1 Raja 22:1-53
22 Pengelama tiga taun, nadai perang nyadi entara Siria enggau Israel.
2 Ba taun ti ketiga, Raja Jehosapat ari Judah betemu enggau raja Israel.
3 Raja Israel bejaku ngagai bala pegawai iya: “Kati kita nemu Ramot-gilead nya endang enggi kitai? Tang, nama kebuah kitai kakang ati deka ngambi kuta nya pulai baru ari raja Siria?”
4 Raja Israel lalu nanya Jehosapat: “Kati nuan deka enggau aku beperang ba Ramot-gilead?” Ku Jehosapat nyaut: “Au, aku deka enggau nuan. Bala aku deka mupuk enggau bala nuan. Raban kuda aku deka mupuk enggau raban kuda nuan.”
5 Tang, Jehosapat madah ngagai raja Israel: “Aram kitai minta iring ari Jehovah dulu.”
6 Nya alai, raja Israel ngempuruka bala nabi. Penyampau sida kira-kira 400 iku. Iya nanya sida: “Kati aku patut nyerang Ramot-gilead tauka enda?” Ku sida nyaut: “Alai meh, tuan. Jehovah deka nyerahka kuta nya ngagai tuan.”
7 Tang, Jehosapat nanya: “Kati ba ditu bisi nabi Jehovah? Aram kitai minta iring Petara nengah iya.”
8 Raja Israel madah ngagai Jehosapat: “Bisi siku agi orang ke ulih minta iring ari Jehovah. Iya Mikaiah anak Imlah. Tang, aku begedika iya laban iya nadai kala benabika utai ti manah pasal aku. Iya semina benabi pasal utai ti jai.” Ku Jehosapat nyaut: “Nuan enda patut bejaku munyi nya.”
9 Raja Israel ngangauka siku pegawai istana lalu madah: “Jampat! Bai Mikaiah anak Imlah kitu.”
10 Maya nya, Ahap enggau Jehosapat ngena gari diraja lalu duduk ba kerusi diraja, ba endur alai ngindik utai ke diketau, iya nya semak pintu penama kuta Samaria. Semua nabi nya benabi ba depan seduai iya.
11 Udah nya, Sedekiah anak Chenaana ngaga beberapa iti tanduk besi lalu madah: “Tu pesan ari Jehovah: ‘Nuan deka ngena tanduk tu nyerang* orang Siria, nyentukka sida dipunaska abis lengis.’”
12 Bala nabi ke bukai mega benabika utai ti sama. Ku sida: “Mupuk meh ngagai Ramot-gilead. Tuan deka menang. Jehovah deka nyerahka kuta nya ngagai tuan.”
13 Nya alai, orang ke mai pesan ke diasuh ngangauka Mikaiah madah ngagai Mikaiah: “Semua nabi ke bukai madahka utai ti manah ngagai raja. Awakka nuan mega nyebut utai ti manah ngagai raja, baka ke digaga sida.”
14 Tang Mikaiah madah: “Aku besumpah atas nama Jehovah, Petara ti idup, aku semina deka nyebut utai ke dipadah Jehovah ngagai aku.”
15 Lebuh Mikaiah betemu enggau raja, raja lalu nanya iya: “Mikaiah, patut kami duai nyerang kuta Ramot-gilead tauka enda?” Mikaiah lalu nyaut: “Alai meh, tuan deka menang. Jehovah deka nyerahka kuta nya ngagai tuan.”
16 Ku raja nanya: “Berapa kali aku patut ngasuh nuan besumpah, ngambika nuan deka nyebut utai ti bendar dalam nama Jehovah?”
17 Mikaiah lalu nyaut: “Aku meda semua orang Israel ngachir ba sebelah gunung, baka raban bedus ke nadai pengibun. Jehovah udah madah: ‘Sida nadai tuan. Awakka sida pulai ngagai rumah diri empu enggau selamat.’”
18 Nya alai, raja Israel bejaku enggau Jehosapat: “Aku udah madah tadi, iya sigi enda benabika utai ti manah pasal aku. Iya semina benabi pasal utai ti jai.”
19 Ku Mikaiah agi: “Pendingka utai ke disebut Jehovah: Aku meda Jehovah duduk ba kerusi diraja Iya, lalu semua bala soldadu serega bediri ba sepiak kanan enggau ba sepiak kiba Iya.
20 Udah nya, Jehovah nanya: ‘Sapa ke deka nipu Ahap ngambika iya mupuk, lalu dibunuh ba Ramot-gilead?’ Bisi melikat madah baka tu, bisi nya madah baka nya.
21 Udah nya, siku melikat mansang ngagai depan Jehovah lalu madah: ‘Aku deka nipu Ahap.’ Jehovah nanya iya: ‘Baka ni nuan deka ngereja nya?’
22 Melikat nya nyaut: ‘Aku deka mupuk, lalu ngasuh semua nabi Ahap madahka utai ti bula.’ Nya alai, Petara bejaku: ‘Alai meh nuan nipu iya. Nuan deka mujur ngereja nya.’
23 Nya alai, Jehovah nganjung melikat nya kena ngasuh semua bala nabi tuan madahka utai ti bula. Kebendar iya, Jehovah udah madahka, tuan deka ditinggang penusah.”
24 Sedekiah anak Chenaana mansang ngagai Mikaiah lalu nampar iya. Ku iya: “Kati nuan ngumbai kuasa kudus Jehovah udah ninggalka aku lalu bejaku ngagai nuan?”
25 Disaut Mikaiah: “Ba hari nuan belalai dalam bilik paling ujung, ba hari nya meh nuan deka nemu.”
26 Udah nya, raja Israel madah: “Bai Mikaiah lalu serahka iya ngagai Amon, gabenor kuta nya, enggau ngagai Joas anak raja.
27 Padah ngagai seduai iya: ‘Tu pesan raja: “Jil orang tu! Beri iya mimit roti enggau ai, nyentukka aku pulai enggau selamat.”’”
28 Ku Mikaiah: “Enti tuan pulai enggau selamat, reti iya Jehovah enda bejaku nengah aku.” Ku iya agi: “Semua kita ke bisi datai, pendingka utai ke udah disebut aku nya.”
29 Nya alai, raja Israel enggau Jehosapat, raja Judah, mupuk ngagai Ramot-gilead.
30 Ku raja Israel madah ngagai Jehosapat: “Lebuh kitai mansang beperang, aku deka menyamar. Tang, nuan deka ngena gari diraja nuan empu.” Nya alai, raja Israel pan menyamar lebuh iya mansang beperang.
31 Raja Siria udah bepesan ngagai 32 iku ketuai soldadu ke ngena kerita kuda. Ku iya: “Anang nyerang orang bukai, enda ngira sida nya ketuai soldadu tauka soldadu biasa. Serang raja Israel aja.”
32 Lebuh bala ketuai soldadu nya meda Jehosapat, sida bejaku enggau pangan diri: “Iya tentu raja Israel.” Nya alai, sida nyerang iya, lalu Jehosapat nyerauh minta tulung.
33 Lebuh sida nemu iya ukai raja Israel, sida tekala nya nikal lalu ngetu begagaika iya.
34 Bisi siku soldadu Siria nimbakka anak panah ngagai sebarang arah, lalu anak panah nya kena ba sambung baju perang raja Ahap. Nya alai, raja madah ngagai orang ke ngemudika kerita kuda iya: “Nikal tua! Bai aku pansut ari endur beperang tu. Aku udah balat bakal.”
35 Perang nya nyadi sepemanjai hari. Bisi orang ngetanka Raja Ahap ngambika iya ulih bediri ba kerita kuda iya, sambil nunga ngagai bala orang Siria. Darah ke pansut ari tubuh iya ke udah bakal, nelusur ba kerita kuda nya, lalu lemai nya iya pan mati.
36 Kira-kira maya mata panas padam, bisi orang madah ngagai semua bala soldadu Israel enggau nyawa ti inggar munyi tu: “Pulai ngagai kuta diri empu! Tiap iku orang mesti pulai ngagai kawasan diri empu.”
37 Baka nya meh Raja Ahap mati. Bangkai iya dibai ngagai Samaria, lalu dikuburka ba din.
38 Lebuh kerita kuda raja dituchi ba siti kolam ba Samaria, bala ukui nilat darah raja lalu bala pelacur mandi ba dia.* Semua nya nyadi baka ke udah dipadah Jehovah.
39 Sejarah bukai pasal Ahap, iya nya pasal semua utai ke udah digaga iya, istana gading ke didirika iya, enggau semua kuta ke udah didirika iya, bisi ditulis ba bup sejarah pasal jeman bala raja Israel.
40 Ahap mati, lalu anak lelaki iya, Ahasiah, nganti iya nyadi raja.
41 Ba taun ti keempat Ahap nyadi raja Israel, Jehosapat anak Assa nyadi raja Judah.
42 Jehosapat beumur 35 taun lebuh iya nyadi raja. Iya merintah ba Jerusalem pengelama 25 taun. Indai iya benama Asubah, iya nya anak indu Silhi.
43 Jehosapat enda limpang. Iya enda ngetu nunda semua pengawa apai iya, Assa. Iya ngereja utai ti betul ba mata Jehovah. Tang, endur alai orang nyembah petara pelesu* enda dianchurka. Agi bisi orang nyerahka pemeri sida ngambika asap ari pemeri tunu niki ke atas ngagai bala petara sida.
44 Jehosapat mengkang bebaik enggau raja Israel.
45 Semua sejarah bukai pasal Jehosapat, iya nya pasal pengering iya enggau pasal chara iya beperang, bisi ditulis ba bup sejarah pasal jeman bala raja Judah.
46 Jehosapat mega muru bala pelacur lelaki ba kuil ke enda abis diburu apai iya, Assa. Jehosapat muru semua sida ari menua iya.
47 Maya nya, menua Edom nadai raja. Menua nya diperintah siku pemesai.
48 Jehosapat nganjung kapal-kapal Tarsis ngagai Opir ngambi emas. Tang semua kapal nya rusak ba Esion-geber, lalu enda ulih belayar kin.
49 Ahasiah anak Ahap bejaku enggau Jehosapat: “Awakka bala aku belayar ba kapal nya enggau bala nuan.”* Tang, Jehosapat enda setuju.
50 Pengujung iya, Jehosapat mati lalu dikuburka begulai enggau aki ini iya ba Kuta David, iya nya kuta aki ini iya. Anak lelaki iya, Jehoram, nganti iya nyadi raja.
51 Ba taun ti ke-17 Jehosapat nyadi raja Judah, Ahasiah anak Ahap nyadi raja serata Israel, lalu merintah ba Samaria. Iya merintah Israel pengelama dua taun.
52 Iya majak ngereja utai ti jai ba mata Jehovah, lalu nunda pengawa apai indai iya sereta nunda pengawa Jeroboam anak Nebat, ke udah ngasuh orang Israel bedosa.
53 Iya enda badu nyembah Baal sereta besugang ba depan Baal. Iya mega baka apai iya. Iya majak ngemediska ati Jehovah, Petara orang Israel.
Nota Kaki
^ Tauka “nulak; nanduk.”
^ Tauka engka, “ba endur bala pelacur mandi, bala ukui nilat darah raja.”
^ Jaku Asal, “endur ti tinggi.”
^ Randau tu engka nyadi sebedau kapal-kapal nya rusak.
