baka nya meh peturun Korah enggau Merari dibagi nitihka raban kena nyaga pintu penama.
20 Ari orang Lewi, Ahijah betanggungjawap nyaga endur nyimpan reta ba Rumah Petara ti bendar sereta endur nyimpan utai ke udah dikuduska.*
21 Ari peturun Ladan, iya nya suku Gerson, bisi Jehieli, iya nya tuai suku,
22 enggau dua iku anak lelaki iya ke benama Setam enggau Joel. Sida mega diasuh ngemataka endur nyimpan reta ba Rumah Jehovah.
23 Ari peturun Amram, peturun Izhar, peturun Hebron, enggau peturun Uziel,
24 bisi Sebuel. Iya tuai ke ngemataka setor. Sebuel nya ari peturun Gersom anak Moses.
25 Bala iya ari peturun Elieser nya Rehabiah, Jesayah, Joram, Sikri, enggau Selomot.
26 Selomot enggau bala iya ngemataka semua endur alai nyimpan utai ke udah dikuduska Raja David, bala tuai suku, tuai atas 1,000 iku orang, tuai atas 100 iku orang, enggau bala ketuai soldadu.
27 Sida nguduska utai ke dirampas sida maya beperang, ngambika dikena ngaduka Rumah Jehovah.
28 Sida mega nyaga semua utai ke udah dikuduska Nabi* Samuel, Saul anak Kish, Abner anak Ner, enggau Joap anak Seruyah. Nama-nama utai ke udah dikuduska deka dijaga Selomit* enggau bala iya.
29 Ari peturun Izhar, Chenaniah enggau bala anak lelaki iya diasuh nyadi pegawai enggau hakim orang Israel. Sida ngemataka pengawa bukai ba luar Rumah Petara.
30 Ari peturun Hebron, bisi Hasabiah enggau bala iya. Semua sida 1,700 iku. Semua sida ulih dikearapka. Sida ngemataka semua pengawa ke bekaul enggau sembah ngagai Jehovah sereta pengawa ke bekaul enggau raja. Sida ngemataka kawasan barat Sungai Jordan ba Israel.
31 Ari peturun Hebron, Jerijah nyadi tuai sida. Ba taun ke-40 lebuh David merintah, bala David ngiga orang ke kering sereta ulih dikearapka ba entara orang Hebron. Sida tetemuka bala orang nya ba Jaser ba Gilead.
32 Jerijah enggau bala iya bisi 2,700 iku. Semua sida tuai suku ti ulih dikearapka. Nya alai, Raja David ngelantik sida ngemataka raban bansa Reuben, raban bansa Gat, enggau setengah ari raban bansa Manasi, dalam semua pekara ke bekaul enggau sembah ngagai Petara ti bendar, sereta pengawa ke bekaul enggau raja.
Nota Kaki
^ Tauka “penyanding penemu.”
^ Tauka “utai ti diserahka ngagai Petara.”
^ Tauka “penasihat; penyanding penemu.” Ba ditu, iya merujuk ngagai orang ke nemu meda utai ti dipandangka Petara dalam runding iya.
^ Mega dikumbai Selomot ba ayat 25 enggau 26.
