1 Raja 14:1-31
14 Bisi sekali, Abijah, iya nya anak lelaki Jeroboam, sakit.
2 Nya alai, Jeroboam madah ngagai bini iya: “Mupuk nuan ngagai Siloh. Menyamar ngambika nadai orang ngelala nuan nya bini aku. Ba din bisi Nabi Ahijah. Iya meh nabi ke kala madah aku deka nyadi raja orang Israel.
3 Bai 10 tuku roti, kek, enggau sebutul madu. Mupuk ngagai nabi nya lalu iya deka madah ngagai nuan utai ke deka nyadi ngagai anak tua.”
4 Bini Jeroboam pan ngereja utai ke diasuh laki iya. Iya mupuk ngagai Siloh, lalu datai ba rumah Ahijah. Ahijah enda ulih meda agi laban iya udah kelalu tuai.
5 Tang, Jehovah udah madah ngagai Ahijah: “Bini Jeroboam deka datai betemu enggau nuan, lalu nanya pasal utai ke deka nyadi ngagai anak lelaki iya ke benung sakit. Iya menyamar lebuh iya datai. Aku deka madah ngagai nuan utai ke patut disebut nuan ngagai iya.”
6 Lebuh Ahijah ninga munyi redup tapa kaki indu nya bejalai ba mua pintu, iya lalu madah: “Tama meh bini Jeroboam. Nama kebuah nuan menyamar? Petara udah ngasuh aku madahka berita ti enda manah ngagai nuan.
7 Mupuk lalu padah ngagai Jeroboam: ‘Tu utai ke dipadah Jehovah, Petara orang Israel: “Aku udah milih nuan ari semua orang nyadi tuai nembiak Aku, orang Israel.
8 Aku deka ngambi perintah ari ruang bilik David, lalu meri perintah nya ngagai nuan. Tang, nuan enda baka nembiak Aku, David, ke seruran ngasika pesan Aku, nitihka Aku enggau pengabis ati, lalu ngereja utai ti betul ba mata Aku.
9 Tang, pengawa nuan jai agi ari semua orang ke sebedau nuan. Nuan ngaga petara bukai ke nuan empu sereta ngaga patung ari besi kena ngemediska ati Aku. Nuan udah nulak Aku!
10 Nya kebuah Aku deka ngasuh peturun Jeroboam ditinggang penusah. Aku deka ngemunaska semua lelaki Israel ke datai ari peturun Jeroboam, nyengkaum sida ke lemi enggau nadai daya. Aku deka ngemunaska abis lengis semua peturun Jeroboam, baka orang ke muai tai sampai nadai bekau agi!
11 Semua ruang bilik Jeroboam ke mati ba dalam kuta deka diempa ukui, lalu semua ruang bilik Jeroboam ke mati ba luar kuta deka diempa burung ba langit, laban Jehovah Empu udah bejaku.”’
12 “Angkat lalu pulai meh ke rumah nuan. Lebuh nuan datai ba kuta, anak nuan deka mati.
13 Semua orang Israel deka tusah ati ke pemati iya, lalu nguburka iya. Semina iya siku aja ari ruang bilik Jeroboam ke deka dikuburka, laban Jehovah, Petara orang Israel, bisi meda utai ti manah ba iya.
14 Jehovah deka ngelantik siku raja orang Israel ke deka ngemunaska ruang bilik Jeroboam lebuh maya nya datai ila. Iya ulih ngereja nya diatu enti Iya ka.
15 Jehovah deka ngemunaska orang Israel, lalu sida deka baka rumput ke dikebuka kin kia dalam ai. Iya deka nyabut bansa Israel ari tanah ti manah tu, ke udah diberi Iya ngagai aki ini sida. Iya deka ngasuh sida ngachir sampai ngagai seberai sungai,* laban sida udah ngaga tiang kayu keramat ke ngemediska ati Jehovah.
16 Petara deka ninggalka orang Israel ketegal dosa ke udah digaga Jeroboam sereta ketegal iya udah ngasuh orang Israel bedosa.”
17 Udah nya, bini Jeroboam pan mupuk lalu datai ba Tirsah. Lebuh iya tama ke rumah, anak iya pan lalu mati.
18 Nya alai, sida nguburka anak nya, lalu semua orang Israel tusah ati ke pemati iya, baka ke dipadah Jehovah nengah nembiak Iya, Nabi Ahijah.
19 Sejarah bukai pasal Jeroboam, iya nya pasal chara iya beperang enggau chara iya merintah, bisi ditulis ba bup sejarah pasal jeman bala raja Israel.
20 Jeroboam merintah pengelama 22 taun. Udah nya, iya mati lalu anak iya ke benama Nadap nganti iya nyadi raja.
21 Ba maya ti sama, Rehoboam anak Solomon nyadi raja Judah. Rehoboam beumur 41 taun lebuh iya nyadi raja. Iya merintah pengelama 17 taun ba Jerusalem, iya nya kuta ke udah dipilih Jehovah ari serata kawasan raban bansa Israel alai ngengkahka nama Iya. Indai Rehoboam nya siku indu orang Amon ke benama Naamah.
22 Orang Judah ngereja utai ti jai ba mata Jehovah. Dosa sida empu udah ngasuh Petara balat agi ringat enti dibandingka enggau dosa aki ini sida.
23 Sida majak ngengkahka patung, tiang batu keramat, enggau tiang kayu keramat ba tiap bukit ti tinggi enggau ba baruh tiap pun kayu ti subur.
24 Sida indah bisi pelacur lelaki ba kuil ba menua sida. Sida ngereja semua utai ti kamah ke digaga bansa ke udah diburu Jehovah ari orang Israel.
25 Ba taun ti kelima Raja Rehoboam merintah, Raja Sisak ari Ejip nyerang Jerusalem.
26 Iya ngambi reta ari Rumah Jehovah enggau ari istana raja. Iya ngambi semua utai, nyengkaum semua terabai emas ke digaga Solomon.
27 Nya alai, Raja Rehoboam ngaga terabai ari temaga kena nganti terabai emas nya. Iya nyerahka semua terabai nya ngagai bala ketuai jejaga ke nyaga pintu penama istana raja.
28 Tiap kali raja tama ngagai Rumah Jehovah, bala jejaga deka mai terabai nya. Udah nya, sida deka mulaika semua terabai nya ngagai bilik bala jejaga.
29 Sejarah bukai pasal Rehoboam, iya nya pasal semua utai ke udah digaga iya, bisi ditulis ba bup sejarah pasal jeman bala raja Judah.
30 Rehoboam enggau Jeroboam suah beperang ngelaban pangan diri.
31 Udah nya, Rehoboam mati lalu dikuburka begulai enggau aki ini iya ba Kuta David. Indai iya siku indu orang Amon ke benama Naamah. Udah nya, anak iya ke benama Abijam* nganti iya nyadi raja.
