Bansa Israel ti Kesatu 28:1-21
28 David ngangauka semua bala tuai orang Israel ngagai Jerusalem. Iya ngangauka bala tuai raban bansa, bala ketuai raban ke gawa ke raja, tuai atas 1,000 iku orang, tuai atas 100 iku orang, bala ketuai ke nyaga reta enggau jelu tupi ke diempu raja sereta bala anak raja. David mega ngangauka semua pegawai ke gawa ba istana, enggau semua lelaki ke kering sereta ke ulih dikearapka.
2 Udah nya, Raja David bediri lalu bejaku:
“Dingaka aku, bala menyadi enggau bala rayat aku! Aku ingin deka ngaga Rumah ti tetap ke peti lampang batu Adat Jehovah. Rumah nya deka nyadi pelasar kaki Petara kitai. Aku udah nyediaka utai kena ngaga Rumah nya.
3 Tang, Petara ti bendar madah ngagai aku: ‘Ukai nuan ke deka ngaga Rumah kena ngemuliaka nama Aku, laban nuan udah munuh kelalu mayuh orang sereta udah suah beperang.’
4 Taja pia, ari semua ruang bilik apai aku, Jehovah, Petara orang Israel, udah milih aku nyadi raja Israel belama iya. Iya milih Judah nyadi tuai, lalu ari raban bansa Judah, Iya milih ruang bilik apai aku. Ari semua bala menyadi aku, aku meh ke dipilih Iya nyadi raja serata Israel.
5 Jehovah udah meri aku mayuh anak lelaki. Ari semua sida, Iya udah milih Solomon duduk ba kerusi diraja ke diempu Jehovah lalu merintah Israel.
6 “Petara madah ngagai aku: ‘Anak nuan Solomon meh ke deka ngaga Rumah enggau laman Rumah ke Aku. Aku udah milih iya nyadi anak Aku, lalu Aku deka nyadi apai iya.
7 Aku deka negapka perintah iya belama iya enti iya nitihka pesan sereta atur Aku enggau pengabis ati baka ke digaga iya diatu.’
8 Nya alai, aku madah ba depan semua orang Israel, iya nya raban gempuru Jehovah, sereta ba depan Petara kitai: Meretika sereta ngasika semua pesan Jehovah, Petara kita, ngambika kita ulih bempu menua ti manah lalu meri menua nya ngagai bala peturun kita nyadika pesaka belama iya.
9 “Anak aku, Solomon, nuan patut ngelala Petara apai nuan. Sembah meh Iya enggau ati ti deka* sereta enggau pengabis ati laban Jehovah meresa ati semua orang, lalu Iya nemu runding sereta pengingin sida. Enti nuan ngiga Iya, Iya deka nejuka Diri ditemu nuan. Tang enti nuan ninggalka Iya, Iya mega deka ninggalka nuan belama iya.
10 Jehovah udah milih nuan ngaga Rumah nyadika endur ti kudus. Nuan mesti berani, lalu kereja meh pengawa nuan!”
11 Udah nya, David meri Solomon pelan ruang depan sereta pelan bilik, nyengkaum bilik setor, bilik ba atas, bilik ba dalam, sereta bilik alai ngampunka dosa.*
12 Iya meri Solomon semua pelan ke udah dipandangka Petara nengah kuasa kudus, iya nya pelan laman Rumah Jehovah, pelan bilik makai ngelingi Rumah nya, pelan endur nyimpan reta ba Rumah Petara ti bendar, sereta pelan endur nyimpan pekekas ke udah dikuduska.
13 Kelimpah ari nya, David meri iring ngagai Solomon bekaul enggau pengawa magi raban bala imam sereta orang Lewi, pengawa ke patut digaga sida ba Rumah Jehovah, sereta semua pekekas ke dikena bejalaika pengawa sembah ba Rumah Jehovah.
14 David meri iring pasal pemerat emas enggau pirak ke patut dikena ngaga semua pekekas ke dikena bejalaika pengawa sembah;
15 pemerat ke bemacham jenis penuduk lampu emas enggau lampu kelita emas, sereta pemerat ke bemacham jenis penuduk lampu pirak enggau lampu kelita pirak;
16 pemerat emas ke tiap iti mija alai ngengkahka roti ke ditusun belapis,* sereta pemerat pirak ke tiap iti mija pirak;
17 pemerat emas ti tulin ke gerepu, mangkuk, enggau jag, enggau pemerat ke tiap iti mangkuk emas ti mit sereta pemerat ke tiap iti mangkuk pirak ti mit.
18 David mega nentuka pemerat emas ti tulin ke patut dikena ngaga alta alai nunu menyan, sereta kena ngaga dua iku cherub ke ngerembaika sayap ti ngelindung begian atas peti lampang batu Adat Jehovah. (Cherub nya ngambarka kerita kuda Petara.)
19 David madahka: “Jehovah udah ngasuh aku meretika utai. Nya kebuah aku nemu baka ni deka nitihka semua iring kena begagaka Rumah tu ke udah ditulis aku nengah iring Iya.”
20 Udah nya, David madah ngagai anak iya, Solomon: “Nuan mesti berani sereta kuat, lalu kereja meh pengawa nuan. Anang takut tauka rawan, laban Petara Jehovah, Petara aku, bisi enggau nuan. Iya enda sekali-kali deka ninggalka nuan tauka ngelengkaka nuan. Iya deka terus enggau nuan nyentukka semua pengawa begagaka Rumah Jehovah tembu.
21 Tu meh raban bala imam sereta orang Lewi ke gawa ba Rumah Petara ti bendar. Nuan bisi mayuh pekereja ke landik ke deka nulung nuan dalam semua pengawa. Bala tuai enggau semua rayat deka nitihka semua utai ke diasuh nuan.”
Nota Kaki
^ Tauka “ati ti gaga.”
^ Tauka “bilik alai ngengkahka penutup.” Merujuk ngagai penutup peti lampang batu Adat.
^ Iya nya, roti ti diberi ngagai Petara.
