Satu John 3:1-24
3 Peda pemesai pengerindu Apai ngagai kitai nyentukka kitai patut dikumbai bala anak Petara! Kitai endang bala anak Iya. Tang dunya enda ngelala kitai laban sida enda ngelala Iya.
2 Bala menyadi ti dikerindu, diatu kitai bala anak Petara. Tang kitai bedau nemu enggau terang nama deka nyadi ngagai kitai. Kitai nemu lebuh Petara mandangka Diri, kitai deka nyadi baka Iya, laban kitai deka meda baka ni gaya Iya kebendar nya.
3 Semua orang ke enggau andal nganti utai nya ari Kristus,* deka ngasuh diri tuchi laban iya mega tuchi.
4 Tiap iku orang ke ngereja dosa mega ngelanggar adat, laban dosa reti iya ngelanggar adat.
5 Kita mega nemu Jesus Kristus udah datai kena muai dosa kitai, lalu iya nadai dosa.
6 Tiap iku orang ke terus beserakup enggau iya enda terus ngereja dosa. Orang ke ngereja dosa enda kala meda iya, lalu sida mega enda ngelala iya.
7 Bala anak, anang nejuka sapa-sapa nesatka kita. Orang ke ngereja utai ti betul nya orang ti lurus, sama baka Jesus ke mega lurus.
8 Orang ke terus ngereja dosa nitihka Sitan,* laban Sitan udah bedosa kenyau ari pun. Ketegal nya meh Anak Petara datai, iya nya kena nganchurka pengawa Sitan.
9 Tiap iku anak Petara enda terus ngereja dosa, laban benih* Petara bisi ba sida, lalu sida enda ulih terus ngereja dosa laban sida anak Petara.
10 Tu meh bida ti terang entara anak Petara enggau anak Sitan. Barang sapa ke enda terus ngereja utai ti lurus enda nitihka Petara, pia mega enggau orang ke enda rinduka menyadi diri.
11 Nya ketegal tu meh pesan ke udah didinga kita kenyau ari pun, iya nya kitai patut rinduka pangan diri,
12 ukai baka Kain ke nitihka Sitan lalu munuh menyadi iya empu. Nama kebuah iya munuh menyadi iya empu? Nya ketegal pengawa iya jai, tang pengawa menyadi iya lurus.
13 Bala menyadi, anang tekenyit enti dunya begedika kita.
14 Kitai nemu kitai baka ke udah mati tang diatu kitai idup baru, laban kitai rinduka bala menyadi. Orang ke enda rinduka bala menyadi diri agi mengkang mati.
15 Tiap iku orang ke begedika menyadi diri nya pemunuh, lalu kita nemu pemunuh tentu enda ulih nerima pengidup ti meruan belama iya.
16 Kitai mereti pasal pengerindu ketegal siku nya ke udah nyerahka nyawa diri ketegal kitai. Nya alai, kitai pan mesti sanggup nyerahka nyawa diri ketegal bala menyadi kitai.
17 Barang sapa ke bisi chukup utai kena beridup, tang enggai ngayanka pengasih ngagai menyadi diri lebuh iya meda menyadi iya begunaka bantu, kati ulih kitai ngumbai iya rinduka Petara?
18 Bala anak, kitai patut ngayanka pengerindu, ukai aja nengah leka jaku tauka nengah mulut, tang kitai patut ngayanka nya ari ati nengah pengawa kitai.
19 Baka nya meh chara kitai nemu kitai bisi pemendar, lalu kitai deka ngasuh ati kitai pechaya* Petara rinduka kitai,
20 taja pan ati kitai engka nyalahka kitai. Nya ketegal Petara besai agi ari ati kitai,* lalu Iya nemu semua utai.
21 Bala menyadi ti dikerindu, enti ati kitai enda nyalahka kitai, kitai enda nangi* bejaku enggau Petara.
22 Nama-nama utai ke dipinta kitai ari Iya deka diterima kitai, laban kitai ngasika pesan Iya lalu ngereja utai ke ngelantangka ati Iya.
23 Tu meh pesan Iya: Kitai patut arapka nama Anak Iya, Jesus Kristus, lalu rinduka pangan diri baka ke udah dipadahka pesan Iya ngagai kitai.
24 Nambahka nya, orang ke ngasika pesan Iya deka mengkang beserakup enggau Iya, lalu Iya deka beserakup enggau orang nya. Nengah kuasa kudus ke diberi Iya ngagai kitai, kitai nemu Iya mengkang beserakup enggau kitai.
Nota Kaki
^ Tauka “Petara.”
^ Jaku Gerika, “di·a′bo·los.” Leka jaku tu dikena ba orang ke ngenyaika nama manah orang bukai.
^ Iya nya, benih ke ulih meri pengidup ti baru.
^ Tauka “andal; kitai deka ngumbuk ati kitai ngambika nemu.”
^ Tauka “Petara ngelala kitai manah agi ari kitai empu.”
^ Peda Penerang Leka Jaku, “Bejaku enggau berani.”
