Bansa Israel ti Kesatu 5:1-26
5 Reuben, anak tuai Israel, bisi anak lelaki. Taja pan iya anak tuai, tang iya lenyau hak nyadi anak tuai laban iya udah tinduk* enggau siku ari bini apai iya. Hak iya ke nyadi anak tuai diberi ngagai bala anak lelaki Josep, anak Israel. Nya alai, ba tusut peturun sida, nama iya enda direjista nyadi anak tuai.
2 Judah bisi penuduk ke tinggi agi ari bala menyadi iya, lalu ari raban bansa iya, siku pemerintah deka ada. Tang, hak nyadi anak tuai diempu Josep.
3 Reuben, anak tuai Israel, bisi beberapa iku anak lelaki. Bala anak lelaki Reuben nya Hanok, Pallu, Hesron, enggau Karmi.
4 Anak lelaki Joel nya Semayah, anak lelaki Semayah nya Gok, anak lelaki Gok nya Shimei,
5 anak lelaki Shimei nya Mikah, anak lelaki Mikah nya Riayah, anak lelaki Riayah nya Baal, lalu anak lelaki Baal nya Birah.
6 Birah nya tuai peturun Reuben. Iya ditangkap Tilgat-pilneser, raja Asiria.
7 Nitihka tusut peturun ruang bilik sida, bala menyadi Birah nya Jiel (tuai sida), Sekariah,
8 enggau Bila. Bila nya anak Asas, Asas nya anak Shema, lalu Shema nya anak Joel. Ruang bilik Bila diau ba kawasan Aroer nyentuk ngagai Nebo enggau Baal-meon.
9 Sida bisi mayuh amat jelu tupi ba Gilead. Nya alai, sida diau ba kawasan tunga ke timur nyentuk ngagai jalai ke nuju ngagai menua puang ba Sungai Eupratis.
10 Maya jeman Raja Saul, orang ari raban bansa Reuben nyerang orang Hagri lalu ngalahka sida. Udah nya, sida diau ba langkau kain orang Hagri ba serata kawasan timur Gilead.
11 Peturun Gat diau semak enggau peturun Reuben, iya nya ari Basan nyentuk ngagai Salekah.
12 Ba Basan, tuai sida nya Joel. Orang kedua nya Sapam, lalu bisi mega Janai enggau Sapat.
13 Sida bisi tujuh iku bala ari suku sida empu ke bukai, iya nya Mikael, Mesulam, Sheba, Jorai, Jakan, Sia, enggau Eber.
14 Tu bala anak lelaki Abihail anak Huri. Huri nya anak Jaroah, Jaroah nya anak Gilead, Gilead nya anak Mikael, Mikael nya anak Jesisai, Jesisai nya anak Jahdo, lalu Jahdo nya anak Baz.
15 Ahi anak Abdiel, uchu Guni, nyadi tuai suku sida.
16 Sida diau ba Gilead, ba Basan enggau kuta-kuta ke ngelingi iya, sereta ba semua padang rumput Saron nyentuk ngagai sempadan iya.
17 Semua sida direjista nitihka tusut peturun maya jeman Jotam, raja Judah, enggau maya jeman Jeroboam,* raja Israel.
18 Raban bansa Reuben, raban bansa Gat, enggau setengah ari raban bansa Manasi bisi 44,760 iku soldadu ti kering ke landik beperang. Sida mai terabai enggau pedang, sereta landik nimbakka anak panah.
19 Sida beperang ngelaban orang Hagri, Jetur, Napis, enggau Nodap.
20 Lebuh sida ngelaban orang Hagri, Petara nulung sida lalu nyerahka orang Hagri enggau semua orang ke setanah enggau orang Hagri ngagai sida. Petara ngamatka utai ke dipinta sida, laban sida arapka Iya sereta besampi minta tulung ari Iya.
21 Sida ngerampas 50,000 iku unta, 250,000 iku bedus, enggau 2,000 iku keledai. Sida mega nangkap 100,000 iku orang.
22 Mayuh amat orang mati ba perang nya, laban Petara ti bendar beperang ngarika sida. Sida diau ba dia nyentukka sida dibuai ari endur nya.
23 Bala peturun ari setengah raban bansa Manasi amat mayuh, lalu sida diau ba kawasan ari Basan sampai Baal-hermon, Senir, enggau Gunung Hermon.
24 Tu meh bala tuai suku sida: Eper, Ishi, Eliel, Azriel, Jeremiah, Hodabiah, enggau Jahdiel. Sida soldadu ti kering sereta tuai suku ti tebilang.
25 Tang, sida enda setia ngagai Petara aki ini sida. Baka pelacur, sida nyembah petara ke disembah orang bansa bukai, ke udah dibunuh Petara ba depan sida.
26 Nya alai, Petara orang Israel nyungkak ati Raja Pul ari Asiria (iya nya Raja Tilgat-pilneser ari Asiria). Raja nya pan ngalahka raban bansa Reuben, raban bansa Gat, enggau setengah ari raban bansa Manasi, lalu nabanka sida ngagai Halah, Habor, Hara, enggau Sungai Gosan, lalu sida diau ba dia sampai ke seharitu.
