1 Raja 16:1-34
16 Jehovah madahka pesan Iya ngagai Baasa nengah Jehu anak Hanani. Ku Iya:
2 “Aku udah ngangkatka nuan ari debu lalu ngasuh nuan nyadi tuai atas nembiak Aku, Israel. Tang, nuan nunda pengawa Jeroboam lalu ngasuh nembiak Aku, Israel, bedosa. Dosa sida ngemediska ati Aku.
3 Nya alai, Aku deka ngemunaska Baasa enggau ruang bilik iya, baka ke udah digaga Aku ngagai ruang bilik Jeroboam anak Nebat.
4 Semua ruang bilik Baasa ke mati ba dalam kuta deka diempa ukui, lalu semua ruang bilik Baasa ke mati ba luar kuta deka diempa burung ba langit.”
5 Sejarah bukai pasal Baasa, iya nya pasal pengering iya enggau utai ke udah digaga iya, bisi ditulis ba bup sejarah pasal jeman bala raja Israel.
6 Udah nya, Baasa mati lalu dikuburka ba Tirsah, lalu anak iya ke benama Elah nganti iya nyadi raja.
7 Jehovah madahka pesan Iya ngagai Baasa sereta ruang bilik iya nengah Jehu anak Hanani. Nya ketegal Baasa udah ngereja mayuh utai ti jai ba mata Jehovah lalu udah ngasuh Iya ringat, baka ke digaga ruang bilik Jeroboam. Baasa mega udah munuh Nadap.
8 Ba taun ti ke-26 Assa nyadi raja Judah, Elah anak Baasa nyadi raja Israel lalu merintah ba Tirsah pengelama dua taun.
9 Simri nya siku pegawai raja ke nyadi ketuai setengah ari raban soldadu ke ngena kerita kuda perang. Iya ngaga pelan kena ngelaban raja Elah. Maya nya, raja Elah ba Tirsah benung ngirup sampai mabuk ba rumah Arsa, iya nya pengurus ruang bilik raja ba Tirsah.
10 Simri tama lalu munuh raja Elah. Udah nya, iya nganti raja Elah nyadi raja. Utai nya nyadi ba taun ti ke-27 Assa nyadi raja Judah.
11 Lebuh Simri berengkah merintah nyadi raja, iya munuh semua ruang bilik Baasa. Iya munuh semua lelaki, enda ngira sida nya kaban belayan tauka bala bakih Baasa.
12 Baka nya meh Simri munuh semua ruang bilik Baasa, baka ke udah dipadah Jehovah ngagai Baasa nengah Nabi Jehu.
13 Utai nya nyadi ketegal semua dosa ke digaga Baasa enggau anak iya, Elah. Seduai iya udah ngasuh orang Israel bedosa lalu ngasuh Jehovah, Petara orang Israel, pedis ati laban ngaga patung ti nadai guna.
14 Sejarah bukai pasal Elah, iya nya pasal semua utai ke udah digaga iya, bisi ditulis ba bup sejarah pasal bala raja Israel.
15 Ba taun ti ke-27 Assa nyadi raja Judah, Simri nyadi raja ba Tirsah pengelama tujuh hari. Maya nya, bisi bala soldadu ke ngepung kuta Gibeton, iya nya kuta orang Pilistin.
16 Pengudah sesiti timpuh, bala soldadu ke ba kem ninga Simri bisi pelan jai lalu udah munuh raja. Nya alai, semua orang Israel ngelantik Omri, ketuai soldadu sida, nyadi raja Israel ba hari nya mega ba kem sida.
17 Omri enggau semua orang Israel ke enggau iya mupuk ari Gibeton, lalu ngepung kuta Tirsah.
18 Lebuh Simri meda kuta nya dialahka, iya tama ngagai menara ba istana. Udah nya, iya nunu istana nya lalu iya empu pan mati.
19 Tu nyadi ketegal iya bedosa. Iya ngereja utai ti jai ba mata Jehovah. Iya nunda pengawa Jeroboam lalu ngereja dosa ti sama baka Jeroboam, ke ngasuh orang Israel bedosa.
20 Sejarah bukai pasal Simri enggau pelan jai iya, bisi ditulis ba bup sejarah pasal bala raja Israel.
21 Maya nya, orang Israel bepechah nyadi dua raban. Seraban nitihka Tibni anak Ginat lalu deka iya nyadi raja. Lalu ke bukai nitihka Omri.
22 Tang, sida ke nitihka Omri ngalahka orang ke nitihka Tibni anak Ginat. Tibni mati, lalu Omri nyadi raja.
23 Ba taun ti ke-31 Assa nyadi raja Judah, Omri nyadi raja Israel lalu iya merintah pengelama 12 taun. Iya merintah ba Tirsah pengelama enam taun.
24 Iya meli gunung Samaria ari Semer ngena rega dua talenta* pirak, lalu nirika kuta ba gunung nya. Kuta nya diberi nama Samaria,* nitihka nama Semer ke ngempu gunung nya.
25 Omri majak ngereja utai ti jai ba mata Jehovah, lalu iya jai agi ari semua orang ke sebedau iya.
26 Iya nunda semua pengawa Jeroboam anak Nebat lalu ngereja dosa ti sama baka Jeroboam, ke ngasuh orang Israel bedosa. Iya ngemediska ati Jehovah, Petara orang Israel, ngena patung ti nadai guna.
27 Sejarah bukai pasal Omri, iya nya pasal pengering iya enggau utai ke udah digaga iya, bisi ditulis ba bup sejarah pasal jeman bala raja Israel.
28 Omri mati lalu dikuburka ba Samaria. Anak iya ke benama Ahap, nyadi raja nganti iya.
29 Ba taun ti ke-38 Assa nyadi raja Judah, Ahap anak Omri nyadi raja Israel. Ahap anak Omri merintah Israel ba Samaria pengelama 22 taun.
30 Ahap anak Omri majak ngereja utai ti jai ba mata Jehovah, lalu iya jai agi ari semua orang ke sebedau iya.
31 Ahap udah bedosa baka Jeroboam anak Nebat, tang nya baka ke enda chukup ba iya. Iya ngereja utai ti jai agi. Iya jadi enggau Jesebel, anak indu Etbaal, raja ari Sidon, lalu iya berengkah nyembah Baal.
32 Kelimpah ari nya, iya ngaga alta ke Baal ba kuil* Baal ke digaga iya ba Samaria.
33 Ahap mega ngaga tiang kayu keramat. Iya balat agi ngemediska ati Jehovah, Petara orang Israel, enti dibandingka enggau semua raja Israel ke sebedau iya.
34 Lebuh Ahap merintah, Hil, orang Bethel, udah nirika baru kuta Jeriko. Ketegal iya ngaga asas kuta nya, Abiram, anak iya ke tuai, mati. Lalu ketegal iya masang pintu penama kuta nya, Segup, anak iya ke biak, mati. Semua nya nyadi nitihka utai ke udah dipadah Jehovah nengah Josua anak Nun.
