Satu Korint 4:1-21
4 Orang patut ngumbai kami tu ulun Kristus sereta pengurus resia kudus Petara.
2 Ba pekara nya, siku pengurus patut tetap ati bejalaika pengawa.
3 Aku enda irau enti kita tauka kot mensia ngakim aku. Kebendar iya, aku empu pan enda ngakim diri empu.
4 Ke temu aku, aku nadai ngereja nama-nama penyalah. Taja pia, nya ukai reti iya aku tu lurus, laban Jehovah meh ke deka ngakim aku.
5 Nya alai, anang ngakim sapa-sapa sebedau maya iya datai, sebedau Tuan datai. Iya deka mandangka resia ke dilalaika dalam pemetang sereta mantaika pengingin ati mensia. Maya nya, tiap iku orang deka nerima puji ke patut diterima iya ari Petara.
6 Bala menyadi, lebuh nyebut utai nya, aku ngena aku empu enggau Apollos nyadika chunto, ngambika kita meretika jaku lalau tu: “Anang ngereja utai ngelui ari utai ke ditulis,” ngambika kita enda sumbung tauka ngumbai sekeda orang manah agi ari orang bukai.
7 Nama utai ke ngasuh kita lain ari orang bukai? Endaka semua utai ke dikemisi kita nya endang utai ke diberi ngagai kita? Nyadi, enti utai nya diberi ngagai kita, nama kebuah kita temegahka diri baka ke kita empu ke ngulihka utai nya?
8 Kati kita udah puas ati? Kati kita udah nyadi kaya? Kati kita udah dulu agi merintah ari kami nyadi raja? Aku endang ngarapka kita udah merintah nyadi raja, ngambika kami mega ulih merintah nyadi raja begulai enggau kita.
9 Ba aku, Petara udah ngasuh kami, bala rasul, nyadi orang ke deka diukum bunuh. Iya dudi mandangka kami ba mua orang mayuh, laban kami baka pelakun ba cherita ke dipeda dunya, melikat, enggau mensia.
10 Kami beli laban nitihka Kristus, tang kita bepenemu-dalam laban nitihka Kristus. Kami lemi, tang kita kering. Kita dipebasa, tang kami dikelese.
11 Nyentuk ke diatu, kami agi lapar, aus, nadai chukup gari,* dipalu, nadai endur diau,
12 lalu kami mega patut bebendar gawa. Lebuh orang ngeleseka kami, kami merekatka sida. Lebuh orang merinsaka kami, kami ngenatka nya enggau sabar.
13 Lebuh orang bejaika kami, kami nyaut enggau nelap. Nyentuk ke diatu, kami nyadi baka sampah dunya, utai ti kamah ke dibuai orang.
14 Aku nulis semua utai tu ukai kena ngemaluka kita, tang kena ngajar kita, laban kita baka anak ke dikesayauka aku.
15 Taja pan kita bisi 10,000 iku pengajar ke ngajar kita pasal chara nitihka Kristus, tang kita nadai mayuh apai. Aku nyadi baka apai ke kita, laban aku mai Berita Manah pasal Jesus Kristus ngagai kita.
16 Nya alai, aku bebendar minta kita nitihka teladan aku.
17 Nyadi diatu, aku nganjung Timoti ngagai kita, laban iya meh anak ke dikesayauka aku, lalu iya tetap ati gawa ke Tuan. Iya deka ngingatka kita pasal chara aku gawa ke Jesus Kristus, baka ke diajar aku ngagai tiap iti raban gempuru ba dini-dini endur.
18 Sekeda orang nyadi sumbung, laban ngumbai aku enda datai ngagai kita.
19 Tang enti nya peneka Jehovah, aku deka datai ngagai kita enda lama da agi. Aku deka meda sida ke sumbung nya, ukai ngambika aku nemu utai ke disebut sida, tang ngambika aku nemu sekalika sida diiring kuasa kudus Petara tauka enda.
20 Nya ketegal Perintah Petara enda bepanggai ba jaku, tang ba kuasa Petara.
21 Ni pilih kita? Kita deka aku datai mai rutan tauka mai pengerindu enggau penelap?
Nota Kaki
^ Jaku Asal, “telanjai.”
