1 Raja 20:1-43
20 Ben-hadad, raja Siria, ngempuruka semua bala soldadu iya enggau 32 iku raja ke bukai, sereta kuda enggau kerita kuda sida. Udah nya, Ben-hadad mupuk ngepung sereta nyerang kuta Samaria.
2 Iya nganjung orang mai pesan tu ngagai Ahap, raja Israel, ba kuta nya: “Tu pesan ari Ben-hadad:
3 ‘Pirak enggau emas nuan deka diempu aku. Pia mega enggau bala bini nuan ke pemadu bajik, sereta bala anak lelaki nuan ke pemadu sigat.’”
4 Ku raja Israel nyaut: “Baka ke dipadah nuan, aku enggau semua utai aku, deka diempu nuan.”
5 Bala orang ke mai pesan nya datai baru ngagai Ahap lalu madah: “Tu utai ku Ben-hadad: ‘Aku udah ngirumka pesan ngagai nuan ngasuh nuan nyerahka pirak, emas, bala anak lelaki nuan, enggau bala bini nuan, ngagai aku.
6 Tang kira-kira maya tu pagila, aku deka nganjung bala pegawai aku ngagai nuan kia. Sida deka nyerungkai istana nuan sereta rumah bala pegawai nuan. Sida deka ngambi semua utai ke berega ari nuan.’”
7 Nya alai, raja Israel ngangauka semua bala tuai ba menua nya. Ku iya: “Peda kita, lelaki nya deka ngenusahka kitai. Lebuh iya ngasuh aku nyerahka pirak, emas, bala bini aku, enggau bala anak aku ngagai iya, aku enda nulak utai ke dipinta iya.”
8 Semua bala tuai enggau semua orang lalu madah ngagai raja: “Anang mendingka iya. Anang nitihka utai ke dipinta iya.”
9 Nya alai, raja Israel madah ngagai bala orang ke mai pesan ari Ben-hadad: “Padahka tu ngagai tuan raja: ‘Aku deka nitihka peminta nuan ti keterubah. Tang, aku enggai nitihka peminta nuan ke siti da agi.’” Bala orang nya pan mupuk lalu madahka pesan iya ngagai Ben-hadad.
10 Udah nya, Ben-hadad ngirumka pesan tu ngagai iya: “Aku deka nganchurka kuta Samaria. Bala soldadu ke enggau aku mayuh amat, lalu debu ke agi tinggal ba kuta tu enda chukup digenggam tiap iku sida. Enti aku enda ulih ngereja semua tu, awakka petara aku ngukum aku enggau balat.”
11 Ku raja Israel nyaut: “Padah ngagai Ben-hadad: ‘Sebedau perang berengkah, anang ngenyumbungka diri baka orang ke udah menang.’”
12 Lebuh Ben-hadad ninga pesan nya, iya benung ngirup ai bisa dalam langkau kain begulai enggau bala raja ke bukai. Iya lalu madah ngagai bala pegawai iya: “Sedia beperang!” Nya alai, sida pan besedia deka nyerang kuta Samaria.
13 Siku nabi datai betemu enggau Ahap, raja Israel. Ku nabi nya: “Tu pesan ari Jehovah: ‘Peda meh raban soldadu ti mayuh nya. Seharitu, Aku deka nyerahka sida ngagai nuan, lalu nuan deka nemu, Aku tu Jehovah.’”
14 Ahap nanya: “Baka ni chara iya?” Disaut nabi nya: “Jehovah madah: ‘Nengah bala penulung pegawai ba kawasan Israel.’” Ahap nanya baru: “Sapa ke deka dulu nyerang?” Nabi nya nyaut: “Nuan, tuan.”
15 Ahap ngitung bala penulung pegawai ba kawasan Israel, lalu penyampau sida 232 iku orang. Udah nya, iya ngitung semua soldadu orang Israel, lalu penyampau sida 7,000 iku orang.
16 Sida pansut ari kuta maya tengah hari. Maya nya, Ben-hadad benung ngirup ai bisa sampai mabuk dalam langkau kain begulai enggau 32 iku raja ke nulung iya.
17 Lebuh bala penulung pegawai pansut ari kuta, Ben-hadad lalu nganjung beberapa iku orang meresa utai ke benung nyadi. Bala orang nya pulai lalu madah: “Bisi orang pansut ari Samaria.”
18 Ben-hadad lalu madah: “Enti sida pansut deka bebaik, tangkap meh sida idup-idup. Enti sida pansut deka beperang, kita mega patut nangkap sida idup-idup.”
19 Lebuh bala penulung nya pansut ari kuta, bala soldadu orang Israel nitihka sida ari belakang.
20 Sida munuh bala munsuh sida. Nya alai, orang Siria ngerarika diri lalu sida digagai orang Israel. Tang Ben-hadad, raja Siria, mujur ngerarika diri. Iya nepan kuda iya sama enggau beberapa iku soldadu ke nepan kuda.
21 Raja Israel pansut lalu munuh bala soldadu ke nepan kuda enggau kerita kuda, nyentukka orang Siria balat amat alah.
22 Udah nya, nabi nya datai lalu betemu enggau raja Israel lalu madah: “Keringka bala soldadu tuan. Pikirka enggau manah utai ke deka dikereja tuan, laban ba pun taun* ti deka datai, raja Siria deka nyerang tuan.”
23 Bala pegawai raja Siria madah ngagai Ben-hadad: “Petara sida Petara gunung, nya kebuah kitai alah. Enti kitai ngelaban sida ba tanah ti rata, kitai tentu ulih menang.
24 Tuan mega patut ngelantik bala gabenor kena nganti semua raja ke nguluka bala soldadu ba perang.
25 Udah nya, gempuruka bala soldadu nitihka penyampau bala soldadu ke udah alah sebedau tu. Penyampau kuda enggau kerita kuda mega nitihka penyampau ke sebedau tu. Aram meh kitai ngelaban sida ba tanah ti rata, lalu kitai tentu ulih menang ngelaban sida.” Nya alai, raja pan ngereja nya.
26 Ba pun taun,* Ben-hadad ngempuruka bala soldadu Siria, lalu mupuk ngagai Afek beperang ngelaban orang Israel.
27 Bala soldadu Israel mega digempuruka. Sida bebaika pemakai, lalu pansut beperang ngelaban soldadu Siria. Lebuh sida nirika kem ba depan bala soldadu Siria, penyampau sida amat mit, baka dua iti raban kambin. Tang, bala soldadu Siria ngemenuhka serata kawasan nya.
28 Udah nya, nabi Petara datai betemu enggau raja Israel lalu madah: “Tu pesan ari Jehovah: ‘Ketegal orang Siria udah madah: “Jehovah nya Petara gunung, lalu Iya ukai Petara ba tanah ti rata,” Aku deka ngasuh nuan menang ngelaban bala soldadu ti besai tu. Nya baru kita deka nemu, Aku tu Jehovah.’”
29 Kem sida betunga enggau pangan diri pengelama tujuh hari. Ba hari ti ketujuh, sida beperang. Dalam sehari, soldadu Israel munuh 100,000 iku bala soldadu orang Siria ke bejalai kaki.
30 Bala soldadu Siria ke agi idup ngerarika diri ngagai kuta Afek, tang dinding kuta nya runtuh lalu ninggang 27,000 iku soldadu Siria. Ben-hadad mega ngerarika diri ngagai kuta nya, lalu belalai dalam bilik paling ujung ba siti rumah.
31 Bala pegawai Ben-hadad madah ngagai Ben-hadad: “Kami ninga bala raja Israel manah ati. Awakka kami melitka kain guni ba punggung kami sereta nanchangka tali ba pala kami. Udah nya, kami deka betemu enggau raja Israel. Ni nemu, engka raja deka nejuka tuan idup.”
32 Bala pegawai nya pan melitka kain guni ba punggung sida sereta nanchangka tali ba pala sida. Udah nya, sida mupuk betemu enggau raja Israel lalu madah: “Raja Ben-hadad, iya nya ulun tuan, minta tuan nejuka iya idup.” Ku raja Israel: “Kati iya agi idup? Iya menyadi aku.”
33 Bala pegawai nya ngumbai nya tanda ti manah, lalu sida pechayaka jaku raja. Ku sida: “Ben-hadad endang menyadi tuan.” Nya alai, ku raja: “Bai meh Ben-hadad ngagai aku.” Lebuh Ben-hadad datai, raja mai iya nepan kerita kuda.
34 Ben-hadad madah ngagai iya: “Aku deka mulaika kuta-kuta ke udah diambi apai aku ari apai nuan. Nuan ulih muka pasar* ba Damaskus, baka ke digaga apai aku ba Samaria.”
Ku Ahap nyaut: “Ketegal semaya nya, aku deka ngelepaska nuan.”
Nya alai, Ahap pan ngaga sempekat enggau Ben-hadad lalu nejuka iya mupuk.
35 Ari asuh Jehovah, siku ari bala nabi* bejaku enggau kaban iya empu: “Palu aku.” Tang, kaban iya nya enggai malu iya.
36 Nya alai, nabi nya madah ngagai kaban iya: “Ketegal nuan enda mendingka jaku Jehovah, siku singa deka munuh nuan pengudah nuan ninggalka aku.” Pengudah kaban iya nya mupuk, siku singa nyerang iya lalu munuh iya.
37 Nabi nya mansang ngagai orang bukai lalu madah: “Palu aku.” Nya alai, orang nya malu iya sampai iya bakal.
38 Nabi nya malut mata iya ngena kain, lalu menyamar nyadi orang bukai. Udah nya, iya nganti Raja Ahap ba tisi jalai.
39 Lebuh raja mansa, nabi nya lalu ngangau: “Tuan, lebuh aku ba endur beperang, siku soldadu mai siku orang tangkap ngagai aku lalu madah: ‘Jaga iya. Enti iya ngerarika diri, nuan patut nganti nyawa iya ngena nyawa nuan, tauka mayar satu talenta* pirak kena nganti nyawa iya.’
40 Lebuh aku benung sibuk kin kia, tiba-tiba orang tangkap nya lenyau.” Raja Israel lalu madah ngagai iya: “Baka nya meh nuan deka diukum. Nuan empu udah nyebut munyi nya.”
41 Nabi nya lalu muka balut mata iya. Tekala nya raja lalu nemu lelaki nya siku nabi.
42 Nabi nya madah ngagai raja: “Tu pesan ari Jehovah: ‘Ketegal nuan udah ngelepaska orang ke diasuh Aku bunuh nuan, nyawa nuan deka nganti nyawa iya, lalu rayat nuan deka nganti rayat iya.’”
43 Raja Israel pan pulai ke Samaria. Iya tusah ati sereta kecewa.
Nota Kaki
^ Iya nya, maya musin bungai.
^ Iya nya, maya musin bungai
^ Tauka “Nuan ulih milih nama-nama jalai.”
^ Jaku Asal, “bala anak nabi.” Engka merujuk ngagai sekula ke ngelatih bala nabi tauka merujuk ngagai gerempung bala nabi.
^ Peda Rujukan B14.
