1 Raja 11:1-43
11 Raja Solomon rinduka mayuh indu orang bansa bukai. Kelimpah ari anak indu Firaun, iya mega rinduka indu bansa Moap, Amon, Edom, Sidon, enggau Het.
2 Bekaul enggau bansa nya, Jehovah kala madah ngagai orang Israel: “Anang begulai* enggau sida, lalu sida mega enda tau begulai enggau kita, laban sida tentu deka ngasuh ati kita limpang nyembah petara sida.” Tang Solomon rapat amat enggau sida, lalu iya amat sayauka sida.
3 Iya bisi 700 iku bini ari ruang bilik diraja enggau 300 iku gundik. Nyau kelama, bala bini iya ngasuh ati iya limpang ari Petara.
4 Lebuh Solomon udah tuai, bala bini iya ngelimpangka ati iya nyembah petara bukai. Iya enda baka apai iya David, ke nyembah Jehovah, Petara iya, enggau pengabis ati.
5 Solomon nyembah Astoret, iya nya petara orang Sidon, enggau Molek, iya nya petara orang Amon ke dipegedika Petara.
6 Solomon ngereja utai ti jai ba mata Jehovah. Iya enda baka apai iya, David, ke nyembah Jehovah enggau pengabis ati.
7 Ba gunung depan Jerusalem, Solomon ngaga endur nyembah Kemos, petara orang Moap ti kamah ba mata Petara ti bendar, enggau ke Molek, petara orang Amon ti kamah ba mata Petara ti bendar.
8 Nya meh utai ke digaga Solomon ke bala bini iya ke orang bansa bukai. Ba dia sida nyerahka pemeri ngagai petara sida, lalu nunu pemeri nya nyentukka asap niki ke atas.
9 Jehovah balat ringat ngagai Solomon laban ati Solomon udah limpang ari Jehovah, Petara orang Israel, ke udah ngayanka Diri ngagai Solomon dua kali.
10 Petara mega udah ngingatka Solomon, iya enda tau nyembah petara bukai, tang Solomon enda ngasika pesan Jehovah.
11 Jehovah madah ngagai Solomon: “Ketegal nuan udah ngereja utai nya, ngelanggar sempekat tua, lalu enda ngasika atur Aku, Aku tentu deka ngambi perintah nuan lalu meri nya ngagai siku ari pegawai nuan.
12 Tang ketegal semaya Aku enggau apai nuan David, Aku enda ngereja nya lebuh nuan agi idup. Aku deka ngambi perintah nya ari anak nuan lebuh iya merintah.
13 Taja pia, Aku enda ngambi semua perintah nya. Aku deka meri siti raban bansa Israel* ngagai anak nuan, ketegal nembiak Aku, David, enggau ketegal Jerusalem, kuta ke udah dipilih Aku.”
14 Jehovah ngasuh Hadat, orang Edom, angkat ngelaban Solomon. Hadat nya ari ruang bilik diraja Edom.
15 Lebuh David ngalahka Edom, Joap, iya nya ketuai soldadu orang Israel, nguburka semua orang ke mati dibunuh, lalu iya nguji munuh semua lelaki ba Edom.
16 (Joap enggau semua bala soldadu Israel diau ba dia pengelama enam bulan, sampai semua lelaki ba Edom dipunaska iya magang.)
17 Tang, Hadat enggau beberapa iku ulun apai iya ke bansa Edom ngerarika diri ngagai Ejip. Maya nya, Hadat agi mit.
18 Sida mupuk ari Midian lalu datai ba Paran. Sida mai beberapa iku orang ari Paran lalu datai ba Ejip. Firaun, iya nya raja Ejip, meri iya rumah, pemakai, enggau tanah.
19 Firaun amat rinduka Hadat sampai ke iya meri menyadi bini iya nyadika bini Hadat. Bini Firaun nya Kuin* Tahpenes.
20 Pengudah sesiti timpuh, bini Hadat ngadaka siku anak lelaki. Nama iya Genubat. Tahpenes ngemesaika iya ba istana Firaun, lalu Genubat diau ba istana nya begulai enggau bala anak Firaun.
21 Lebuh Hadat ba Ejip, iya bisi ninga pasal David udah nadai. Lalu Joap, iya nya ketuai soldadu Israel, mega udah nadai. Nyadi, Hadat pan madah ngagai Firaun: “Awakka aku pulai ngagai menua aku empu.”
22 Tang, ku Firaun madah ngagai iya: “Nama kebuah nuan deka pulai? Kati bisi utai kurang lebuh nuan ke diau enggau aku?” Ku Hadat nyaut iya: “Nadai, tang awakka aku pulai.”
23 Petara mega ngasuh Reson anak Eliada angkat ngelaban Solomon. Reson udah ngerarika diri ari tuan iya, Hadadeser, iya nya raja Sobah.
24 Reson ngempuruka orang lalu nyadi ketuai raban perumpak. Pengudah David ngalahka sida, sida ngagai Damaskus. Sida diau ba dia, lalu berengkah merintah Damaskus.
25 Ba sepemanjai pengidup Solomon, Reson enda ngetu-ngetu ngelaban orang Israel. Baka Hadat, iya mega mai penusah ngagai orang Israel. Iya begedika orang Israel lebuh iya merintah ba Siria.
26 Bisi siku lelaki Efraim ari Zereda ke benama Jeroboam anak Nebat, mega angkat ngelaban Raja Solomon. Iya pegawai Solomon, lalu indai iya siku indu balu ke benama Seruah.
27 Tu meh kebuah iya ngelaban raja: Solomon udah ngaga Bukit* sereta negapka agi Kuta David, iya nya kuta apai iya.
28 Jeroboam nya siku lelaki ke landik ngereja pengawa. Nya alai, Solomon ngasuh iya ngemataka semua peturun Josep ke wajib gawa ke raja.
29 Bisi sekali, lebuh Jeroboam pansut ari Jerusalem, iya betemu enggau Nabi Ahijah, orang Siloh, ba rantau jalai. Maya nya, Ahijah ngena baju jubah iya ti baru, lalu semina seduai iya aja ba padang.
30 Ahijah muka baju jubah iya nya lalu nyarikka iya ngagai 12 iti begian.
31 Udah nya, iya madah ngagai Jeroboam:
“Ambi meh 10 iti begian baju jubah aku tu, laban Jehovah, Petara orang Israel, udah madah: ‘Aku deka ngambi perintah Solomon ari jari iya, lalu meri nuan 10 iti raban bansa Israel.
32 Tang, siti raban bansa deka mengkang enggi Solomon ketegal nembiak Aku, David, enggau ketegal Jerusalem, kuta ke udah dipilih Aku ari serata kawasan raban bansa Israel.
33 Aku ngereja nya laban sida udah ninggalka Aku, lalu besugang ngagai Astoret, petara orang Sidon, ngagai Kemos, petara orang Moap, enggau ngagai Molek, petara orang Amon. Sida enda nitihka jalai Aku. Sida enda ngereja utai ti betul ba mata Aku, lalu enda ngasika atur Aku. Sida enda baka David, apai Solomon.
34 Tang, Aku enda ngambi semua perintah nya ari Solomon. Ketegal nembiak ke udah dipilih Aku, David, ke udah ngasika atur enggau pesan Aku, Aku deka nejuka Solomon nyadi ketuai ba Israel sepemanjai pengidup iya.
35 Aku deka ngambi perintah nya ari anak Solomon, lalu meri 10 iti raban bansa Israel ngagai nuan.
36 Aku deka meri siti raban bansa Israel ngagai anak lelaki iya ngambika nembiak Aku, David, seruran bisi siku peturun ke deka mengkang merintah* ba depan Aku ba Jerusalem, iya nya kuta ke udah dipilih Aku alai ngengkahka nama Aku.
37 Aku deka ngelantik nuan nyadi raja orang Israel, lalu nuan deka merintah atas semua utai ke dikedekaka nuan.
38 Enti nuan ngasika semua jaku Aku, nitihka jalai Aku, ngereja utai ti betul ba mata Aku, sereta ngasika atur enggau pesan aku, baka ke digaga nembiak Aku, David, Aku deka enggau nuan. Aku deka ngaga siti rumah ke tan lama ke nuan, baka ke digaga Aku ke David. Aku mega deka ngasuh nuan merintah atas Israel.
39 Ketegal dosa Solomon, Aku deka ngemaruhka peturun David, tang enda belama iya.’”
40 Solomon nguji munuh Jeroboam, tang Jeroboam ngerarika diri ngagai Raja Sisak ba Ejip. Iya diau ba din sampai Solomon mati.
41 Sejarah bukai pasal Solomon, iya nya pasal semua utai ke udah digaga iya enggau penemu-dalam iya, bisi ditulis ba bup sejarah pasal Raja Solomon.
42 Solomon merintah serata Israel ba Jerusalem pengelama 40 taun.
43 Solomon mati lalu dikuburka ba Kuta David, iya nya kuta apai iya. Rehoboam, anak lelaki Solomon, nganti iya nyadi raja.
Nota Kaki
^ Tauka “Anang jadi.”
^ Engka merujuk ngagai raban bansa Benjamin ke deka mengkang enggau raban bansa Judah.
^ Ukai kuin ke merintah.
^ Jaku Hebrew, mil·lohʼ′ ke mai reti “tugung tanah.”
^ Jaku Asal, “bisi siti lampu kelita.”
