Satu Korint 6:1-20
6 Lebuh charut enggau pangan diri, nama kebuah kita sanggup mai pekara nya ngagai kot ngambika diakim orang ke enda lurus, tang ukai diakim nembiak Petara ti kudus?
2 Kati kita enda nemu, nembiak Petara ti kudus deka ngakim dunya? Enti kita nya ke deka ngakim dunya tu, enda patut kita enda ulih ngakim pekara ke mit nya.
3 Endaka kita nemu, kitai deka ngakim bala melikat? Enti pia, nama kebuah kita enda ulih ngakim penanggul ba pengidup tu?
4 Enti bisi penanggul ba pengidup tu ke patut diakim, nama kebuah kita ngasuh orang ke dikemaruhka raban gempuru nyadi hakim kita?
5 Aku nyebut munyi nya ngambika kita nemu malu. Enda patut nadai siku ari bala kita nya ke bepenemu-dalam lalu enda ulih mutarka penyarut bala menyadi iya.
6 Tang diatu, kita indah mai menyadi kita ngagai kot ngambika diakim orang ke enda arap!
7 Kebendar iya, kita udah alah lebuh kita bedawaka pangan diri ba kot. Nama kebuah kita enda nejuka orang nyalahka kita? Nama kebuah kita enda nejuka diri ditipu orang?
8 Tang kita empu ke nipu sereta nyalahka bala menyadi kita!
9 Kati kita enda nemu, orang ke enda lurus enda ulih bempu Perintah Petara? Anang nipu diri empu. Orang ke ngereja ulah seks ti kamah,* orang ke nyembah engkeramba, orang ke butang,* lelaki ke nejuka lelaki bukai ngereja ulah seks enggau iya, lelaki ke ngereja ulah seks enggau lelaki bukai,*
10 orang ke ngenchuri, orang ke amu, orang ke pemabuk, orang ke udu nyumpah orang,* sereta orang ke ngerampas utai orang bukai, enda ulih bempu Perintah Petara.
11 Suba, sekeda ari kita pan baka nya. Tang dalam nama Tuan Jesus Kristus sereta nengah kuasa kudus Petara, diatu kita udah dituchi, dikuduska, lalu dikumbai lurus.
12 Aku dikemendarka ngereja semua utai, tang ukai semua nya meri penguntung. Taja pan aku dikemendarka ngereja semua utai, tang aku enda nejuka diri dikuasa nama-nama utai.
13 Pemakai disediaka ke perut, lalu perut digaga ke pemakai, tang Petara deka ngasuh kedua-dua nya nadai agi. Tubuh kitai ukai dikena ngereja ulah seks ti kamah,* tang dikena gawa ke Tuan kitai, lalu Tuan kitai deka ngintu tubuh kitai.
14 Petara udah ngidupka Tuan kitai ari mati, lalu Iya mega deka ngidupka kitai ari mati ngena kuasa Iya.
15 Kati kita enda nemu, tubuh kita nya perengka tubuh Kristus? Enti pia, patut aku ngambi perengka tubuh Kristus lalu ngaga iya nyadi perengka tubuh indu sundal? Sigi enda patut!
16 Endaka kita nemu, barang sapa ke ngereja ulah seks enggau indu sundal udah nyadi siti tubuh enggau iya? Ku Petara bejaku: “Seduai iya deka nyadi siti tubuh.”
17 Tang barang sapa ke beserakup enggau Tuan kitai, runding iya deka nyadi sama enggau runding Tuan kitai.
18 Rari ari ulah seks ti kamah!* Dosa bukai enda ngamahka tubuh, tang ulah seks ti kamah ngamahka tubuh.
19 Endaka kita nemu, tubuh kita nya rumah sembiang kuasa kudus Petara ke ba dalam kita? Kuasa kudus nya diberi Petara ngagai kita. Kita patut nemu, kita ukai enggi diri empu agi,
20 laban kita udah dibeli ngena rega ti mar. Nya alai, muliaka meh Petara ngena tubuh kita.
Nota Kaki
^ Peda Penerang Leka Jaku.
^ Orang ti udah kawin ngereja ulah seks enggau orang ke ukai kaling pengidup iya.
^ Tauka “lelaki ke ngereja pengawa homoseksual.”
^ Tauka “udu bejaika orang.”
^ Jaku Gerika, “por·nei′a.” Peda Penerang Leka Jaku.
^ Jaku Gerika, “por·nei′a.” Peda Penerang Leka Jaku.
