1 Raja 7:1-51
7 Solomon ngaga istana ke iya empu sampai tembu pengelama 13 taun.
2 Iya mega ngaga siti rumah ke dikumbai Rumah Utan Lebanon. Pemanjai rumah nya 100 kiubit,* buka iya 50 kiubit, lalu peninggi iya 30 kiubit. Rumah nya digaga ba atas empat baris tiang kayu sidar, lalu ba atas tiang nya bisi mega kayu sidar.
3 Ba entara kayu sidar nya bisi kayu ke melintang nyadika penyambung, lalu ba atas kayu sidar nya enggau kayu ke melintang nya iya ngengkahka papan kayu sidar. Penyampau semua kayu ke melintang nya bisi 45 iti, lalu siti baris bisi 15 iti kayu ke melintang.
4 Rumah nya bisi tiga ringkat jenila ke bebingkai. Semua jenila ba dinding ke siti betunga enggau semua jenila ba dinding seberai.
5 Semua bingkai pintu penama enggau tiang pintu nya besegi empat, nyengkaum semua jenila ba rumah nya.
6 Udah nya, iya ngaga balai ke dikumbai Balai Tiang. Pemanjai iya 50 kiubit, lalu buka iya 30 kiubit. Ba depan balai nya bisi siti ruang ke bisi atap ke ditungkat ngena tiang.
7 Solomon mega ngaga siti da agi balai ke dikumbai Balai Pechara. Ba balai nya, iya duduk ba kerusi diraja iya lalu bejalaika pengawa ngakim. Balai nya dilapis ngena kayu sidar ari lantai sampai ke atap.
8 Istana alai Solomon diau digaga ba laman bukai, lalu istana nya jauh mimit ari Balai Pechara. Chara ngaga istana iya sama baka chara ngaga balai nya. Solomon mega ngaga rumah ke sama baka balai nya ke bini iya, iya nya anak indu Firaun.
9 Semua bengunan nya digaga ngena batu ti mar berengkah ari asas bengunan nya sampai ngagai dinding paling atas, pia mega ari luar sampai ngagai laman besai.* Semua batu nya udah disukat sereta diputung, lalu semua tisi batu nya udah dialuska ngena geraji batu.
10 Asas bengunan nya digaga ngena batu ti besai sereta mar. Bisi batu ke 10 kiubit, lalu bisi mega batu ke 8 kiubit.
11 Dinding iya mega digaga ngena batu ti mar ke udah disukat sereta diputung. Kayu sidar mega bisi dikena ngaga dinding.
12 Ngelingi laman besai* bisi dinding. Dinding nya bisi tiga lapis batu ke udah diputung sereta selapis kayu sidar, sama baka dinding ba laman dalam ke ngelingi Rumah Jehovah enggau ruang depan Rumah nya.
13 Raja Solomon nganjung pesan ngagai Hiram ari Tirus ngambika betemu enggau Solomon.
14 Hiram nya anak siku indu balu ari raban bansa Naptali, lalu apai iya siku tukang temaga ari Tirus. Hiram amat landik, pandai, sereta bisi pengalaman dalam semua pengawa ke bekaul enggau temaga. Hiram betemu enggau Raja Solomon, lalu ngereja semua pengawa ke diberi ngagai iya.
15 Hiram ngaga dua iti tiang temaga. Peninggi tiap iti tiang nya 18 kiubit, lalu tiang nya ulih dililit ngena tali ke ngemanjai 12 kiubit.
16 Iya ngaga dua iti pala tiang ngena temaga, lalu pala tiang nya diengkah ba atas dua iti tiang nya. Peninggi tiap iti pala tiang nya lima kiubit.
17 Tiap iti pala tiang nya diias ngena tujuh iti rantai ke digaga baka jala.
18 Iya mega ngaga hiasan buah delima ke ditusun dua rintai ngelingi rantai ke digaga baka bentuk jala kena ngias pala tiang nya. Iya ngaga utai ti sama ba tiang ke siti da agi.
19 Pala tiang ba ruang depan Rumah Sembiang nya mega bisi ukiran bungai lili. Peninggi ukiran nya empat kiubit.
20 Ba atas tiang bisi begian ti segala ke nyambung tiang enggau pala tiang. Begian segala nya ba baruh rantai ke baka jala. Tiap iti pala tiang bisi 200 igi hiasan buah delima ke ditusun dua rintai ngelingi pala tiang nya.
21 Iya nirika dua iti tiang nya ba luar ruang depan Rumah Sembiang. Tiang ba sepiak kanan* diberi nama Jachin,* lalu tiang ba sepiak kiba diberi nama Boas.*
22 Pala tiang nya bisi ukiran bungai lili. Udah nya, tiang nya pan tembu digaga.
23 Udah nya, iya ngaga siti tangki ai ti besai ke dikumbai Tasik Temaga. Tangki nya segala, lalu pemesai buka mulut tangki nya 10 kiubit. Peninggi iya 5 kiubit, lalu lilit tangki nya 30 kiubit.
24 Ba baruh mulut tangki nya bisi hiasan buah labu ke ngelingi tangki nya. Tiap satu kiubit, bisi 10 igi hiasan buah labu. Hiasan buah labu nya ditusun dua rintai lalu digaga sekali gus enggau tangki nya empu.
25 Tangki nya diengkah ba atas 12 iku patung sapi lelaki, 3 iku nunga ke utara, 3 iku nunga ke barat, 3 iku nunga ke selatan, lalu 3 iku nunga ke timur. Semua sapi nya melakangka tangki nya.
26 Penebal tisi tangki nya ngemesai tapa jari.* Mulut tangki nya baka mulut cawan, lalu melengkung ke luar baka bungai lili ke ngerembai. Tangki nya ulih nyimpan 2,000 bath* ai.
27 Udah nya, Hiram ngaga 10 iti kerita temaga.* Pemanjai tiap iti kerita nya empat kiubit, buka iya empat kiubit, lalu peninggi iya tiga kiubit.
28 Semua kerita nya digaga baka tu: Begian tisi kerita nya digaga ngena keping temaga ke diengkah ba dalam bingkai ke besegi empat.
29 Ba keping temaga nya, bisi hiasan singa, sapi lelaki, enggau cherub. Ba bingkai iya mega bisi hiasan ti sama. Ba atas hiasan singa enggau ba baruh hiasan sapi lelaki nya bisi ukiran.*
30 Tiap iti kerita bisi empat iti roda ke digaga ngena temaga, sereta bisi dua iti batang temaga kena nyambung roda nya. Ba keempat-empat sudut kerita nya, bisi tiang kena nyukung batang nya. Ba baruh bisin bisi utai kena ngetanka bisin nya, lalu utai nya bisi ukiran.*
31 Mulut bisin nya segala lalu dikelingi siti bingkai ti segala. Ba tisi bingkai nya bisi ukiran. Bisin nya diengkah dalam bingkai nya. Peninggi ari baruh bisin nya sampai ngagai baruh bingkai nya satu kiubit. Bingkai segala nya besambung enggau utai ke kena ngetanka bisin nya, lalu peninggi iya satu setengah kiubit. Begian tisi bingkai nya mega bisi diengkah keping temaga ke besegi empat, ukai segala.
32 Keempat-empat roda nya ba baruh kerita nya. Lalu peninggi tiap iti roda nya satu setengah kiubit. Tiang kena ngetanka batang roda disambungka ba kerita nya.
33 Roda kerita nya digaga baka roda kerita kuda. Utai kena ngetanka roda, rim, jejari rim, enggau pusat roda digaga ngena besi magang.
34 Empat iti tiang ba empat iti sudut kerita nya digaga sekali gus enggau kerita nya.
35 Ba atas kerita nya bisi bingkai ngelingi bisin, lalu peninggi bingkai nya setengah kiubit. Bingkai enggau keping temaga ba bingkai ke ngelingi bisin nya digaga sekali gus enggau kerita nya.
36 Ba bingkai enggau keping temaga nya bisi ukiran cherub, singa, enggau pun kayu engkerema ba semua endur ke ulih diukir, lalu semua nya dikelingi ukiran.*
37 Baka nya meh chara iya ngaga 10 iti kerita nya. Semua kerita nya sebaka magang, sama pemesai enggau sama bentuk.
38 Iya ngaga 10 iti bisin ngena temaga. Siti bisin ke siti kerita. Pemesai buka tiap iti bisin empat kiubit. Tiap iti bisin ulih nyimpan 40 bath ai.
39 Udah nya, iya ngengkahka lima iti kerita nya ba sepiak kanan Rumah Sembiang, lalu lima iti ke bukai diengkah ba sepiak kiba. Iya ngengkahka Tasik Temaga ba sepiak kanan Rumah nya, iya nya tunga ke tenggara.
40 Hiram mega ngaga bisin ke bukai, sekup, enggau mangkuk.
Hiram nembuka semua pengawa iya ba Rumah Jehovah baka ke diasuh Raja Solomon. Tu meh utai ke digaga Hiram:
41 Dua iti tiang enggau dua iti pala tiang ke baka mangkuk; rantai ke baka jala kena ngias kedua-dua pala tiang nya;
42 400 igi hiasan buah delima ba rantai ke baka jala kena ngias kedua-dua pala tiang nya, iya nya dua rintai hiasan buah delima ke tiap iti rantai ke baka jala;
43 10 iti kerita enggau 10 iti bisin ba atas kerita nya;
44 Tasik Temaga enggau 12 iku patung sapi lelaki ba baruh Tasik Temaga nya;
45 enggau beledi, sekup, mangkuk, sereta semua pekekas ke digaga Hiram ari temaga ke bekilat. Semua pekekas tu digaga ke Raja Solomon ngambika dikena ba Rumah Jehovah.
46 Raja Solomon ngasuh orang ngeluluhka temaga lalu nuangka nya ngagai acuan ke digaga ngena tanah liat. Endur sida ngaduka nya ba entara Sukot enggau Saretan, iya nya ba kawasan Jordan.
47 Solomon enda nimbang semua pekekas nya laban kelalu mayuh. Nya alai, berat semua temaga ke dikena enda ditemu.
48 Solomon ngaga semua pekekas tu ke Rumah Jehovah: Alta emas; mija emas alai ngengkahka roti ti diberi ngagai Petara;
49 penuduk lampu ke digaga ngena emas ti tulin ke diengkah ba depan Endur ti Pemadu Kudus, lima iti ba sepiak kanan, lima iti ba sepiak kiba; serindak bungai, lampu kelita, enggau sepit (semua nya digaga ngena emas);
50 bisin, utai kena madamka lampu, mangkuk, cawan, enggau pekekas endur engkah bara api (semua nya digaga ngena emas ti tulin); enggau pelasar ke digaga ngena emas ke pintu Endur ti Pemadu Kudus sereta ke pintu Endur ti Kudus.*
51 Raja Solomon nembuka semua pengawa ke patut dikereja iya ke Rumah Jehovah. Solomon lalu mai semua barang ke udah dikuduska apai iya, David, lalu nyimpan pirak, emas, enggau barang bukai, ba endur nyimpan reta ba Rumah Jehovah.
Nota Kaki
^ Peda Rujukan B14.
^ Iya nya, laman luar.
^ Iya nya, laman luar.
^ Tauka “ba selatan.”
^ Reti nya “Awakka Iya [iya nya, Jehovah] Negapka.”
^ Engka mai reti “Ngena Pengering.”
^ Peda Rujukan B14.
^ Peda Rujukan B14.
^ Tauka “kerita temaga kena ngangkut ai.”
^ Engka ukiran ke bebentuk melengkung.
^ Engka ukiran ke bebentuk melengkung.
^ Engka ukiran ke bebentuk melengkung.
^ Jaku Asal, “Rumah Sembiang.”
