1 Raja 9:1-28
9 Pengudah Solomon tembu ngaga Rumah Jehovah, istana raja, enggau semua utai bukai ti deka digaga Solomon,
2 Jehovah ngayanka Diri baru ngagai Solomon, baka ke udah digaga Iya ngagai Solomon ba Gibeon.
3 Ku Jehovah bejaku ngagai iya: “Aku udah ninga sampi nuan sereta utai ke dipinta nuan ke udah disebut nuan ba depan Aku. Aku udah nguduska Rumah ke digaga nuan nya, lalu ngengkahka nama Aku ba dia belama iya. Aku deka seruran nyaga sereta ngemataka Rumah nya.
4 Enti nuan nyembah Aku, baka apai nuan, David, ke nyembah Aku enggau ati ti ikhlas* sereta ngereja utai ti betul, lalu enti nuan ngasika atur enggau adat Aku sereta ngereja semua utai ke diasuh Aku,
5 Aku deka ngasuh perintah nuan ba Israel tegap belama iya, baka ke udah disemayaka Aku ngagai apai nuan, David. Peturun nuan deka seruran duduk ba kerusi diraja Israel.
6 Tang, enti kita enggau bala anak kita ninggalka Aku, enda ngasika pesan sereta atur ke diberi Aku, lalu besugang sereta nyembah petara bukai,
7 Aku deka muru orang Israel ari menua ke udah diberi Aku ngagai sida. Aku mega deka badu beratika Rumah ke udah dikuduska Aku ke nama Aku. Aku deka nentuka sida dikemaruhka sereta dikeleseka semua orang.
8 Rumah nya deka nyadi tembawai. Semua orang ke mansa Rumah nya deka iran ati sereta ngilikka pala* sambil nanya: ‘Nama kebuah Jehovah ngereja utai ke baka nya ngagai menua tu enggau ngagai Rumah tu?’
9 Udah nya, orang deka madah: ‘Sida udah ninggalka Jehovah, Petara sida, ke udah mai aki ini sida pansut ari menua Ejip. Sida nguing ngagai petara bukai lalu besugang nyembah petara nya. Nya meh kebuah Jehovah ngasuh semua penusah nya ninggang sida.’”
10 Pengudah Solomon ngaga dua iti rumah pengelama 20 taun, iya nya Rumah Jehovah enggau istana raja,
11 Raja Solomon meri Hiram, raja ari Tirus, 20 iti kuta ba Galili. Hiram udah nyediaka kayu sidar, kayu juniper, enggau emas baka ke dipinta Solomon.
12 Nya alai, Hiram pan mupuk ari Tirus deka meda semua kuta nya. Tang, iya enda puas ati enggau semua kuta nya.
13 Ku iya madah ngagai Solomon: “Madi, nama kebuah nuan meri aku kuta ke baka nya?” Nya kebuah semua kuta nya dikumbai Menua Kabul* nyentuk ngagai seharitu.
14 Hiram udah nganjung 120 talenta* emas ngagai Raja Solomon.
15 Raja Solomon ngasuh orang ke wajib gawa ke iya ngaga Rumah Jehovah, istana, Bukit,* dinding Jerusalem, kuta Hasor, Megido, enggau Geser.
16 (Firaun, raja Ejip, datai ngalahka Geser lalu nunu kuta nya. Iya mega munuh orang Kanaan ke diau ba kuta nya. Udah nya, iya meri kuta nya ngagai anak indu iya, iya nya bini Solomon, nyadika hadiah kawin.)
17 Solomon nirika baru* kuta Geser, Bet-horon Baruh,
18 Baalat, enggau Tamar. Tamar ba menua puang, ba menua Israel.
19 Iya mega nirika baru kuta alai nyimpan pemakai enggau alai nyimpan kerita kuda sereta kuta ke raban soldadu ke nepan kuda. Semua utai ke deka digaga Solomon ba Jerusalem, ba Lebanon, enggau ba serata kawasan ke dipegai iya pan tembu magang.
20 Bekaul enggau semua peturun orang Amor, orang Het, orang Peris, orang Ibi, enggau orang Jebus ke agi idup, ke ukai sebagi ari orang Israel,
21 wajib gawa nyadi ulun Solomon nyentukka seharitu. Sida nya orang ke enda dibunuh orang Israel, lalu diau ba menua Israel.
22 Tang, Solomon nadai ngasuh orang Israel nyadi ulun iya. Iya ngasuh sida nyadi soldadu, pegawai, bala tuai, pegawai soldadu, ketuai orang ke nepan kerita kuda, enggau ketuai bala soldadu ke nepan kuda.
23 Bisi 550 iku ketuai bala pemesai ke betanggungjawap nyaga pengawa ke diberi Solomon. Sida ngemataka bala pekereja Solomon.
24 Anak indu Firaun pindah ari Kuta David ngagai istana ke udah digaga Solomon ke iya. Udah nya, Solomon ngaga Bukit.*
25 Tiga kali setaun, Solomon nyerahka pemeri tunu enggau pemeri bebaik ba alta ke udah digaga iya ke Jehovah. Iya mega nunu pemeri nya ba depan Jehovah nyentukka asap niki ke atas. Baka nya meh chara Raja Solomon nembuka pengawa begagaka Rumah Sembiang.
26 Raja Solomon mega ngaga mayuh kapal ba Esion-geber, semak Elot, ba tebing Tasik Mirah, ba menua Edom.
27 Hiram nganjung bala iya, iya nya bala kelasi kapal ke bepengalaman ngambika sida bekerejasama enggau bala Solomon ba kapal nya.
28 Sida belayar ngagai Opir ngambi 420 talenta emas, lalu mai emas nya ngagai Raja Solomon.
Nota Kaki
^ Tauka “tetap ati; pengabis ati.”
^ Jaku Asal, “ngensung.”
^ Tauka engka, “Menua ke Nadai Guna.”
^ Peda Rujukan B14.
^ Jaku Hebrew, mil·lohʼ′ ke mai reti “tugung tanah.”
^ Tauka “negapka.”
^ Jaku Hebrew, mil·lohʼ′ ke mai reti “tugung tanah.”
