Bansa Israel ti Kesatu 29:1-30
29 Ku Raja David bejaku ngagai semua orang Israel ke begempuru ba dia: “Petara udah milih anak aku, Solomon. Tang, iya agi biak lalu nadai pengalaman. Pengawa tu besai laban Rumah Sembiang* tu ukai digaga ke mensia, tang ke Petara Jehovah.
2 Aku udah bebendar nyediaka utai ke deka dikena nirika Rumah Petara. Aku udah nyediaka emas, pirak, temaga, besi, kayu, batu oniks, batu ke bechampur enggau semin, batu ke mayuh macham warna kena ngias, semua bansa batu ti berega, enggau batu alabaster* ti mayuh.
3 Kelimpah ari nya, ketegal aku rinduka Rumah Petara, aku mega udah meri emas enggau pirak ari reta aku empu.
4 Aku mega udah meri 3,000 talenta* emas ari Opir enggau 7,000 talenta pirak ti tulin kena ngelapis dinding Rumah nya
5 sereta kena ngaga barang emas enggau pirak ke patut digaga bala tukang ke landik. Nya alai, sapa ari bala kita ke deka meri utai ngagai Jehovah seharitu?”
6 Nya alai, tuai suku, tuai raban bansa, tuai atas 1,000 iku orang, tuai atas 100 iku orang, enggau ketuai ke gawa ke raja, datai meri utai enggau sukarela.
7 Sida meri utai tu kena nirika Rumah Petara ti bendar: 5,000 talenta emas, 10,000 darik,* 10,000 talenta pirak, 18,000 talenta temaga, enggau 100,000 talenta besi.
8 Semua orang ke bisi batu ti berega mai batu nya ngagai endur nyimpan reta Rumah Jehovah ke dijaga Jehiel, orang Gerson.
9 Sida gaga ati ulih meri enggau sukarela laban sida meri nya ngagai Jehovah enggau pengabis ati. Raja David mega amat gaga ati.
10 Udah nya, David muji Jehovah ba depan semua orang ke begempuru ba dia. Ku David: “O Jehovah, Petara aki ini kami orang Israel, awakka Nuan dipuji belama iya.
11 O Jehovah, Nuan endang besai, bekuasa, bemulia, pemadu manah, sereta dipebasa. Semua utai ba langit enggau ba dunya endang enggi Nuan magang. O Jehovah, Nuan meh ke merintah sereta ke nguasa semua utai.
12 Semua pengaya enggau mulia datai ari Nuan, lalu Nuan bekuasa atas semua utai. Nuan bisi kuasa enggau pengering, lalu ulih ngasuh orang nyadi kering.
13 O Petara kami, diatu kami deka meri terima kasih ngagai Nuan lalu muji nama Nuan ti bemulia.
14 “Tang, sapa meh aku enggau rayat aku tu nyentukka kami ulih meri utai enggau sukarela baka tu? Semua utai endang datai ari Nuan, lalu utai ke diberi kami ngagai Nuan datai ari Nuan Empu.
15 Baka aki ini kami, kami semina orang asing lalu diau enda lama ba depan Nuan. Pengidup kami ba dunya tu baka ayuk lalu nadai harapan.
16 O Jehovah, Petara kami, kami udah nyediaka mayuh utai ti berega kena ngaga Rumah ke Nuan sereta ke nama Nuan ti kudus. Semua utai nya datai ari Nuan magang, lalu semua utai nya endang enggi Nuan.
17 O Petara aku, aku nemu Nuan meresa ati orang, lalu Nuan lantang ati enggau orang ke setia. Ari ati ti ikhlas, aku meri semua utai ti berega nya ngagai Nuan. Aku amat gaga ati laban meda bala nembiak Nuan begempuru ba ditu, meri utai ngagai Nuan enggau sukarela.
18 O Jehovah, Petara aki ini kami, Abraham, Isak, enggau Israel. Tulung meh bala nembiak Nuan tu ngambika sida deka terus meri enggau sukarela sereta deka nyembah Nuan enggau pengabis ati.
19 Tulung meh anak aku, Solomon, ngambika iya nitihka pesan, atur, enggau utai ke diasuh Nuan enggau pengabis ati. Tulung meh iya ngereja semua nya sereta nirika Rumah Sembiang nya ngena semua utai ke udah disediaka aku.”
20 Udah nya, David bejaku ngagai semua orang ke ba dia: “Diatu, puji meh Jehovah, Petara kita.” Nya alai, semua sida muji Jehovah, Petara aki ini sida, lalu sida besugang ba depan Jehovah enggau ba depan Raja David.
21 Hari siti, sida nyerahka pemeri tunu ngagai Jehovah enggau pemeri ke bukai ngagai Jehovah. Sida nyerahka 1,000 iku anak sapi lelaki, 1,000 iku bedus lelaki, 1,000 iku anak bedus lelaki, enggau pemeri wain. Sida nyerahka mayuh amat pemeri ngarika semua orang Israel.
22 Ba hari nya, sida makai ngirup ba depan Jehovah enggau gaga ati. Udah nya, sida ngelantik Solomon anak David, nyadi raja kali kedua. Sida nata iya nyadi tuai ba depan Jehovah, lalu Sadok nyadi imam.
23 Solomon duduk ba kerusi diraja Jehovah nganti apai iya, David. Iya nyadi raja ti mujur, lalu semua orang Israel ngasika iya.
24 Semua bala tuai, bala soldadu ti kering, enggau bala anak Raja David ke bukai nunduk ngagai Raja Solomon.
25 Jehovah ngasuh Solomon balat dipebasa semua orang Israel, lalu Iya meri Solomon mulia ke enda kala dikembuan bala raja Israel ke bukai sebedau iya.
26 Baka nya meh David anak Jesi merintah serata Israel.
27 Iya merintah Israel pengelama 40 taun. Ba Hebron iya merintah pengelama 7 taun, lalu ba Jerusalem iya merintah pengelama 33 taun.
28 Iya mati lebuh iya nyau udah tuai. Iya puas ati ulih idup lama. Iya raja ti kaya sereta dipebasa orang. Udah nya, anak iya, Solomon, nganti iya nyadi raja.
29 Sejarah pasal pengidup Raja David, ari pun sampai ujung, bisi ditulis Nabi* Samuel, Nabi Natan, enggau Gat ke nemu meda utai ti dipandangka Petara dalam runding.
30 Sida nulis pasal chara iya merintah, pengering iya, enggau pasal semua utai ke udah nyadi ba iya, ba orang Israel, sereta ba semua perintah bukai ke ngelingi iya.
Nota Kaki
^ Tauka “istana.”
^ Peda Penerang Leka Jaku.
^ Peda Rujukan B14.
^ Iya nya, duit seling emas Persia. Peda Rujukan B14.
^ Tauka “penasihat; penyanding penemu.” Ba ditu, iya merujuk ngagai orang ke nemu meda utai ti dipandangka Petara dalam runding iya.
