1 Raja 19:1-21
19 Udah nya, Ahap madah ngagai Jesebel semua utai ke udah digaga Elijah sereta baka ni Elijah udah munuh semua nabi Baal ngena pedang.
2 Jesebel nganjung orang mai pesan ngagai Elijah: “Maya tu pagila, enti aku enda munuh nuan, baka nuan ke udah munuh bala nabi nya, awakka petara aku ngukum aku enggau balat.”
3 Elijah pan takut, lalu rari nyelamatka diri. Lebuh iya datai ba Beer-sheba ba kawasan Judah, iya ninggalka ulun iya ba dia.
4 Iya bejalai ba menua puang pengelama sehari, lalu datai ba baruh pun kayu ti mit. Iya duduk ba dia lalu besampi minta diri mati. Ku iya: “Umbas meh nya! O Jehovah, ambi meh nyawa aku! Aku enda layak idup lama agi ari bala aki ini aku ke udah mati.”
5 Udah nya, iya gali lalu tinduk ba baruh pun kayu ti mit nya. Tang tiba-tiba, siku melikat negu iya lalu bejaku: “Angkat, makai.”
6 Elijah lalu tepedaka siti tuku roti ti segala ba atas batu ti angat semak enggau pala iya. Ba dia mega bisi sejag ai. Iya makai, ngirup, lalu gali baru.
7 Udah nya, melikat Jehovah datai baru. Melikat nya negu iya lalu madah: “Angkat makai, laban nuan deka bejalai jauh.”
8 Elijah pan angkat lalu makai enggau ngirup. Pemakai nya meri iya chukup pengering kena iya bejalai pengelama 40 hari enggau 40 malam, nyentukka iya datai ba Horeb, iya nya gunung Petara ti bendar.
9 Ba din, iya bemalam ba siti gua. Tiba-tiba, Jehovah bejaku ngagai iya: “Elijah, nama gaga nuan ditu?”
10 Elijah nyaut: “O Jehovah, ketuai soldadu serega, aku ransing amat nyembah Nuan, tang orang Israel udah ngelanggar sempekat Nuan. Sida udah ngeruntuhka alta Nuan, lalu udah munuh bala nabi Nuan ngena pedang. Semina aku siku aja agi tinggal. Diatu, sida deka munuh aku.”
11 Udah nya, Petara nyaut: “Pansut lalu bediri meh ba gunung tu, ba depan Jehovah.” Jehovah lalu mansa Elijah. Ribut ti balat melah gunung-gunung, lalu mechahka bukit-bukit batu ba depan Jehovah. Tang, Jehovah nadai ba dalam ribut nya. Pengudah ribut nya, gempa bumi nyadi. Tang, Jehovah nadai ba dalam gempa bumi nya.
12 Pengudah gempa bumi, api pansut. Tang, Jehovah nadai ba dalam api nya. Pengudah api nya, pansut siti munyi nyawa ti tenang sereta enda entu inggar.
13 Pengudah Elijah ninga munyi nyawa nya, iya nutup mua iya ngena baju jubah iya, lalu pansut bediri ba mua gua nya. Nyawa nya nanya Elijah: “Elijah, nama gaga nuan ditu?”
14 Elijah nyaut: “O Jehovah, ketuai soldadu serega, aku ransing amat nyembah Nuan, tang orang Israel udah ngelanggar sempekat Nuan. Sida udah ngeruntuhka alta Nuan, lalu udah munuh bala nabi Nuan ngena pedang. Semina aku siku aja agi tinggal. Diatu, sida deka munuh aku.”
15 Jehovah madah ngagai iya: “Alai nuan pulai ngagai menua puang ba Damaskus. Lebuh nuan datai ba din, tata meh Hasael nyadi raja Siria.
16 Udah nya, tata meh Jehu, uchu Nimsi, nyadi raja Israel. Tata mega Elisa* anak Sapat, ari Abel-meholah nyadi nabi kena nganti nuan.
17 Barang sapa ke ulih ngerarika diri ari pedang Hasael deka dibunuh Jehu, lalu barang sapa ke ulih ngerarika diri ari pedang Jehu deka dibunuh Elisa.
18 Ba Israel agi bisi 7,000 iku orang ke enda besugang nyembah Baal, lalu enda nyium iya.”
19 Nya alai, Elijah mupuk ari endur nya, lalu betemu enggau Elisa anak Sapat ke benung ngeradu tanah ngena 12 pasang sapi lelaki. Maya nya, Elisa benung ngeradu tanah ngena pasangan sapi ti ke-12. Nya alai, Elijah pan belanda nuju Elisa, lalu ngerasukka baju jubah iya ba Elisa.
20 Elisa ninggalka sapi iya, lalu belanda nitihka Elijah. Ku iya: “Awakka aku nyium apai indai aku dulu. Udah nya, aku deka nitihka nuan.” Ku Elijah: “Alai meh. Enda aku nagang nuan.”
21 Elisa pan pulai. Iya ngambi dua iku sapi lelaki, lalu munuh sapi nya. Iya ngena kayu pengeradu ngidupka api, lalu ngerebus dagin sapi nya. Iya ngenahka pemakai nya ngagai semua orang, lalu sida pan makai. Udah nya, Elisa angkat lalu nitihka Elijah nyadi penulung iya.
Nota Kaki
^ Reti nya “Petara Nya Penyelamat.”
