1 Raja 4:1-34
4 Raja Solomon merintah serata menua Israel.
2 Sida tu pegawai tinggi Solomon: Asariah anak Sadok nyadi imam;
3 Elihorep enggau Ahijah, iya nya anak Shisha, nyadi sekretari; Jehosapat anak Ahilut nyadi orang ke nulis rekod;
4 Benayah anak Jehoyada nyadi ketuai bala soldadu; Sadok enggau Abiatar nyadi imam;
5 Asariah anak Natan nyadi ketuai semua pemesai; Zabut anak Natan nyadi imam sereta kaban* raja;
6 Ahisar nyadi orang ke ngemataka pengawa ba istana; lalu Adoniram anak Abda betanggungjawap ngemataka orang ke wajib gawa ke raja.
7 Raja Solomon bisi 12 iku pemesai ba Israel. Sida betanggungjawap nyediaka pemakai ke raja enggau ke semua sida ke ba istana iya. Tiap iku sida betanggungjawap nyediaka pemakai pengelama sebulan ninting taun.
8 Tu nama 12 iku pemesai nya: Anak Hur, ba kawasan ke begunung ba Efraim;
9 anak Deker, ba Makas, ba Saalbim, ba Bet-shemes, enggau ba Elon-bet-hanan;
10 anak Heset, ba Arubot (iya nguasa Sokoh enggau serata menua Heper);
11 anak Abinadap, ba semua kawasan tanah tinggi Dor (iya jadi enggau Tafat, iya nya anak indu Solomon);
12 Bana anak Ahilut, ba Taanak, ba Megido, enggau ba serata menua Bet-sean (ke semak enggau Saretan, ba baruh Jesril), ari Bet-sean ngagai Abel-meholah, ba kawasan Jokmim;
13 anak Geber, ba Ramot-gilead (iya nguasa kampung Jair anak Manasi, ba Gilead; iya mega nguasa kawasan Argop ba Basan, iya nya 60 iti kuta ti besai ke bedinding sereta bisi pintu kuta ke dikunchi ngena palang temaga);
14 Ahinadap anak Ido, ba Mahanaim;
15 Ahimas, ba Naptali (iya jadi enggau Basemat, iya nya anak indu Solomon);
16 Bana anak Husai, ba Aser enggau ba Bealot;
17 Jehosapat anak Paruah, ba Isakar;
18 Shimei anak Ela, ba Benjamin;
19 Geber anak Uri, ba Gilead (suba kala dipegai Raja Sihon, iya nya raja orang Amori, enggau Raja Og ba Basan). Bisi mega siku pemesai ke betanggungjawap atas semua pemesai tu.
20 Penyampau orang Judah enggau orang Israel mayuh baka pasir ba tebing tasik. Semua sida makai, ngirup, sereta gaga ati.
21 Solomon bekuasa atas semua perintah berengkah ari Sungai Eupratis sampai ngagai menua orang Pilistin enggau sempadan menua Ejip. Semua perintah nya mayar chukai* ngagai Solomon, lalu gawa ke iya sepemanjai pengidup iya.
22 Ninting hari, pemayuh pemakai ke diguna ba istana Solomon nya 3,300 kilogram* tepung ti alus, 6,600 kilogram* tepung biasa,
23 10 iku sapi ke ditupi dalam kandang, 20 iku sapi ke ditupi ba ladang, 100 iku bedus, pia mega kijang, rusa, antelop, enggau burung ti gemu.
24 Solomon nguasa semua kawasan ba begian barat Sungai Eupratis berengkah ari Tipsah nyentuk ngagai Gaza, nyengkaum semua raja ba begian barat Sungai Eupratis. Semua kawasan ba baruh perintah iya lantang magang.
25 Sepemanjai pengidup Solomon merintah, semua orang Judah enggau orang Israel berengkah ari Dan nyentuk ngagai Beer-sheba, idup likun ba baruh pun anggur enggau pun kayu ara sida.
26 Solomon bisi 12,000 iku kuda* enggau 4,000* kandang ke kuda ti narit kerita kuda.
27 Semua pemesai nya nyediaka pemakai ke Raja Solomon enggau ke semua orang ke makai ba mija Raja Solomon. Tiap iku sida gawa ba bulan ke udah ditetap ke sida siku-siku. Sida mega nentuka nadai utai kurang.
28 Tiap iku pemesai mega betanggungjawap nyediaka barli enggau rumput rangkai ke kuda, nyengkaum kuda ke narit kerita kuda, enda ngira dini endur ke begunaka pemakai nya.
29 Petara meri Solomon penemu-dalam sereta penau nemu berunding ti luar biasa. Petara mega meri iya ati ti penuh enggau penemu* ke baka pasir ba tebing tasik.
30 Penemu-dalam Raja Solomon ngelui ari penemu-dalam semua orang ba serata menua Timur enggau ba Ejip.
31 Iya bepenemu agi ari semua orang. Penemu-dalam Solomon jauh manah agi ari penemu-dalam Etan, orang Esrah, sereta bala anak Mahol, iya nya Heman, Kalkol, enggau Darda. Nama Solomon nyadi tebilang ba semua bansa ke ngelingi iya.
32 Iya nulis 3,000 iti jaku-dalam enggau 1,005 iti lagu.
33 Iya ukai semina bisi mayuh penemu pasal pun kayu sidar ba Lebanon, tang iya mega bisi penemu pasal hisop* ke tumbuh ba dinding. Iya mega bisi mayuh penemu pasal jelu, burung,* jelu ti ngerayap,* enggau ikan.
34 Orang ari bemacham bansa datai mendingka penemu-dalam Solomon, nyengkaum raja ari serata dunya ke udah ninga pasal penemu-dalam iya.
Nota Kaki
^ Tauka “orang ke dipechaya.”
^ Tauka “mai pemeri.”
^ Jaku Asal, “30 kor.” Peda Rujukan B14.
^ Jaku Asal, “60 kor.”
^ Tauka “orang ke nepan kuda.”
^ Penyampau tu bisi ditemu ba sekeda manuskrip kelia sereta ba bup bukai. Bisi manuskrip ke bukai madah 40,000.
^ Jaku Asal, “ati ti luas.”
^ Peda Penerang Leka Jaku.
^ Tauka “utai idup ke besayap.”
^ Engka nyengkaum reptilia enggau indu utai.
