1 Raja 15:1-34
15 Ba taun ti ke-18 Raja Jeroboam anak Nebat nyadi raja Israel, Abijam nyadi raja Judah.
2 Iya merintah ba Jerusalem pengelama tiga taun. Indai iya benama Maakah, iya nya uchu Abisalom.
3 Abijam majak ngereja dosa ti sama baka apai iya. Iya enda nyembah Jehovah, Petara iya, enggau pengabis ati. Iya enda baka aki iya, David.
4 Tang ketegal David, Jehovah, Petara ke disembah iya, udah ngawakka peturun iya merintah* ba Jerusalem. Petara udah ngelantik anak iya nyadi raja lalu ngawakka Jerusalem mengkang bisi.
5 David ngereja utai ti betul ba mata Jehovah. Sepemanjai pengidup iya, iya seruran ngasika pesan Petara, kelimpah ari pekara pasal Uriah, orang Het.
6 Sepemanjai pengidup Rehoboam, iya suah beperang ngelaban Jeroboam.
7 Sejarah bukai pasal Abijam, iya nya pasal semua utai ke udah digaga iya, bisi ditulis ba bup sejarah pasal jeman bala raja Judah. Abijam enggau Jeroboam mega beperang ngelaban pangan diri.
8 Udah nya, Abijam mati lalu dikuburka begulai enggau aki ini iya ba Kuta David. Anak iya ke benama Assa nganti iya nyadi raja.
9 Ba taun ti ke-20 Jeroboam nyadi raja Israel, Assa belabuh merintah Judah.
10 Assa merintah ba Jerusalem pengelama 41 taun. Ini iya benama Maakah, iya nya uchu Abisalom.
11 Assa ngereja utai ti betul ba mata Jehovah, baka aki iya David.
12 Iya muru bala pelacur lelaki ba kuil ari menua iya, lalu ngerusak semua patung ti kamah* ba mata Petara ti bendar ke digaga aki ini iya.
13 Iya mega muai ini iya, Maakah, ari penuduk iya ti nyadi kuin, laban Maakah ngaga patung ti enda senunuh kena nyembah tiang kayu keramat. Assa ngeruntuhka patung nya lalu nunu iya ba Lebak Kidron.
14 Tang, endur alai orang nyembah petara pelesu* enda dianchurka. Taja pia, Assa nyembah Jehovah enggau pengabis ati sepemanjai pengidup iya.
15 Iya ngengkahka semua pirak, emas, enggau mayuh macham pekekas ke udah dikuduska iya enggau apai iya ke dalam Rumah Jehovah.
16 Raja Assa enggau Raja Baasa suah beperang ngelaban pangan diri.
17 Raja Baasa ari Israel nyerang Judah lalu berengkah nirika baru* kuta Ramah, ngambika nadai sapa-sapa pan ke ulih pansut tauka tama ngagai kawasan Assa, raja Judah.
18 Nya alai, Assa ngambi semua pirak enggau emas ke agi tinggal ba endur nyimpan reta ba Rumah Jehovah sereta ba istana raja, lalu nyerahka semua nya ngagai bala pegawai iya. Udah nya, Raja Assa nganjung bala pegawai iya ngagai Ben-hadad anak Tabrimon, iya nya uchu Hesion. Ben-hadad nya raja Siria, ke diau ba Damaskus. Assa ngirumka pesan tu ngagai Ben-hadad:
19 “Bisi sempekat entara aku enggau nuan, sereta entara apai aku enggau apai nuan. Semua pirak enggau emas tu hadiah ke nuan. Kinsil sempekat ke digaga nuan enggau Raja Baasa ari Israel, ngambika iya mupuk ari kawasan aku.”
20 Ben-hadad mendingka jaku Raja Assa, lalu nganjung beberapa iku ketuai soldadu iya nyerang kuta-kuta Israel. Sida ngalahka Ijon, Dan, Abel-bet-maakah, serata Chineret, enggau serata kawasan Naptali.
21 Lebuh Baasa ninga pasal utai nya, iya tekala nya ngetuka pengawa nirika* kuta Ramah. Iya pulai baru ngagai Tirsah, lalu diau ba din.
22 Udah nya, Raja Assa ngangauka semua orang Judah, lalu ngasuh sida ngangkut batu enggau kayu ke dikena Baasa nirika kuta Ramah. Raja Assa ngena semua utai nya nirika baru* kuta Geba ba Benjamin sereta nirika baru kuta Mispah.
23 Semua sejarah bukai pasal Assa, iya nya pasal semua pengering iya, pasal semua utai ke udah digaga iya, enggau pasal kuta-kuta ke didirika iya baru,* bisi ditulis ba bup sejarah pasal jeman bala raja Judah. Tang lebuh iya udah tuai, kedua-dua kaki iya kena penyakit.
24 Pengujung iya, Assa mati lalu dikuburka begulai enggau aki ini iya ba Kuta David, iya nya kuta aki ini iya. Udah nya, anak iya ke benama Jehosapat nganti iya nyadi raja.
25 Nadap anak Jeroboam nyadi raja Israel ba taun ti kedua Assa nyadi raja Judah. Nadap merintah Israel pengelama dua taun.
26 Iya majak ngereja utai ti jai ba mata Jehovah. Iya nunda pengawa apai iya lalu ngereja dosa ti sama baka apai iya, Jeroboam, ke ngasuh orang Israel bedosa.
27 Baasa anak Ahijah, ari peturun Isakar, ngaga pelan kena ngelaban Nadap. Baasa munuh Nadap ba Gibeton, siti kuta ke diempu orang Pilistin. Maya nya, Nadap enggau semua soldadu Israel benung ngepung Gibeton.
28 Baasa munuh Nadap ba taun ti ketiga Assa nyadi raja Judah, lalu Baasa nganti Nadap nyadi raja.
29 Pengudah Baasa nyadi raja, iya munuh semua ruang bilik Jeroboam. Baka ke dipadah Jehovah nengah nembiak Iya, Ahijah, orang Siloh nya, Baasa munuh tiap iku orang ba ruang bilik Jeroboam ke agi idup.
30 Utai nya nyadi ketegal Jeroboam udah ngasuh Jehovah, Petara orang Israel, ringat. Jeroboam udah bedosa, lalu iya udah ngasuh orang Israel bedosa.
31 Sejarah bukai pasal Nadap, iya nya pasal semua utai ke udah digaga iya, bisi ditulis ba bup sejarah pasal jeman bala raja Israel.
32 Raja Baasa ari Israel enggau Assa suah beperang ngelaban pangan diri.
33 Ba taun ti ketiga Assa nyadi raja Judah, Baasa anak Ahijah nyadi raja serata Israel, lalu iya merintah ba Tirsah pengelama 24 taun.
34 Iya majak ngereja utai ti jai ba mata Jehovah. Iya nunda pengawa Jeroboam lalu ngereja dosa ti sama baka Jeroboam, ke ngasuh orang Israel bedosa.
Nota Kaki
^ Jaku Asal, “udah meri iya siti lampu kelita.”
^ Leka jaku Hebrew nya engka bekaul enggau leka jaku “tai” kena nunjukka asai ati ti balat keji.
^ Jaku Asal, “endur ti tinggi.”
^ Tauka “negapka.”
^ Tauka “negapka.”
^ Tauka “negapka.”
^ Tauka “ditegapka iya.”
